Read Chimborazo Highland Quichua CANTARES 5 Bible Online

CANTARES 5 - Chimborazo Highland Quichua bible

CANTARES 5

¹Ñuca panilla, ñuca c'uyashca huarmiculla, ñuca huertamanmi shamurcani. Ñuca mirratapish, mishquiman ashnaj jambicunatapish ñamari japini. Sacha chuspi huachashca mishquitapish ñamari micuni. Vinotapish, lechetapish ñamari ubyani. Ñucahuan alli apanacujcunapish, ñuca c'uyashca huauquicunapish cushicushpa huijsa pajtata micupaichijlla, ubyapaichijlla.

²Ñuca ñahui huichcarijpipish, ñuca yuyaica rijcharishcami carca. Ñuca c'uyashcami cashna caparicushca carca: “Ñuca panilla, ñuca c'uyashcalla, ñuca palomalla, ima pandata mana rurajlla punguta pascapayari. Ñuca umata garhua shutujyachicunca. Ñuca ajchamantapish garhua yacu shutucunca” nishpami caparicushca carca.

³Chashna caparicujta uyashpapish ñucaca: “Ñamari churanata llujshichirircani. Maitataj cutin churarishari, ñamari chaquicunatapish maillarircani, maitataj cutinca mapayashari” nircanimi.

⁴Chaimantami ñuca c'uyashcaca pungupi tiyaj jutcuta maquita catichishpa punguta pascasha nirca. Chaipimi ñuca shungu saltarca.

⁵Ñuca c'uyashcata yaicuchingapajmi, jatarishcahuan punguta pascagrircani. Ñuca maquicunamantaca, mirrami shuturca. Aldabata pascacujpica, ñuca dedocunataca mirrami yacu shina callparca.

⁶Ñuca c'uyashcaca punguta pascanapajca, ñami rishca carca. Pai rimajta uyashpaca tucui yuyaihuanmi paihuan canata munarcani. Mashcashpapish, ña mana japircanichu. Cayajpipish ña mana cutichircachu.

⁷Ashtahuanpish pueblota cuidaj runacunami ñucahuanca tuparcacuna. Paicunami ñucataca macashpa chugrichircacuna. Pircata cuidaj soldadocunami, jahua churanatapish quichurcacuna.

⁸Jerusalenpi causaj solteracunalla, ñuca c'uyashcahuan tupashpaca: “Canta ricunaihuan ungushpa huañucurcami” nishpa huillapanguichijtaj nircami.

⁹¿Tucui huarmicunata yalli sumaj huarmilla, cambaj c'uyashcaca, caishuj c'uyashcataca imahuan yallitagari? ¿Cambaj c'uyashcaca caishuj c'uyashcata yalli cajpichu, ñucanchijtaca tupashpa huillanguichij ningui imatagari?

¹⁰Ñuca c'uyashcaca yurajllamari, ñahuipish pucajllamari, chunga huaranga runacunapaj chaupipi cashpapish rijsinallamari.

¹¹Paipaj umaca ashtahuan alli curi shinamari. Paipaj ajchapish cuervo pájaro shina yanajlla crespo ajchamari.

¹²Paipaj ñahui luluncunaca, lechepi armarishca yurajlla palomacuna yacu uripi tiyacuj shinamari, sumajta churashcapishmari.

¹³Paipaj quijaduscunaca, mishquijllata ashnacujcunata churana era shinami, sisacuna shina mishquijllata ashnacujmi. Paipaj shimimantaca, lirio sisamanta mishquijllata ashnaj mirra llujshicuj shinamari.

¹⁴Paipaj maquicunaca, curi sortijascunapi achij nicuj jacinto rumita churachishca shinamari. Paipaj aichaca, yurajlla marfilta zafiro rumicunahuan llutachishca shinamari.

¹⁵Paipaj changacunaca, curi basillacuna jahuapi mármol rumi pilarcunata shayachishca shinamari. Paica Líbano urcu shina jatunmi, chai urcupi tiyaj cedro yuracuna shina tucuicunata yalli sumajmi.

¹⁶Jerusalenpi causaj solteracunalla, ñuca c'uyashca, ñucahuan alli apanacuj runaca mishqui shimimari, paica munananqui runamari.