Read Chimborazo Highland Quichua ISAÍAS 18 Bible Online

ISAÍAS 18 - Chimborazo Highland Quichua bible

ISAÍAS 18

¹Alascunahuan bullata ruraj llajtalla. Etiopía jatun yacucuna huashanijpi caj llajtalla.

²Mama cuchata rishpa huillachun huillajcunata cachajcunalla. Junco barcocunapi huillajcunata cachajcunalla. ¡Aij, imachari tucunguichij! Huillanaman callpacujcuna aicha cara achij nicuj jatun runacunapaj llajtaman richij. Paicunaca callarimanta pacha c'ari c'aricunami. Paicunaca fuerzasapa shujtaj llajtacunatapish quichucujllacunami. Chai llajtaca yacucuna muyunchishcami.

³Tucui cai pachapi causaj cancuna, allpa pachapi causajcuna, urcucunapi banderata shayachijta ricuranguichij. Trompetapi tocajta uyaranguichij.

⁴Mandaj Diosmari ñucamanca cashna nirca: “Ñucaca casijllami casha. Ñuca causacunmantami chapasha. Tamyashca q'uipa inti achijlla caj shinami casha. Cozicha punllapi rupachicujpi p'uyu shullayachij shinami casha.

⁵Uva chagraca manaraj cozicha punlla chayamujpimi boton tucushpa sisashpaca uvacuna ricurin. Chai uvacuna alli p'ucuchunca uchilla ramacunataca p'itinacunahuanmi p'itinga. Chai ramacunata shinallatajmi p'itishpa anchuchinga.

⁶Chai tucui ramacunataca urcucunapi tiyaj alasyuj animalcunapajmi saquingacuna. Allpapi tiyaj sacha animalcunapajmi saquingacuna. Chaipica pajarocunaca tucui usya punllacunatami micunata charingacuna. Sacha animalcunapish tucui tamya punllacunatami chaipi micunata charingacuna.

⁷Chai punllacunapica aicha cara achij nicuj jatun runacunaca Tucuita Mandaj Diosman cungapajmi apamungacuna. Paicunaca callarimanta pacha c'ari c'aricunami. Paicunaca fuerzasapa shujtaj llajtacunatapish quichucujllacunami. Chai llajtaca yacucuna muyunchishcami. Paicunaca tucuita Mandaj Jatun Diosman cungapajmi Sión urcuman apamungacuna” nircami.