Read Chimborazo Highland Quichua ISAÍAS 10 Bible Online

ISAÍAS 10 - Chimborazo Highland Quichua bible

ISAÍAS 10

¹¡Aij, cashcata mana rurashpa mandanacunata rurajcunalla. Mana pajtachi tucuipaj mandashcacunata rurajcunalla.

²Huajchacunapaj cashcata ruranata anchuchingapajmi chaicunataca rurancuna! Ñuca agllashcacuna llaquihuan cajpi mana cashcata rurangapajmi chashna rurancuna. Viudacuna imalla charishcata quichungapaj, yaya mama illajllacunapajta shuhuangapajmi chashna rurancuna.

³Chashna rurashcamanta llaquichina punlla chayamujpica ¿imatashi ruranguichij? Caru llajtamanta llaquichijcuna chayamujpica, ¿pitashi ayudachun japinguichij? Cancuna charishcacunataca ¿maipishi saquinguichij?

⁴Ñuca illajlla cashpaca, prezucunahuanmi cumuringuichij. Huañuchijcunapaj maquipimi urmanguichij. Chashna llaquichishpapish pai p'iñarishcaca manataj pararingachu. Paicunata llaquichingapajca maquita chutashcarajmi.

⁵¡Aij, Asiria llajtalla! Ñuca yallitaj p'iñarishcapica ñuca caspimi, ñuca varami. Ñuca p'iñaritaca paipaj maquipimi churarcani.

⁶Mana ñucapajlla causacuj llajtata llaquichichunmi cachasha. Ñuca p'iñashcacunata llaquichichunmi cachasha. Paicuna quichushcacunata quichushpa apachunmi cachasha. Paicunatami ñanpi sirij lodota shina sarujcuna cachun churasha.

⁷Shina cajpipish, paica ñuca chashna rurachijllapi chashna ruracushcataca mana entendingachu. Paipaj shungupipish chashna cashcataca manataj yuyangachu. Ashtahuanpish paipaj yuyaipica, caishuj llajtatapish, chaishuj llajtatapish huashan huashan sapimanta aisashpa llaquichinallatami yuyanga.

⁸Chaimi paica cashna niringa: “Jatun mandajcunaca ¿manachu ñuca churashca mandajcunalla?

⁹Calno pueblopish ¿manachu Carquemis pueblo shinallataj? Hamat pueblopish ¿manachu Arfad pueblo shinallataj? Samaria pueblopish ¿manachu Damasco pueblo shinallataj?

¹⁰Rurashcalla dioscunahuan junda caj llajtacunatami ñuca maquihuan quichurcani. Chai rurashcalla dioscunaca Jerusalenpi, Samariapi tiyaj dioscunata yallimi carca.

¹¹Samariatapish chaipi tiyaj rurashcalla dioscunatapish ¿ima shinami tucuchircani? ¿Manachu Jerusalentapish chaipi tiyaj rurashcalla dioscunatapish chai shinallataj tucuchisha? niringami” nircami.

¹²Ashtahuanpish Jatun Dios pai rurana cashcata Sión urcupi, Jerusalenpi tucuchishca q'uipaca, Asiriata jatun mandajca pai quiquinllataj c'ari c'ari cashcamanta chashna rurashcata yuyashpa, pai jatun tucushcamanta p'ucushca grano shinataca jatunta llaquichishcatami japinga.

¹³Chaimi paica cashna nirin: “Ñucaca yuyaisapami cashcani. Ñucaca chashna cashpa c'ari c'ari cashcahuan, ñuca maquihuan, ñuca yachaj cashcahuanmi chashna rurarcani. Cai tucui gentecunapaj llajtacunatapish japircanimi. Paicunapaj charishcacunatapish quichurcanimi. Mandashpa tiyacujcunataca yallitaj c'ari c'ari runa shinami jahualla urmachircani.

¹⁴Gentecuna imalla charishcacunataca tazinta japij shinallami japircani. Shitarishca luluncunata pallaj shinallami japircani. Chashnami chai llajtacunataca tucuita ñucapajta rurarcani. Alasta cuyuchishpa mitsajpish pi mana tiyarcachu. Picuta pascashpa huacarishpa mitsajpish pi mana tiyarcachu” nirircami.

¹⁵¿Hachaca paihuan hachacuj runata yanganchishpa jatun tucui tucunchari? ¿Caspita p'itina sierrapish paihuan p'iticuj runata yanganchishpa jatun tucui tucunchari? ¡Tauna caspica paita jatarichij runataca mana jatarichinchu! ¡Tauna caspica ¿maitataj gentetaca jatarichingari?!

¹⁶Chashna cashcamantami tucuita Mandaj Jatun Diosca, c'ari c'aricunapajmanca irquiyachinata cachanga. Paicuna sumaj cashcataca cuerpo ucupi ninata japichishpami rupachinga.

¹⁷Israelcunapaj luzca, ninamanmi tigranga. Paicunapaj jucha illajca nina lunyacujmanmi tigranga. Chashna cashpami paicunapaj llajtapi tiyaj casha q'uihuacunata, casha yuracunataca shuj punllallapi tucui rupachinga.

¹⁸Paicunapaj sachacuna shina jatun canataca, alli granota p'ucuj allpa shina jatun canataca tucuimi chingachinga. Cuerpondij, almandijmi tucui chingachinga. Chashna rurajpica, macanacuipi mishajpi banderata apaj urmashca shinami canga.

¹⁹Paicunapaj sachacunapi saquirij yuracuna shinaca ashacunallami canga. Chaicunataca shuj uchilla huahuallapish yupai tucungallami.

²⁰Chai punllacunapica cashnami tucunga: Israelcunapuramanta puchushcacunaca paicunata llaquichijcunapi taunarinataca mana yuyangacunachu. Jacobpaj huahua huahua puchushcacunaca paicunata llaquichijcunapi taunarinataca manataj yuyangacunachu. Ashtahuanpish paicuna shuj yuyai taunarinaca Mandaj Dios, israelcunapaj jucha illaj Diosllami canga.

²¹Puchushcacunaca tigrangacunami. Jacobpaj huahua huahua puchushcacunaca tucuita rurai tucuj Taita Diospajman tigraringacunami.

²²Israel llajtalla, canpi causacuj gentecunaca mama cucha uripi tiyaj t'iyu allpa shina yallitaj achca cashpapish puchushcacunallami tigrangacuna. Israelcuna ima shinalla rurashcata ricushpa chingachinata yuyarishcataca paicuna ima shinalla rurashcata ricuchishpami chingachinga.

²³Tucuita Mandaj Jatun Diosca israelcunata chingachinata yuyarishcataca tucui llajtacunata cachashpami chingachinga.

²⁴Chashna nicushpapish tucuita Mandaj Jatun Diosca cashnami nin: “Ñuca agllashcacunalla. Siónpi causajcunalla. Asiria llajtataca ama manchaichu. Cantaca caspihuanmi chugrichinga. Canta llaquichingapajmi tauna caspita alzanga. Egiptopi causajcuna shinallatajmi ruranga.

²⁵Cancunata llaquichijcunata llaquichingapajmi, cunanmanta asha punllacunallapi ñuca yallitaj p'iñarishcaca tucuringa.

²⁶Tucuita Mandaj Diosca israelcunata llaquichijta llaquichingapajca, azotinatami alzanga. Oreb c'acapi Madiancunata huañuchij shinallatajmi huañuchinga. Paipaj caspitaca cucha jahuatami chutanga. Egipto ñanpi rurashca shinallatajmi ruranga.

²⁷Chai punllacunapica cancuna aparishcacunataca anchuchingami. Paicunapaj llashaj yugota cancunapaj cunga tullupi apachishcatapish anchuchingami. Llashaj yuguca ismungami. Quishpichichun ñuca churashca cashcamantami chashna rurangui” nircami.

²⁸Ajat pueblocama shamushpaca, Migrón pueblocamami rirca. Micmas pueblopimi soldadocunata yuparca.

²⁹Jatun yacu ricun maita ch'imbanallata ch'imbashpami, Geba pueblopi tiyarircacuna. Ramá pueblopi causajcunaca chujchurcami. Saulpaj Gabaa pueblomantapish miticunamanmi callparcacuna.

³⁰Galimpaj ushushi sinchita capariyari. Lais puebloman uyarijta capariyari. ¡Anatot pueblolla imachari tucunga!

³¹Madmenapi causajcunaca caparinacurcacunami. Gebimpi causajcunapish miticushpa callpancunami.

³²Cunanllataj Nob pueblopi shayarishpami, Sionpaj ushushi urcuman, Jerusalén lomaman paipaj maquita chutanga.

³³Riquichij, tucuita Mandaj Jatun Diosca yura ramacunataca p'itijnimi shitanga. Jatun yuracunapish p'itishcami canga. Jatuncunaca urmachishcami canga.

³⁴Yallitaj tiyaj yuracunataca hachahuanmi p'itinga. Libanoca c'ulun nishpami urmanga.