Read Chimborazo Highland Quichua CANTARES 3 Bible Online

CANTARES 3 - Chimborazo Highland Quichua bible

CANTARES 3

¹Ñucata c'uyajtaca tutacunami ñuca camapi mashcarcani. Mashcashpapish manamari japircanichu.

²Chaimantaca cashnami nircani: “Cunanca jatarishpa, cai pueblo muyundijta mashcagrishalla. Ñucata c'uyajtaca ñancunapi, plazacunapipish mashcagrishalla” nircanimi. Chashna mashcashpapish paitaca manamari japircanichu.

³Ashtahuanpish pueblota cuidajcunarajmi ñucahuanca tuparca. Paicunataca: “¿Manachu ñuca c'uyashcahuan tuparcanguichij?” nishpami tapurcani.

⁴Paicunamanta ashata caruyashpaca, ñapish ñuca c'uyashcahuanmi tupanacurcani. Paihuan tupashpaca manataj cacharircanichu. Ashtahuanpish paitaca ñucata huachaj mamapaj huasiman pushashpami, chaiman yaicuchircani.

⁵Jerusalenpi causaj solteracunalla, corzocunamantapish, sacha tarugacunamantapishmi cashna nipani: Ñuca c'uyashcataca amataj rijchachipaichijchu. Maicamapish samarichun saquipaichijlla.

⁶¿Shitashca pambataca pi huarmitajshimari, tucui layaman ashnacuj cutahuanpish, inciensohuanpish, mirrahuanpish churarishpa mishquijllata ashnacuj, cushni shina huichiyacun?

⁷Riqui, chaica Salomonta huanduna literami. Chai huanduna literataca sujta chunga c'ari c'ari Israel soldadocunami cuidashpa shamucuncuna.

⁸Paicunaca tucuicunami espadata charicuncuna, macanacunatapish alli yachajcunami. Paicunata tuta ima manchachinamantapish cinturapi espadata aparishcamari.

⁹Jatun mandaj Salomonca, Libanomanta apamushca caspicunahuanmi paipaj shuj carretata rurachishca.

¹⁰Chai carretapica cullqui pilarcunatami churachirca. Paipaj huasha quimirinatapish curihuanmi c'atachirca. Pai tiyarinatapish pucajlla linsohuanmi rurachirca. Jerusalenpi causaj solteracunami pai tiyarinataca c'uyaihuan sumajta bordarcacuna.

¹¹Siónpi causaj solteracunalla, jatun mandaj Salomonta ricunaman llujshichigari. Paipaj shungu cushicuna punllapi, pai casarai punllapi, paipaj mama churachishca coronata churashcamari shamucun.