Read Chimborazo Highland Quichua ISAÍAS 26 Bible Online

ISAÍAS 26 - Chimborazo Highland Quichua bible

ISAÍAS 26

¹Chai punllaca Judá llajtapi cajcunaca cai cantotami cantangacuna: “Sinchi pueblotami charinchij. Taita Diosca quishpirinata churashpami muyundij pirca huashatapish ashtahuan sinchi pircata pircashca.

²Pungucunata pascaichij. Cashcata rurajcunami yaicunga. Chaitataj pajtachijcunallami yaicunga.

³Mandaj Dioslla, quiquinpi yuyaita churashpa chaitataj rurashpa catijtaca quiquinmi manataj pi cuyuchipaj sumaj causaipi huaquichingui. Quiquinpi shunguta churashcamantami chashna huaquichingui.

⁴Tucui causaipi Mandaj Diosllapi shunguta churaichij. Mandaj Jatun Diosca huiñai huiñaitami jatun pirca shina jarcanga.

⁵Jahuaman causacujcunataca paimari urmachirca. Jatun tucushca pueblotapish cumurichircami. Allpamanmi cumurichirca. Ñutu allpamanmi shitarca.

⁶Paicunaca paicuna llaquichicushcacuna sarushcami canga. Huajchacunapaj chaqui ucupimi canga”.

⁷Cashcata rurajpaj ñanca mana pandachu. Quiquinca ima pandata mana ruranguichu. Cashcata rurajpaj ñantaca llambuyachinguimi.

⁸Mandaj Dioslla, quiquinca cashcata ruraj ñanpishmi cangui. Mandaj Dioslla quiquinllatami shuyashcanchij. Quiquinpaj shutica quiquinpaj yuyaica ñucanchij alma munashcami.

⁹Tutapish ñuca almahuanmi quiquintaca munani. Ñucapi caj espíritu ñucapi causashca camaca cada tutamantami quiquinta utca mashcasha. Cai pachapi quiquin cashcata rurashpa mandajpimi, cai pachapi causajcunaca cashcata ruranaca ima cashcata yachangacuna.

¹⁰Yallitaj millaita rurajta paita llaquishpa mana imata rurajpica, cashcata ruraj canataca mana yachangachu. Cashcata rurajcunapaj llajtapi cashpapish millaita rurangallami. Mandaj Dios jatun mandaj cashcataca mana ricungachu.

¹¹Mandaj Dioslla, quiquinpaj maquica alzashcamari. Millaita rurajcunaca chaitaca mana ricunchu. Chashna cushpapish chaita paicuna ricushpaca can agllashcacunata ricushpa paicuna shina tucusha nicujcunaca pingai tucungacunami. Quiquinta p'iñajcunataca ninami tucuchinga.

¹²Mandaj Dioslla, quiquinmi ñucanchijmanca sumaj causaita cungui. Tucui imata ñucanchij rurajpipish quiquinmi rurachishcangui.

¹³Mandaj ñucanchij Dios, quiquin ñucanchijta jatun mandaj cajpipish shujtajcunapishmari ñucanchijta mandasha nincuna. Ashtahuanpish ñucanchijca quiquinpaj shutitami quiquinpi yuyarishun.

¹⁴Ña huañushcacunami, mana causangachu. Huañushcacunaca ña mana causaringachu. Paicunataca llaquichircanguimi, chingachircanguimi, paicunamanta yuyarinacunatapish tucuitami tucuchircangui.

¹⁵Mandaj Dioslla, cambajcunataca mirachircanguimi. Canmari paicunataca achcacunata rurarcangui. Israel llajta muyundij lindecunatapish mirachishpami quiquin jatun cashcataca ricuchircangui.

¹⁶Mandaj Dioslla, llaquihuan cashpami quiquinta mashcarcacuna. Quiquin llaquichijpimi yallitaj mañarcacuna.

¹⁷Chichu huarmica huachana pajtamujpi nanaihuan cashpami paipaj nanaicunahuan aij nin, caparin. Ñucanchijpish Mandaj Diospaj ñaupajpica chashnallatajmi tucushcanchij.

¹⁸Chichurcanchijmi, huachana nanaihuanmi carcanchij. Ashtahuanpish huairallatami huacharcanchij. Cai pachamanca quishpirinataca mana apamurcanchijchu. Cai pachapi causajcunataca mana huacharcanchijchu.

¹⁹Cambaj caj huañushcacunaca causaringacunami. Huañushca aichacunaca jataringacunami. Ñutu allpapi causacujcuna rijcharichij, cantaichij. Quiquin causachijpica huañushcacunaca, ñutu tamya shamujpi llullu granocuna huiñaj shinami allpamanta llujshingacuna. Allpaca paipi caj huañushcacunata tigrachingami.

²⁰Ñuca agllashcacunalla richij, cancunapaj huasiman yaicurichij. Pai alli tucungacama punguta huichcarishpa pungu huashapi ashacama miticuichij.

²¹Riquichij, Mandaj Diosca cai pachapi causajcunataca paita p'iñachishpa millaita rurashcamanta llaquichingapajmari, pai causacunmanta llujshigrin. Allpapish huañuchishpa paipi jichashca yahuartaca, ricuchingami. Huañushcacuna paipi tiyacujtapish ña mana ashtahuan pacangachu.