Read Chimborazo Highland Quichua ISAÍAS 35 Bible Online

ISAÍAS 35 - Chimborazo Highland Quichua bible

ISAÍAS 35

¹Shitashca pambacunapish, chaquishca pambacunapish cushicungacunami. Shitashca pambapish cushicungami. Rosas shinami sisanga.

²Pamba jundatami sisanga. Cushicungami, jatunta cushicushpami cantanga. Líbano urcu sumaj canatami paipi churanga. Carmelo urcu, Sarón urcu sumaj canatami paipi churanga. Paicunaca Mandaj Dios jatun cashcatami ricungacuna. Ñucanchij Taita Dios achij nicuj cashcatami ricungacuna.

³¡Shaicushca maquicunata sinchiyachichij. Chujchucuj sanpicunata sinchiyachichij!

⁴Manchacuj shungucunataca: “¡Ama manchashpa c'ari c'ari caichijlla! Riquichij cancunapaj Diosca paicuna ima shina cashca shinallataj llaquichingapajmi shamucun. Diosca paitaj shamushpami cancunataca quishpichinga” nichigari.

⁵Ñahui mana ricujcunapaj ñahuicunatapish pascashcami canga. Mana uyajcunapaj rinrincunatapish pascashcami canga.

⁶Cojocunapish taruga shinami saltacungacuna. Mana rimajpaj c'allupish cantacungami. Shitashca pambacunapi allashpami yacuta llujshichinga. Shitashca pambapimari yacucuna callpacunga.

⁷Chaquishca pambacunapipish yacu cuchacunami tucunga. Chaquishca pambacunapipish yacucuna t'imburishpa llujshicujmi canga. Chacalcuna causana jutcucunapipish, paicuna miticuna jutcucunapipish juncocuna, totoracunami huiñanga.

⁸Chaipica rumicunahuan allichishca ñanmi tiyanga. Chai ñanca: “Jucha illaj Ñan” nishcami canga. Mapacunaca chai ñantaca mana puringacunachu. Ashtahuanpish Taita Diostajmi paicunahuan canga. Maijanpish chai ñanpi puricujca imata mana jahualla yachai tucuipaj cashpapish mana pandaringachu.

⁹Chaipica leonpish mana tiyangachu. Manchanana animalcunapish chai ñantaca mana huichiyangacunachu. Quishpichishcacunalla purichunmi chai ñanpica, chai animalcunaca mana tupanga.

¹⁰Mandaj Dios quishpichishcacunaca Sionmanca cushicushpami tigrangacuna. Paicunapaj uma jahuapica manataj tucurij cushicuimi tiyanga. Paicuna cushicuihuan yallitaj cushicuihuan cajpica llaquipish, aij nicunapish miticushpami ringa.