Read Chimborazo Highland Quichua ISAÍAS 2 Bible Online

ISAÍAS 2 - Chimborazo Highland Quichua bible

ISAÍAS 2

¹Amozpaj churi Isaiasca Judapish, Jerusalenpish ima tucuna cashcatami muscuipi shina ricurca.

²Shamuj punllacunapica, Mandaj Diospaj huasi shayacun urcuca sinchita shayachishca tucui urcucunapaj uma shinami canga. Tucui urcucunata yalli jatun urcumari nishpa jatunyachishcami canga. Tucui llajtacunami chai urcuman callpamungacuna.

³Achca llajtacuna shamushpami cashna ningacuna: “Shamuichij, Mandaj Diospaj urcuman huichiyashunchij. Jacobpaj Diospaj huasiman jacuchij. Paimi paipaj ñancunapi purinata yachachinga. Paipaj ñancunallapimi purishun. Mandaj Diospaj Mandashcaca Sionmantami llujshinga. Mandaj Diospaj shimica Jerusalenmantami llujshinga”.

⁴Llajtacunataca Mandaj Diosmi mandanga. Achca llajtacunatami rimashpa cazuchinga. Paicunapaj espadacunaca yapuna rejami tucunga. Paicunapaj lanzacunaca hocesmi tucunga. Caishuj llajtapi causajcunahuan, chaishuj llajtapi causajcunahuan macanacuica ña mana tiyangachu. Macanacuipaj yachachinapish, ña mana tiyangachu.

⁵Jacobpaj huahua huahuacuna shamuichigari. Mandaj Diospaj luzpi purishunchigari.

⁶Mandaj Dioslla, can agllashcacunataca saquishcanguimari. Jacobpaj huahua huahuacunataca saquishcanguimari. Paicunallatajmi inti llujshin llajtapi causajcuna apamushca ruranacunahuan junda. Filisteocuna shinamari brujocuna tucuncuna. Shujtaj llajtacunahuanmi imatapish rurashpa pajtachinacungapaj ari ninacuncuna.

⁷Paicunapaj llajtaca cullquihuan, curihuan jundamari. Mana yupai tucuipaj ima shujtaj sumaj charinacunahuanpish jundamari. Paicunapaj llajtaca caballocunapish jundamari, paicunapaj carrocunapish mana yupai tucuipajmari.

⁸Chai jahuamari, paicunapaj llajtaca rurashcalla dioscunahuan junda. Paicunapaj maquihuan rurashcalla dioscunapaj ñaupajpimi cungurincuna. Paicunapaj dedocunahuan rurashcacunapaj ñaupajpimi cumurincuna.

⁹Chai dioscunapaj ñaupajpimari cungurishcacuna. Yangamari tucushcacuna. Chaimanta paicunataca amataj perdonangui.

¹⁰Manchana Mandaj Diospaj ñaupajmantaca rumi ucupi miticuiyari. Achij nicuj Jatun Mandajpaj ñaupajmantaca, ñutu allpa ucupi miticuiyari.

¹¹Jatun tucushca ñahuicunaca cumurichishcami canga. Jatun tucushcacunaca pingachishcami canga. Chai punllapica, Mandaj Diosllami jatunyachishca canga.

¹²Tucuita Mandaj Dios llaquichina punllaca, atirishcacunata, jatun tucushcacunata, caimi jatun nishcacunata cumurichingapajmi shamunga.

¹³Libanopi tiyaj jatun cedro yuracunatapish, caimari yalli jatun nishcacunatapish, Basán llajta encina yuracunatapish yanganchingapajmi shamunga.

¹⁴Tucui jatun urcucunatapish, tucui jatun lomacunatapish,

¹⁵jatun torrecunatapish, pueblo muyundij sinchi pircacunatapish,

¹⁶Tarsis pueblopaj tucui barcocunatapish, tucuimanta yalli achca valij sumaj barcocunatapish yanganchingapajmi shamunga.

¹⁷Jatun tucushcacunaca cumurichishcami canga. Paicunapaj yuyaimanta jatunmi canchij nijcunaca cumurichishcami canga. Chai punllapica Mandaj Diosllami jatunyachishca canga.

¹⁸Rurashcalla dioscunataca, tucuitami anchuchinga.

¹⁹Allpapi causajcunata llaquichingapaj Mandaj Dios achij nicuj ricurijpica, paita manchashcamantaca peña jutcucunapimi yaicuringacuna. Allpa chaupirishcacunapimi satiringacuna.

²⁰Chai punllapica runacunaca paicuna adorangapaj cullquimanta, curimanta rurashca dioscunataca ucuchacunaman, murcielagocunamanmi shitangacuna.

²¹Allpapi causajcunata Mandaj Dios llaquichingapaj achij nicuj ricurijpica, paita manchashcamantami peña chijtarishcacunapi satiringacuna. Peña jutcucunapi yaicuringacuna.

²²Paicunapaj singaman samai llujshijllapi causaiyuj caj runacunapi shunguta churanataca saquichij. Paicuna jatun cashcallapi yuyaita churashpaca ¿imatataj ruranguichigari?