Read Chimborazo Highland Quichua ISAÍAS 32 Bible Online

ISAÍAS 32 - Chimborazo Highland Quichua bible

ISAÍAS 32

¹Riqui, shuj mandajmi cashcata rurashpa mandagrin. Pai churashca mandajcunapish cashcata rurashpami mandanga.

²Chai runaca huairata miticuna shinami canga. Jatun acapanamanta paca tucuna shinami canga. Chaquishca pambacunapi yacu llujshicuj shinami canga. Yallitaj rupai punllapi llandurina rumi urcu shinami canga.

³Paita ricujcunapaj ñahuicunaca, mana amsayangachu. Paita uyajcunapaj rinrincunaca allimi uyaracungacuna.

⁴Rumi shungucunapish, yachangapajtajmi entendingacuna. Mana rimai tucuj c'allucunapish entendinallata utca rimajcunami canga.

⁵Millai runaca alli nishcaca manataj cangachu. Umacujlla runaca alli nishcaca manataj cangachu.

⁶Millai runaca millaillatami riman. Paipaj shungupica millaita ruranallatami yuyarin. Mandaj Diosta yanganchishpa c'amingapajmi chashna millai yuyailla tucun. Yaricaihuan cajmanpish ama cungapaj, yacunaihuan cajmanpish yacuta ama cungapajmi chashna tucun.

⁷Umacujlla runapaj macanacunacunaca umana yuyaihuan sumaj shimicunata rimarij tucushpa, llaquichingapaj huashalla yuyarishpa, millaicunallata yuyarinami. Mitsarinata mana yachajcunata llulla shimicunahuan mishangapajmi chashna tucun. Mandajcunahuan tucushpa huajchacunata llaquichingapajmi chashna tucun.

⁸Ashtahuanpish alli yuyaiyuj runaca alli yuyaihuan allicunallatami yuyarin. Paica alli yuyaicunallata yuyarij cashcamantami jatunyachishca canga.

⁹¡Imata ruranata mana yuyarij huarmicuna jatarichij! ¡Ima llaqui shamunata mana yuyashpa causacuj huarmicuna, ñuca cunashcata chasquichij!

¹⁰Ima llaqui tucunata mana yuyashpa causacuj huarmicuna, caimanta huata asha punllacuna q'uipaca jatun mancharinami tiyanga. Uvata cozichana mana tiyashcamanta, ima shujtaj granocunata cozichana mana tiyashcamantami chashna manchai tiyanga.

¹¹Ima ruranata mana yuyarij, ima llaqui japinata mana yuyashpa causacuj huarmicuna chujchuichigari, aij nishpa huacaichigari. Sumaj churanacunata llujshichishpa, cañamazuhuan chumbillirichigari.

¹²Llaqui punlla chayamujpica, sumaj chagracuna, alli uva chagracuna tiyashcata yuyarishpami, shungupi huajtarishpa huacangacuna.

¹³Ñuca agllashcacunapaj llajtapica casha yuracuna, casha q'uihuacunallami huiñanga. Cushicuna huasicunapipish, cushicuna pueblocunapipish tucuipimi chaicunalla huiñanga.

¹⁴Mandajcuna tiyana huasicunapish shitashcami saquiringa. Pueblopi gentecuna bullacushcapish ña mana uyaringachu. Torrecunapish, muyundij pircacunapish achca huatacunata shitashca jutcucunallami canga. Chaicunapica sacha burrocuna causana, huagracunapaj corralmi canga.

¹⁵Jahua pachamanta paipaj Espirituta Dios cachashpa, ñucanchijpi churangacamami chashna canga. Espíritu ñucanchijpi cajpica shitashca pambacunapish, alli granota p'ucuj allpacunami tucunga. Alli granota p'ucuj allpacarin yallitaj alli granota p'ucujmi tucunga.

¹⁶Shitashca pambapica cashcata rurashpa mandanami tiyanga. Alli chagracunapica cashcata ruranami tiyanga.

¹⁷Cashcata ruraj mandaj mandashcamantami sumaj causai tiyanga. Cashcata rurashpa mandacujpimari samarinapish, ima manchai illajlla canapish huiñaita canga.

¹⁸Ñuca agllashcacunaca ima llaqui mana tiyan llajtapimi causangacuna. Pi mana cuyuchipaj llajtapi caj huasicunapimi causangacuna.

¹⁹Urcucunata rundujpica, pueblopi causajcunaca tucuimi cumuringa.

²⁰¡Yacu uricunapi tarpushpa causajcuna huagracunatapish, burrocunatapish cacharishpa charijcuna cushicuichij!