Read Chimborazo Highland Quichua ISAÍAS 16 Bible Online

ISAÍAS 16 - Chimborazo Highland Quichua bible

ISAÍAS 16

¹Llajtata mandajpajca malta ovejata cachaichigari. Shitashca pambapi caj Sela pueblomantaca, Sión urcupi caj puebloman cachaichigari.

²Pájaro mancharishpaca paipaj tazinta shitashpami miticugrin. Moabcunapish chai shinallatajmi, Arnón yacuta maitami ch'imbanallacunata miticushpa ringacuna.

³Tandanacushpa yuyarichigari. Imata ruranata yuyarichigari. Cancunapaj llanduhuanca chaupi punllata amsayachij shina miticushpa ricujcunataca tapaichigari. Llajtata shitashpa miticunaman shamucujcunataca p'iñajcunapaj maquipi ama churanguichijchu.

⁴Moabcunata ñuca llujshichishpa cachashcacunataca canhuan causachun saquilla. Huañuchishpa ama tucuchichun pacaj caiyari. Jatunta llaquichijca chingaringami. Huañuchishpa tucuchijca tucuringami. Sarushpa llaquichijca, llajtamanta chingaringami.

⁵Mandashpa tiyanapica llaquij canatami churanga. Chaipica pi mana cuyuchipaj mandajmi tiyaringa. Chaica David rurashca carpa huasipimi canga. Paica cashcata ruraj canata munaj mandajmi canga. Paica imatapish chaitataj ruranaihuan huañucujmi canga.

⁶Moabitacunataca jatun tucushca cashcatami uyashcanchij. Paicunaca c'ari c'ari tucushcacunami, jatun tucushcacunami, ñahui alzashcacunami. Imata rimacushcata mana entendishpa yallitaj jatun tucushcacunami. Paicuna llullashpalla chashna cashcaca mana caticungallachu.

⁷Chaimantami moabitacunaca caparishpa huacangacuna. Moabitacunaca caparishpami huacangacuna. Kir-haresetpi tiyaj uva tandata yuyarishpami aij nishpa huacangacuna. Yallitaj llaquichishcacunami cangacuna.

⁸Hesbonpi tiyaj uva chagracunaca lluchuta p'itishcami carca. Sibmapi tiyaj chagracunapish chashnallatajmi carca. Llajtacunata mandajcuna shamushpami, sumaj chagracunata sarurcacuna. Chai yura ramacunaca, Jazer pueblocamami rishca. Shitashca pambatapishmari chagrayashpa rishca. Chai yura ramacunaca mama cucha chaininijcamami rishca.

⁹Chaimantami Jazer huacacuj shina Sibnapi caj uva chagramantaca huacasha. Hesbón pueblolla, Eleale pueblolla, cancunamantapish ñuca huiquitami jichasha. Cancunapaj cozichanalla chagracunapi, cancunapaj uvacunata tandanalla chagracunapimi jatun macanacui tiyanga.

¹⁰Alli granota p'ucuj allpapi cushicuna, yallitaj cushicunataca ñami anchuchishca. Uva chagracunapipish ña mana cantangacunachu. Ña mana yallitaj cushicungacunachu. Vinota rurangapaj uvata sarunapi uvata sarujpish ña mana ashtahuan sarungachu. Uvata sarujcuna caparinaca ña mana ashtahuan tiyangachu.

¹¹Chaimantami moabcunamantaca ñuca huijsaca arpa cuerda shina chujchun. Kir-haresetmantapish ñuca shunguca chashnallatajmi chujchun.

¹²Moabitacuna ricurishpaca lomacunapi tiyaj altarcunapica shaicujtami mañangacuna. Paicunapaj dioscunapaj huasicunaman chayashpapish shaicujtami mañangacuna. Paicuna mañashcaca yangallami canga.

¹³Tucui chai shimicunami Moab llajta imalla tucunata Mandaj Dios huillachishcaca.

¹⁴Cunanca Mandaj Diosca cashnami nin: “Caimanta quimsa huatapica, Moab llajta sumaj cashcaca shujpi shujpi trabajaj runapaj punlla utca tucurij shinami utca chayamunga. Tucui chai llajtapi causaj achcacunandijmi tucui chingachinga. Mana huañushpa puchushcacunaca ashacunallami canga. Paicunaca uchillacuna, fuerza illajcunallami canga” ninmi.