Read Chimborazo Highland Quichua ISAÍAS 1 Bible Online

ISAÍAS 1 - Chimborazo Highland Quichua bible

ISAÍAS 1

¹Judapish Jerusalenpish imalla tucunata Amozpaj churi Isaías muscuipi shina ricushcami. Uzías, Jotam, Acaz, Ezequías shuti jatun mandajcuna Judá llajtata mandacui punllacunapimi chashna muscurca.

²Chaimi paica uyaiyari jahua pacha. Uyaiyari cai pacha. Mandaj Diosca cashnami nin: “Cai huahuacunataca huiñachircanimi. Jatunyachircanimi. Ashtahuanpish paicunaca ñucata p'iñashpami c'ariyancuna.

³Huagrapish paipaj dueñota rijsinmi, burropish paipaj dueño rurashca corralta rijsinmi. Ashtahuanpish israelcunaca ñucapaj cashcataca mana entendincunachu. Ñuca agllashca israelcunaca ñuca paicunapaj dueño cashcataca mana rijsincunachu” ninmi.

⁴¡Aij, juchasapa gentecunalla. Yallitaj millaita aparishcacunalla. Millaicunapaj huahua huahuacuna. Yallitaj millaita rurana yuyailla cajcuna! Mandaj Diostamari saquircacuna. Huashamanmari tigrarishcacuna. Israelpaj jucha illaj Diostamari jatunta p'iñachishcanguichij.

⁵¿Ima nishpataj ashtahuan llaquichishca cashun ninguichij? ¿Ashtahuan c'ariyashpachu caticushunlla ninguichij? Umacamamari chugri canguichij. Shungupish nanaihuan chaupiricujmari canguichij.

⁶Chaqui plantamanta umacama maipi mana sanochu. Ashtahuanpish chugri, p'unguishca, carachayashpa ismucunguichijmi. Pi mana jambishca, pi mana pilluchishpa huatashca, aceitehuan churashpa pi mana nuyuchishcami canguichij.

⁷Cancunapaj allpapish tucuchishca ima illajmari saquirishca. Pueblocunapish ninahuan rupachishcamari. Cancunapaj allpapi p'ucushcacunatapish caru llajtamanta cajcunamari micushcacuna. Cancunapaj ñaupajllapitajmi micushcacuna. Mana rijsishcacunamari shitashca pambata saquishcacuna.

⁸Sionpaj ushushillamari saquirishca. Uva chagra chaupipi chuglla shina paillamari saquirishca. Melón chaupipi chuglla shina paillamari saquirishca. Chai pueblollamari p'iñajcuna muyunchishca saquirishca.

⁹Tucuita Mandaj Dios ñucanchijta ashallatapish mana saquishca cajpica, p'ichillatapish mana puchuchishca cajpica, Sodoma pueblo shina illanchijmanmi. Gomorra pueblo shina mana tiyanchijmanchu.

¹⁰Sodoma pueblota mandajcuna Mandaj Dios rimashcata uyaichigari. Gomorra pueblo, ñucanchij Taita Diospaj mandashcata uyaichigari.

¹¹Mandaj Diosca cashnami nin: “Cancuna ñucaman cushpa rupachishca achcacunaca ñucapajca ¿imapajtaj valishcari? Carnerocunata cushpa tucui rupachishcacunatapish, huirayashca animalcunapaj huirata cushpa rupachishcatapish ñamari amini. Huagracunapaj yahuartapish ña mana ninichu. Ovejacunapaj yahuartapish ña mana ninichu. Chivocunapaj yahuartapish ña mana ninichu.

¹²Chaicunata ñucaman cungapaj shamushpa ñuca huasi canllacunata yangata rurashpa saruchunca ¿pi mañajpitaj shamurcanguichij?

¹³Cancunaca ñucaman cuna cashcataca yangallamari apamunguichij. Inciensota rupachishcapish ñucapajca millananami. Mushuj lunapi, samana punllapi tandanacuita cancuna rurashcaca ñucapajca millanayajmi. Cancunapaj jatun fiestacunapish millaita ruranapajllami.

¹⁴Cancunapaj mushuj luna punllacunapi tandanacuicunapish, cancunapaj jatun fiestacunapish ñucataca yallitajmi p'iñachin. Chaicunaca ñucataca yallitajmi llashan. Chai tandanacuicunataca shaicunimi ña mana ahuantanichu.

¹⁵Cancunapaj maquicunaca yahuarhuan jundamari. Chashna cashca cashpa ñucaman maquicunata chutajpipish ñuca ñahuitaca shujmanmi churani. Cancuna achcata mañacujpipish, manataj uyanichu.

¹⁶Maillarichij, chuyayaichij. Ñuca ñaupajpi cancuna millaita rurashcata anchuchichij. Millaita ruranata saquichij.

¹⁷Allita ruranata yachaichij. Cashcata ruranata mashcaichij. Llaquichishpa quichushcacunata tigrachichichij. Yaya mama illaj huahuacunata llaquichicujpi mitsaichij. Viuda huarmicunata pi llaquichicujpi mitsaichij.

¹⁸Tucui caicunata ch'imbapura parlanacungapaj shamuichij ninmi Mandaj Diosca. Cancunapaj juchacuna amsa puca cajpipish, rasu shina yurajllata yurajyachishcami canga. Cancunapaj juchacuna pucanicuj cashpapish, yurajlla millmata shina rurashcami canga.

¹⁹Ñuca nishcacunata cazunata munashcamanta cazushpaca, allpapi p'ucushcacunamantaca tucuimanta yalli alli p'ucushcatani micunguichij.

²⁰Ñuca nishcacunata mana munashpa mana cazushpaca, espadahuan tucuchishcami canguichij” ninmi Mandaj Diosca.

²¹Imatapish chaitataj pajtachij pueblolla, cunanca huainayaj huarmi canamanmari tigrarishcangui. Canpica cashcata rurajcunami junda carca. Canpica allita rurajcunallami causarca. Ashtahuanpish cunanca huañuchijcunallami causacuncuna.

²²Cambaj cullquipish fierro ñucumanmi tigrashca. Cambaj vinopish yacuhuan chagrushcami tucushca.

²³Cancunata mandajcunaca c'ariyajcunami tucushca. Shuhuajcunapurami tucushca. Tucuicunami camarita japinallata munancuna. Tucuicunami imata cujcunapuralla tucunata munancuna. Yaya mama illaj huahuacunata llaquichicujpipish mana mitsancunachu. Viuda huarmicunata pi llaquichicujpipish paicunaca ricucunllacunami.

²⁴Chaimanta Jatun Diosca, tucuita Mandaj Diosca, israelcunapaj tucuita rurai tucuj Diosca cashnami nin: “Aij, cunantajca ñucata p'iñajcunataca llaquichishpatajmi cushicugrini. Paicunatapish tigra llaquichishpatajmi alli cagrini.

²⁵Ñuca maquihuanmi cutinllataj llaquichigrini. Fierro ishpashcata tucui anchuchij shinami p'ichagrini. Canpi tiyaj mapataca tucuitami anchuchigrini.

²⁶Canpica callaripi shinallataj cashcata ruraj juezcunatami churagrini. Cunaj yuyajcunatapish ñaupaman caj shinallatatajmi churagrini. Chashna rurajpica, cantaca cutinllatajmi: Cashcata ruraj llajtami ningacuna. Chaitataj pajtachij llajtami ningacunami.

²⁷Siontaca paicuna ima shinalla rurashcata ricuchishpami quishpichisha. Quishpichishcacunaca cashcata rurashpa quishpichishcami cangacuna.

²⁸C'ariyajcunata, juchasapacunataca shuj cutin ñutushcami cangacuna. Mandaj Diosmanta caruyashcacunataca chingachishcami cangacuna.

²⁹Encina yuracunapi adoranata munashcamanta adorajcunaca pingachishcami canguichij. Huertapi adoranata munashcamanta adorajcunapish pingachishcami canguichij.

³⁰Cancunaca encina yura p'anga illaj tucuj shinami tucunguichij. Yacu illajlla huerta shinami tucunguichij.

³¹C'ari c'aricunaca caspita cuchushca jantsi shinami saquiringa. Paicuna rurashcacunaca nina chispa shinami canga. Ishquindij tandallami lunyashpa rupanga. Chai ninataca, pi mana huañuchi tucungachu” ninmi.