Read Chimborazo Highland Quichua ISAÍAS 19 Bible Online

ISAÍAS 19 - Chimborazo Highland Quichua bible

ISAÍAS 19

¹Egipto llajta ima tucuna cashcataca cashnami huillachishca: Mandaj Diosca callpacuj p'uyupi tiyarishcami Egiptomanca yaicunga. Egiptopi tiyaj rurashcalla dioscunaca paipaj ñaupajpimi chujchungacuna. Egipciocunapish tucuicunami manchaihuan huañucungacuna.

²“Egipciocunataca paicunapurallataj macanacuchunmi jatarichigrini. Cada quiquinmi paicunapaj huauquillahuantaj macanacungacuna. Cada quiquinmi llajtapi causajcunallahuantaj macanacungacuna. Shuj puebloca caishuj pueblohuanmi macanacunga. Shuj llajtaca caishuj llajtahuanmi macanacungacuna.

³Egipciocunapurapica alli yuyaiyuj canaca mana tiyangachu. Paicuna imallata ruranata yuyarishcatapish chingachishami. Chaimi paicunaca paicunapaj rurashcalla dioscunata, paicunapaj brujocunata, huañushcacunahuan rimajcunata, adivinocunata tapungacuna.

⁴Egipciocunataca p'iña amopaj maquipimi churasha. Paicunataca mana llaquishpa llaquichij jatun mandajmi mandanga” ninmi Tucuita Mandaj Jatun Diosca.

⁵Mama cucha yacupish chaquirishpa ucuyangami. Jatun yacupish chaquirishpa tucuringami.

⁶Yacu chaquirijpi yacu larcacunapish ashnacujmi saquiringa. Callpacuj yacucunapish chaquirishpami catinga. Carrizocunapish, juncocunapish tucuimi chaquiringa.

⁷Jatun yacu c'uchupi tiyaj michina pambacunapish chaquiringami. Nilo yacu uripi tiyaj michinacunapish chaquiringami. Yacu uripi caj tarpushcacunapish chaquiringami. Tucuimi chingaringa, ña mana ashtahuan tiyangachu.

⁸Chalhuata japijcunapish llaquillami cangacuna. Fierro ipihuan chalhuata japijcunapish tucuicunami jatunta huacangacuna. Linchihuan chalhuata japishpa causajcunapish tucuicunami llaquihuan huañucungacuna.

⁹Alli linopi trabajajcunapish, ahuajcunapish musparishcacunami canga.

¹⁰Chalhuana tucui linchicunapish yangami lliquiringa. Chalhuacunata mirachina cuchacunata rurajcunapish, llaquillami causangacuna.

¹¹Zoanpi mandajcunaca upacunami. Chaica chashnatajmi. Yachaisapa cunajcuna Faraonman yuyaita cushcaca yangamanmari tigrashca. Chashna tucujpica, ¿ima shinataj Faraonmanca: “Ñucanchijca jatun yachajcunapaj huahua huahuacunami canchij. Ñucanchijca ñaupa jatun mandajcunapaj huahua huahuacunami canchij” ninguichigari?

¹²Cambaj yachaisapacunaca cunanca ¿maipitagari? Tucuita Mandaj Dios Egiptota ima shinalla llaquichina cashcata canman huillangapaj, canman yachaj chayachingapajca paicunaca ¿maipitagari?

¹³Zoán pueblota mandajcunaca upacunami tucushca. Menfis pueblota mandajcunaca umarishcamari tucushca. Egiptopajca paicunapaj ailluca callari rumicuna cashpapish egipciocunataca umashcamari.

¹⁴Mandaj Diosmari paicunapica muspachij espirituta churashca. Chaimantami egiptocunaca paicunapaj rurashcacunallapitaj chingarishca. Machashca runa shungu tigrashpa batsaj batsaj purij shinami puricuncuna.

¹⁵Uma tucushpapish, chupa tucushpapish, rama tucushpapish, junco tucushpapish Egiptopajca pi ima allita mana rurangachu.

¹⁶Chai punllapica egipciocunaca huarmicuna shinami cangacuna. Tucuita Mandaj Dios paicunata llaquichingapaj paipaj manchachij maquihuan jatarijpimi manchaihuan paipaj ñaupajpi chujchungacuna.

¹⁷Judá llajtaca Egiptopajca manchanami canga. Judá llajtapi causajcunata yuyarishpaca, tucuita Mandaj Dios paicunapaj llajtata imata rurasha nishcata yuyarishpami manchangacuna.

¹⁸Chai punllacunapica Egiptopica, pichca pueblocunapi causajcunami Canaán rimaita rimajcuna tiyanga. Paicunaca tucuita Mandaj Diospajtajmi canchij ningacunami. Chai pueblocunamanta shujca, Herez shutimi canga.

¹⁹Chai punllacunapica Egipto llajta chaupipica, Mandaj Diospajlla shuj altarmi tiyanga. Chashnallataj Israel llajtahuan, Egipto llajtahuan tupanacunpica Mandaj Diospaj shuj pircatami rurangacuna.

²⁰Chaicunami tucuita Mandaj Diostaca, Egiptopi causajcuna paipaj tucushcata ricuchij canga. Paicunaca paicunata llaquichicujpica Mandaj Diostami mañangacuna. Mandaj Diosca quishpichishpa llujshichichunmi shuj quishpichijta cachanga.

²¹Chai punllacunapica Mandaj Diosca egiptocunapajca Diostaj cashcatami rijsichirirca. Egiptocunapish Mandaj Diosca Diostaj cashcatami rijsircacuna. Animalcunatapish paiman cushpa huañuchingacunami, ima shujtaj allicunatapish cungacunami. Mandaj Diospaj imata rurana tucushpaca chaitataj pajtachingacunami.

²²Mandaj Diosca Egiptocunata chugrichingami. Chashna chugrichishpapish paillatajmi alliyachinga. Paicuna Mandaj Diosman cutirijpica, Mandaj Diospish llaquishpa alliyachingami.

²³Chai punllacunapica, Egiptomanta Asiriacamami shuj jatun ñan tiyanga. Asiriocunaca Egiptoman yaicungallacunami. Egipciocunapish Asiriaman yaicungallacunami. Egipciocunapish, Asiriocunapish Mandaj Diospajtaca tandallami rurangacuna.

²⁴Chai punllacunapica israelcunaca, egipciocunahuanpish, asiriocunahuanpish quimsami tucunga. Cai pachapi causajcuna israelcunamanta allicunata chasquichunmi chashna cangacuna.

²⁵Chai punllapica Tucuita Mandaj Diosca: “Egipciocunaca alli nishca ñucapajmi nishca cachun. Asiriocunaca ñuca maquihuan rurashcami nishca cachun. Israelcunaca ñuca agllashcacunami nishca cachun” nishpami paicunataca alli nishcacuna cachun ninga.