Read Chimborazo Highland Quichua ISAÍAS 3 Bible Online

ISAÍAS 3 - Chimborazo Highland Quichua bible

ISAÍAS 3

¹Tucuita Mandaj Jatun Diosca Jerusalenpi, Judapi allicunata cujta, tucuita rurai tucujta anchuchingami. Micunatapish, anchuchingami. Yacutapish anchuchingami.

²C'ari c'ari runatapish, alli macanacuj runatapish, jueztapish, profetatapish, adivinotapish, cunaj yuyajtapish,

³pichca chunga soldadocunata mandajtapish, alli nishca runatapish, cunajtapish, imatapish ruranata yachajtapish, alli rimanata yachajtapish anchuchigrinmi.

⁴Q'uipa huiñaicunallatami paicunata mandaj cachun churasha. Huambracunallami paicunata mandajcuna canga.

⁵Cancunapurapica yallitaj jatun llaquimi tiyanga. Caishuj chaishujmi llaquichinacunga. C'uchullapi causajcunahuanmi llaquichinacunga. Q'uipa huiñaicunapish yuyajcunata llaquichingapajmi jataringacuna. Yanga runacunami alli nishca runacunata llaquichingapaj jataringacuna.

⁶Chashna yallitaj jatun llaqui cajpimi, paipaj yayapaj huasipi maijan shujtajta maquipi japishpaca: Canca churanata charinguimi. Can ñucanchijta jatun mandaj tucui. Cai llajta jatun llaqui tucushpa urmashcataca can allichi ninga.

⁷Shina nijpi chai llaqui punllaca chai runaca: “Ñucaca chai llaquicunataca imata mana rurai tucushachu. Ñuca huasipipish micunapish mana tiyanchu, churanapish mana tiyanchu. Ñucataca jatun mandaj cachunca ama churaichijchu” ningami.

⁸Jerusalenca ñuturishcami saquirishca. Judaca urmashcamari. Paicunapaj c'alluhuan, paicunapaj rurashcacunahuan, Mandaj Diosta p'iñachishcamanta, Mandaj Dios jatun mandaj cashcata yanganchishcamantami chashna tucushca.

⁹Paicunapaj ñahuillatajmi paicuna mana alli cashcataca ricuchin. Paicunaca Sodomacuna shinallatajmi juchallishcatapish mana pingashpa huillanllacuna. ¡Aij paicunapaj causailla! Paicunapaj llaquipajllatajmi montonacuncuna.

¹⁰Cashcata rurajtaca tucui imapipish allimi ringui ni. Quiquin maquihuan rurashcatami micunga.

¹¹¡Aij, yallitaj millaita rurajlla! Tucui imapipish llaquicunallahuanmi ringa. Paicunapaj quiquin maquihuan ima shina rurashca shinallatajmi pagashca canga.

¹²Ñuca agllashcacunata llaquichijcunaca huambracunallamari. Ñuca agllashcacunata mandajcunaca huarmicunallamari. Ñuca agllashcacunalla cancunataca pushajcunallatajmari umancuna. Mana alli ñantamari pushancuna.

¹³Mandaj Diosca imalla rurashcata tapungapajmi ña shayacun. Pai agllashcacuna ima shinalla cashcata ricuchishpami llaquichigrin.

¹⁴Mandaj Diosca pai agllashcacunata cunaj yuyajcunata, jatun mandajcunata, ima shina paicuna rurashcata ricuchishpa llaquichingapajmari shamugrin. Cancunaca uva chagracunatamari millpurcanguichij. Huajchacunata quichushcacunapish, cancunapaj huasicunapimari tiyacun.

¹⁵Ñuca agllashcacunataca ¿ima nishpataj sarushpa ñuturcanguichij? Huajchacunataca ima nishpataj ñahuipi sarushpa chugrichircanguichij ninmi. Tucuita Mandaj Jatun Diosca.

¹⁶Mandaj Diosca cashnapishmi nin: “Sionpi causaj huarmicunaca jatun tucushcacunami. Uma alzashca purijcunami. Mana pingashpa purijcunami. Bailashpa shina purijcunami. Chaquicunapi churarishcacunahuan ch'ilin nichishpa purijcunami” ninmi.

¹⁷Chaimantami Jatun Diosca, Sionpaj ushushicunataca, lluchu umata saquinga. Mandaj Diosca paicunapaj pinganayaj aichatapish, lluchullatami ruranga.

¹⁸Chai punllapica, Jatun Diosca chaquipi churarishca sumajcunatapish, umapi churarishca sumajcunatapish, ajchata charichina lunetacunatapish,

¹⁹huallcacunatapish, zarcillocunatapish brazaletecunatapish,

²⁰umapi churashca linsocunatapish, changa uricunapi aparina sumajcunatapish, ajchata partina ñajchacunatapish, mishquijllata ashnaj aceitecunahuan aparishca uchijlla botellacunatapish, zarcillocunatapish,

²¹sortijascunatapish, singapi aparina sumajcunatapish,

²²sumaj churanacunatapish, jahuata p'achallinacunatapish, ch'ungurina sumaj linsocunatapish, aisana muchilacunatapish,

²³espejocunatapish, sumaj lino churanacunatapish, umapi churana linsocunatapish, umata huatarinacunatapishmi anchuchinga.

²⁴Mishquijllata ashnacujhuan churarishca canapaj randica, millananata ashnacujmi tucungacuna. Chumbipaj randica, huascahuanmi chumbilliringacuna. Sumajta allichirishca ajcha canapaj randica, ajcha illaj lluchu umami tucungacuna. Sumaj churanacunata churarishca canapaj randica, cañamazuta churarishcami cangacuna. Alaja sumaj canapaj randica, ninapi rupashca alliyacuj shinami cangacuna.

²⁵Cancunapaj c'aricunaca, espadapimi huañungacuna. Fuerzasapacunaca jatun macanacuipimi huañungacuna.

²⁶Paicunapaj pungucunapish llaquillami cangacuna. Llaquilla cashcata ricuchij churanatami churaringacuna. Puebloca shitashcami saquiringa. Allpa pamballapimi tiyaringacuna.