Read Chimborazo Highland Quichua ISAÍAS 33 Bible Online

ISAÍAS 33 - Chimborazo Highland Quichua bible

ISAÍAS 33

¹¡Aij, pitapish quichuj runalla, cantaca nunca pi manaraj quichunchu! Aij, huashalla llaquichij runalla cantaca pi manaraj huashalla llaquichinchu. Shujtajcunata quichunata can ña tucui tucuchijpica, cantapish tucui quichushcami cangui. Huashalla llaquichishpa tucuchijpica canpish huashalla llaquichishcami cangui.

²Mandaj Dioslla, ñucanchijta llaquihuayari. Ñucanchijca canllatami shuyanchij. Tutamantamanca paicunapaj rigra canguiyari. Ñucanchij llaqui punllacunapipish quishpichij canguiyari.

³Quiquin c'ulun nishpa uyarijpica, gentecunaca miticushpami callparcacuna. Can jatarijpica llajtacunapi causajcunaca caita chaitami rircacuna.

⁴Paicuna quichushcacunataca oruga c'urucuna shinami tandangacuna. Langostacuna shujpi imata tucuchishpa shujman huaica tiyarigrij shinami paicunapaj jahuaman ringacuna.

⁵Jahua pachapi causaj Mandaj Diosca jatunyachishcami canga. Paimi Sionpi causajcunamanca ima mana pandata, cashcata ruraj canata jundachin.

⁶Mandaj Dios mandacui punllacunapica yachaipish, alli yuyaipish, quishpirinapish yallitajmi canga. Pi mana cuyuchipajmi canga. Mandaj Diosta manchanami tucui charishcacunata huaquichishca shina canga.

⁷Riquichij, jatun mandajpaj randi parlanacujcunaca canllamanmi caparingacuna. Ama macanacungapaj ari ninacuchun cachashcacunaca jatuntami huacangacuna.

⁸Rumicunahuan allichishca ñancunaca shitashcamari saquirin. Chai ñanta purijcunapish ña mana purincunachu. Ari ninacushcatamari p'aquishcacuna. Pueblocunatami p'iñarcacuna. Gentecunataca yangapimi churarcacuna.

⁹Allpaca llaquilla ungushcamari. Líbano urcu sachaca p'itishcamari chaquirishcamari pingaimi tucushca. Sarón llajtaca shitashca pambamari tucushca. Basán urcupish, Carmelo urcupish chaspishcamari saquirishca.

¹⁰Cunantajca jatarigrinimi, cunantajca alli nishcami casha, cunantajca jatunyachishcami casha ninmi Mandaj Diosca.

¹¹Cancunaca chaquishca p'angacunatami chichu canguichij. Rastrojo ujshallatami huachanguichij. Cancunamanta llujshishca ninallatajmi cancunataca rupachishpa tucuchinga.

¹²Gentecunaca rupashca cal shinallami saquiringa. P'itishca cashacuna shinami rupachishca canga.

¹³Caru llajtacunapi causajcunapish, ñuca imalla rurashcacunata uyaichij. Ñuca c'uchullapi cajcunaca ñuca tucuita rurai tucuj cashcata rijsichigari ninmi.

¹⁴Juchayujcunami Sionpica mancharircacuna. Mishqui shimi jayaj shungucunataca manchaimi japirca. Chaimi paicunaca: ¿“Ñucanchijpuramanta maijantaj tucuchij ninapica causai tucungari? ¿Ñucanchijpuramanta maijantaj huiñaita mana huañuj ninapica causai tucungari?” nincunami.

¹⁵Cashcata rurana ñanpi purij, ima pandata mana rimaj, quichushpa charijyanata p'iñaj, huashalla imapaj camarisha nijpi mana japishpa maquita chaspij, pita huañuchigringapaj inquitajcunata rinrinta taparishpa mana uyaj, millaita ama ricungapaj ñahuita taparijmi,

¹⁶jahua pachapica causanga. Paicuna miticunaca muyundijta yacu rumihuan pircashcami. Paicunapajca chaipica micunapish, yacupish mana illangachu.

¹⁷Jatun mandajtaca cancunapaj ñahuihuantajmi paipaj sumaj achij nicujpi tiyacujta ricunguichij. Shitarishca carupi caj cancunapaj allpatamari cutin ricunguichij.

¹⁸Cambaj shungupica llaquita apaj cashcata yuyarishpa mancharishpami: “Quillcajca ¿maipitajchu imamí? Tributota pezashpa japijca ¿maipitajchu imamí? Torrecunata ricushpa quillcajca ¿maipitajchu imamí?” ninguimi.

¹⁹Mana llaquij jatun tucushcacunataca ña mana ashtahuan ricunguichijchu. Mana entendipajta rimaj gentecunataca ña mana ashtahuan ricunguichijchu. Pipish mana entendipajta rimajcunataca ña mana ashtahuan ricunguichijchu.

²⁰Ashtahuanpish jatun fiestacunata rurana Sionpi caj pueblota ricui. Cancunapaj ñahuica casijlla causana Jerusalén pueblotami ricunga. Chai carpa huasica pi mana pascashcami canga. Chaipaj ishtacacunatapish pi mana llujshichishcami canga. Carpa huasita huatashca huascacunatapish pi mana p'itishcami canga.

²¹Chaipica Tucuita Rurai tucuj Mandaj Diosmari ñucanchijpaj allicunallata ruracunga. Larca yacucuna, jatun yacucunami tiyanga. Chaicunaca anchomi canga. Chaitaca canoacunapish mana puringachu, jatun barcocunapish mana puringachu.

²²Mandaj Diosmi ñucanchij juezca. Paimari ñucanchijta mandanacunata rurajca. Mandaj Diosca ñucanchij Jatun Mandajmari. Paillatajmari ñucanchijtaca quishpichinga.

²³Cambaj huascacunaca cacharirircami. Barcopaj jatun caspitaca ña mana chari tucurcachu. Barcopaj vela nishca linsotapish ña mana chutai tucurcachu. Chashna tucujpica cancuna imallata quichushcacunataca achcacunami chaupinacungacuna. Cojocuna camami cancuna quichushcacunataca quichushpa apangacuna.

²⁴Caipi causajcunaca: “Ungushcami cani” nishpa pi mana ningacunachu. Cai pueblopi causajcunaca tucuicunami juchacunata Mandaj Dios perdonashca cangacuna.