Read Chimborazo Highland Quichua CANTARES 7 Bible Online

CANTARES 7 - Chimborazo Highland Quichua bible

CANTARES 7

¹Jatun mandajpaj ushushilla, cambaj chaquicunaca sandaliata churarishcaca sumajmari ricurin. Cambaj changacunaca, aparina sumajcunata ruranata yachajcuna rurashca shina sumajmari ricurin.

²Cambaj pupuca, yacuhuan junda tiyacuj taza shinamari. Cambaj huijsaca, montonashca trigota, lirio sisacunahuan muyundijta churashca shinamari.

³Cambaj chuchucunaca, ishqui huacharishca gacelacuna shinamari.

⁴Cambaj cungaca, marfilhuan shayachishca torre shinamari. Cambaj ñahui luluncunaca, Hesbón pueblopi Bat-rabim shuti pungu c'uchupi tiyaj yacu tanquecuna shinamari. Cambaj singaca Libanopi tiyaj torre, Damasco pueblota ricucuj shinamari.

⁵Cambaj umaca, Carmelo urcu shinamari. Cambaj uma ajchaca, jatun mandajpaj amsa puca churanata corredorpi huarcushca shinamari.

⁶¡Canca sumajmari cangui! Ñuca c'uyashcalla, canca mishquijlla c'uyaitami charingui.

⁷Canca palmera yura shina jatuntamari huiñashcangui. Cambaj chuchucunaca, chai yurapaj racimocuna shinamari.

⁸Ñucaca: “Palmera yuraman huichiyashpa ramacunapi charirisha” nircanimi. Cambaj chuchucunaca racimo uva shina cachun. Cambaj shimica manzana shina mishquijllata ashnacuj cachun.

⁹Cambaj shimica, cambaj c'uyashcapajca alli vinota ubyashca shina cachun. Vinoca yuyajcunatapish rimachinllami.

¹⁰Ñucaca, ñuca c'uyashcapajmi cani. Paica ñucahuanmari cushicuitaca japin.

¹¹Ñuca c'uyashcalla, jacu chagracunata ricumushun, jacu pueblo muyundij llajtacunapi causashun.

¹²Tutamanta utcata jatarishpa uvata jacu, ricumushun. Uvapish, granadacunapish ñachu sisacun, ñachu granucun imataj jacu ricumushun. Chaipimi ñuca c'uyaitaca canman cusha.

¹³Mandrágora granocunami ashnacun. Ñucanchij huasi pungu c'uchullapimari, tucui laya micuna frutacunatapish charinchij. Ñuca c'uyashcalla, cambajca sarunman japishca frutacunatapish, cunanlla p'itishca frutacunatapishmi huaquichircani.