Read Chimborazo Highland Quichua ISAÍAS 29 Bible Online

ISAÍAS 29 - Chimborazo Highland Quichua bible

ISAÍAS 29

¹Ariel pueblolla, Ariel pueblolla, David causana pueblolla ¡aij imachari tucunga! Huatanta huatanta jatun fiestacunata ruracuichijllatagari.

²Ashtahuanpish ñucaca Ariel pueblotaca jatun llaquipimi churasha. Chaipica cushicui illangami. Llaquilla, huacailla canallami tiyanga. Cai puebloca ñucapajca, arielmi canga.

³Canta llaquichingapajmi cambaj muyundijta carpa huasicunata shayachishpa tiyarisha. Achca soldadocunahuanmi muyunchisha. Canta llaquichingapajca baluartecunatami shayachisha.

⁴Urmachishcami saquiringui. Allpa ucumantami rimangui. Can rimashcaca ñutu allpamantami uyaringa. Allpa ucumanta can rimashcaca aya rimashca shinallami uyaringa. Ñutu allpa ucumanta can rimashcaca chingajllami uyaringa.

⁵Canta p'iñaj achcacunaca ñutu allpata shina rurashcami saquiringa. Yallitaj achca c'ari c'aricunaca huairapi t'amu rij shinami chingaringa. Chaica mana yuyashcapimi ñapish chashna tucunga.

⁶C'ulun nishcacunahuan, allpa chujchushpa t'imburishcacunahuan, jatunta c'ulun nishcacunahuan, jatun acapanahuan, huairandij tamyahuan, tucuchij nina lunyacujhuan tucuita Mandaj Dios ricuj shamujpimi chashna canga.

⁷Tucui llajtapi causajcuna Ariel pueblopi causajcunahuan macanacujcunaca tuta dormicushpa, muscuipi ricushca shinallami chingaringacuna. Cai pueblopi causajcunahuan macanacushpa, muyundij sinchi pircata urmachishpa llaquichijcunami chashna chingaringacuna.

⁸Yaricaihuan cajca micucushcata muscushpaca, micucushcatatajmi yuyan. Ashtahuanpish chushaj huijsallatajmi rijcharin. Yacunaihuan caj yacuta ubyacushcata muscushpaca, yacuta ubyacushcatatajmi yuyan. Ashtahuanpish shaicushca yacunaillahuantajmi rijcharin. Tucui llajtapi causajcuna Sión urcupi causajcunahuan macanacujcunaca chashnallatajmi tucungacuna.

⁹¡Shayarichij, mancharichij. Ñahui mana ricuj shina caichij! Vinota mana ubyashca cashpapish machashca shina caichij. Sidrata mana ubyashca cashpapish batsaj nicuichij.

¹⁰Mandaj Diosllatajmi cancunapaj jahuapica dorminaita cuj espirituta tallirca. Chaimi cancunapaj profetacunapaj ñahuicunatapish huichcarca. Chaimi Dios huillachishcata cancunaman huillajcunatapish linsohuan umata pilluchirca.

¹¹Muscuipi shina Dios ricuchishpa huillachishcacunaca cancunapajca, quillcashca librota sellashcata cushca shinami. Rezanata yachajman librota cushpaca: “Cunanca caita rezai” nijpica, paica: “Sellashca cashcamanta mana rezai tucunichu” ningami.

¹²Rezanata mana yachajmanpish librota cushpaca: “Cunanca caita rezai” nijpica, paica: “Mana rezanata yachanichu” ningami.

¹³Chaimantami Jatun Diosca: “Cai gentecunaca ñucataca jahua shimillami yuyarincuna. Jahua shimillahuanmi ñucataca allimari cangui nincuna. Ashtahuanpish paicunapaj shunguca ñucamanta carupimari. Ñucata manchanchij nishpapish, gentecuna yachachishpa mandashcacunallatami rurancuna.

¹⁴Chaimanta cutinllatajmi jatun milagrohuan, mancharinahuan cai gentecunataca manchachisha. Chaimi yachai sapacunapaj yachaica chingaringa. Yuyai sapacuna entendij cashcapish mana entendijmi tucunga” ninmi.

¹⁵Paicuna mana allita ruranata yuyarinacushcata Mandaj Diosmanta pacangapaj rijcunalla ¡aij imachari tucungacuna! Paicunaca amsapi millaita rurashpami: “¿Pitaj ñucanchijtaca ricungari? ¿pitaj ñucanchijtaca yachangari?” nincuna.

¹⁶Millai yuyaiyujcuna. Allpamanta imatapish rurajca pai rurashca shinaca maitataj cangari. Mangaca maitataj paita rurajtaca: “Mana canchu rurarcangui” ningari. Mangaca maitataj paita rurajtaca: “Paica imata mana entendijchu” ningari.

¹⁷Caimanta asha punllacuna q'uipaca, Líbano urcuca alli granota p'ucuj allpamanmi tigranga. Alli granota p'ucuj allpaca sachacunallami ricuringa.

¹⁸Chai punllacunapica mana uyajcunapish, libropi rezashcataca uyangacunami. Ñahui mana ricujcunapaj ñahuica, amsa cajpipish, yallitaj amsa cajpipish ricungallami.

¹⁹Mana jatun tucushcacunaca Mandaj Diospi cushicungapajmi tigrangacuna. Tucuicunamanta yallitaj huajchacunapish, israelcunapaj jucha illaj Diospimi cushicungacuna.

²⁰Utca p'iñarijtaca tucuchishcami canga. Chanzata rurajcunapish tucuchishcami canga. Mana dormishpa millaita rurana yuyailla cajcunapish chingachishcami canga.

²¹Rimana yuyaita cushpa juchallichijcunapish chingachishcami canga. Pungu llujshinpi tiyaj juezcunata llaquichinata yuyarinacujcunapish chingachishcami canga. Cashcata ruraj cashcallamanta juchachishpa llaquichijcunapish chingachishcami canga.

²²Chaimantami Abrahamta quishpichij Mandaj Diosca, Jacobpaj huahua huahuacunataca cashna nin: “Cunanca Jacobca ña mana pingaichishcachu canga. Paipaj ñahuipish ña mana huajlliringachu.

²³Paipaj huahua huahuacunaca paicunapaj chaupipi ñuca maquihuan rurashcata ricushpaca, ñuca shutitami jucha illaj ningacuna. Jacobpaj jucha illaj Diostami jucha illaj ningacuna. Israelcunapaj Taita Diostami manchangacuna.

²⁴Musparishcacunaca alli yuyaiyuj canatami yachangacuna. Huashalla parlajcunaca yachachishcata chasquishpa cazungacunami”.