Read Chimborazo Highland Quichua ISAÍAS 41 Bible Online

ISAÍAS 41 - Chimborazo Highland Quichua bible

ISAÍAS 41

¹“Mama cucha c'uchupi caj llajtacuna ñucata uyaichij: Tucuicuna fuerzarichigari. C'uchuyamuichigari, rimaichigari. Imalla rurashcacunataca ch'imbapura tiyarishpa, ricuchishpa parlanacushunchigari.

²Inti llujshin ladomanta caj cashcata rurajtaca ¿pitaj rijchachircari? Imapipish mishacuchunllaca ¿pitaj cayarcari? Llajtacunatapish paipaj ñaupajpimi churarca. Jatun mandajcunatapish paipaj ucupi cachunmi churarca. Paipaj espadahuanca ñutu allpata shina rurachun, paipaj arcohuanca ujshata shina urata janajta cachachunmi churarca.

³Pai mana yaicushca llajtacunata catishpa llaquichishpapish pi mana ima ni tucushcami llaquichishpa catirca.

⁴¿Caitaca pitaj rurarcari? ¿Pitaj chashna rurashca cangari? Callarimanta huahua huahua mirarichunca ¿pitaj churarcari? Mandaj Dios ñucaca callarimantapachami cani. Tucuringacamami ñucallataj casha” ninmi.

⁵Mama cucha c'uchupi caj llajtacunaca ricurcacunami, mancharircacunami. Tucui cai pachapi tiyaj llajtacunapi causajcunami mancharircacuna. Tucuicunami tandanacushpa shamurcacuna.

⁶Cada quiquinmi paipaj c'uchullapi causajtapish ayudan. Paipaj huauquitapish: “C'ari, c'ari cai” ninmi.

⁷Carpinteroca cullquimanta imatapish rurajmanmi alli yuyaita cun. Martillohuan tacashpa llambujllata rurajca yunquepi fierrocunata tacajtami: “Cai fierroca allimari” nishpa alli yuyaita cun. Ama cuyurichunca clavocunahuan tacashpami sinchita ruran.

⁸“Israelcunalla cancunaca ñucapajta rurajcunamari canguichij. Jacob cantaca ñucahuan alli apanacuj Abrahampaj huahua huahuapuramantamari agllarcani.

⁹Cantaca tucui cai pachapi tiyaj llajtacunapuramantami japircani. Cantaca caru llajtacunamanta cayashpami: “Canca ñucapajta rurajmi cangui” nircani. Cantaca agllarcanimi. Cantaca mana shitarcanichu.

¹⁰Ñuca canhuan cashcamanta ama manchaichu, ama shaicurichu. Ñucami canman fuerzata cuj Taita Dios cani. Cantaca ayudacushallami. Ñuca alli maquipi cashcata rurajhuanmi cantaca charirasha.

¹¹Riqui, tucui canta p'iñajcunaca pingachishcami cangacuna, muspachishcami cangacuna. Canhuan macanacushun nicujcunaca mana tiyashca shinami tucungacuna. Chingaringacunami.

¹²Canhuan macanacushun nicujcunata mashcashpapish, mana japinguichu. Canhuan macanacushun nicujcunaca mana tiyashca shina ima mana saquiringachu.

¹³Mandaj Dios ñuca cambaj Taita Dios cashcamanta cambaj alli maquipi charishpa pushaj cashcamanta: Ama manchaichu, ñucami cantaca ayudasha” ninmi.

¹⁴Jacobpaj c'uritucuna ama manchaichijchu. Israelcuna ashalla cashpapish cancunaca ama manchaichijchu. Ñucami cancunata ayudaj cani ninmi Mandaj Diosca. Israelcunapaj jucha illaj Diosmi cancunata Quishpichijca.

¹⁵Riqui, ñucami cantaca trillana fierro shina cachun rurarcani. Trillana mushuj fierrota quirucunahuan jundatami rurarcani. Cancunami urcucuna shinataca trillashpa ñutunguichij. Lomacuna shinataca t'amu shina tucungacamami ñutunguichij.

¹⁶Chaicunataca aventanguichijmi, huairami apanga. Acapanami caita chaita apanga. Ashtahuanpish canca Mandaj Diospimi jatunta cushicungui. Israelcunapaj jucha illaj Diospimi sumajyaringui.

¹⁷Llaquihuan cajcunapish, ima illajlla cajcunapish yacutami mashcancuna. Ashtahuanpish mana japincunachu. Paicunapaj c'alluca yacunaihuan chaquishcami. Mandaj Dios ñucami paicuna mañashcataca uyasha. Israelcunapaj Dios ñucaca paicunataca mana saquishachu.

¹⁸Lomacunapica jatun yacutami llujshichisha. Pugru pambacunapica t'imburishpa llujshicuj yacutami llujshichisha. Shitashca pambacunapica yacu cuchacunatami rurasha. Chaquishca allpacunapica yacutami pajchachisha.

¹⁹Shitashca pambacunapica cedro, acacia, arrayán olivo yuracunatami huiñachisha. Chaquishca allpapica ciprés, olmos, boje yuracunatami chagru huiñachisha.

²⁰Israelcunapaj jucha illaj Dios rurashcata ricuchun, rijsichunmi chashna rurarcani. Mandaj Dios paipaj maquihuan chashna rurashcata tucuicuna mancharinacuchun, entendichunmi chashna rurarcani ninmi.

²¹Mandaj Diosca rurashcalla dioscunataca: “Cancuna imalla rurashcata ricuchichigari” ninmi. “Jacobpaj Jatun Mandajca cancuna imalla rurashca chashnataj cashcataca alli ricuchichigari” ninmi.

²²Q'uipa punllacunapi imalla tucunata c'uchuyamushpa huillaichigari. Ima shinalla cashcata ñucanchij shungupi charingapaj callarimantapacha imalla tucushcata huillaichigari. Tucuri punllapi imalla tucuna cashcatapish yachangapaj huillaichigari. Q'uipa punllacuna imalla tucuna cashcatapish alli entendichichigari.

²³Cancuna diostaj cashcata ñucanchij yachangapajca q'uipa punllacuna imalla tucuna cashcata huillaichigari. Q'uipa punllacunapi imalla tucuna cashcata yachashpa, mancharishpa parlanacungapaj alli cachunpish, mana alli cachunpish imallatapish ruraichigari.

²⁴Riquichij, cancunaca ima mana canguichijchu. Cancuna rurashcacunapish yangallami. Cancunata agllajpish millananami.

²⁵Janaj ladoman cajtami cayarcani. Inti llujshin ladomanta shamushpami, ñuca shutipi mañanga. Paica mandajcunataca lodota shinami sarunga. Mangata ruraj runa, lodota saruj shinami sarunga.

²⁶Caita ñucanchij yachaj chayachunca ¿pitaj callarimanta pacha huillarcari? ¿Mana cashpaca manaraj ima tucujpichu imata huillarcanguichij? Huillashca cajpica: “Tucuitatajmi huillashca” ninchijmanmi. Cancunapuramantaca chashnataj tucuna cashcataca maijan mana huillashcanguichijchu. Chaica chashnatajmi. Ari, cancunapuramantaca chashnataj tucuna cashcataca maijan mana yachachishcanguichijchu. Cancuna huillashcata uyajcunapish pi mana tiyanchu. Chaica chashnatajmi.

²⁷Ñucamari caicunataca Siónpi causajcunamanca, callarimantapacha tucuita huillarcani. Jerusalenpi causajcunapajmanca, cushicunata huillachunmi shuj huillajta cachasha.

²⁸Ricurcanimi pi mana tiyarcachu. Tucui caicunamantami tapurcani. Ashtahuanpish paicunapuramanta cunajcunaca pi mana tiyarcachu. Tapurcanimi, ashtahuanpish pi mana rimarcachu.

²⁹Riqui, tucuicunami yangallacuna. Paicuna rurashcapish ima mana tiyanchu. Imamanpish rijchaj paicunapaj rurashcalla dioscunaca, huaira shina yangallami.