Read Chimborazo Highland Quichua ISAÍAS 44 Bible Online

ISAÍAS 44 - Chimborazo Highland Quichua bible

ISAÍAS 44

¹Cunanca ñucapajta ruraj Jacob uyaiyari. Ñuca agllashca Israel uyaiyari.

²Mamapaj huijsamantapacha canta callarichij, canta ruraj, Mandaj Diosca cashnami nin: Ñucapajta ruraj Jacob ama manchaichu. Jesurún canpish ñuca agllashcamari cangui. Ñucami cantaca ayudasha.

³Chaquishca pambacunapica yacu callpacujtami rurasha. Chaquishca allpacunataca jatun yacumi callpacunga. Cambaj huahua huahuacunapica ñuca Espiritutami tallisha. Cambaj huahua huahuacunapica allicunatami tallisha.

⁴Paicunaca q'uihua chaupicunapimi huiñanga. Yacu uripi sauce yuracuna huiñaj shinami huiñanga.

⁵Paicunaca shujca: “Ñucaca Mandaj Diospajmi cani” ningami. Caishujca: “Jacobpajmi cani” ningami. Chaishujca paipaj maquihuan quillcashpami, Mandaj Diospajmi cani ninga. “Israel apellidomi canchij” ningacunami.

⁶Israelcunata Jatun Mandajca, israelcunata quishpichijca, tucuita Mandaj Diosca cashnami nin: “Callarichijpish ñucami cani, tucurichijpish ñucami cani. Shujtaj Diosca mana tiyanchu.

⁷Q'uipa punllacunapi imalla tucunata maijan huillaj tiyashpaca, ima shinami ñuca ñaupamanta pacha ima shinalla cashcata callarishpa q'uipa punllacuna ima tucunacama callarishpa huillani. Chai shinallataj paipish tucuita callarishpa ñuca ñaupajpi ricuchishpa huillachunyari.

⁸Ama manchaichijchu, ama chujchuichijchu. Imalla tucuna cashcataca ¿manachu cancunamanca ñaupamantapacha ña huillarcani? Chaitaca cancunallataj allimi yachanguichij. ¡Shujtaj Diosca mana tiyanchu, ñucallami cani! ¡Shujtaj jatun rumica mana tiyanchu, pita mana ricushcanichu!

⁹Imamanpish rijchaj rurashcalla dioscunata labrashpa rurajcunaca ima cashcatapish mana yachajcunami. Paicuna sumajta rurashca dioscunaca imapaj mana valinchu. Rurajcunallataj musparinapajllami. Rurashcalla dioscunaca mana ricuj cashcata mana entendij cashcataca rurajcunallatajmi alli yachan.

¹⁰Rurashcalla dioscunata imamanpish rijchaj dioscunata rurajcunaca pipaj ima allipaj mana rurancunachu.

¹¹Tucui chai dioscunata catijcunaca, pingachishcami cangacuna. Chai dioscunata rurajcunapish huañujlla runacunallami. Tucui paicunami tandanacushpa, Taita Diospaj ñaupajpi ricurigringacuna. Chaipica manchaihuan upayangacunami, pingai tucungacunami.

¹²Herreroca fierrota ninapi rupachishpa tenazahuan japishpa martillohuan tacashpami allichin. Chaitaca paipaj maquihuan tucui fuerzahuanmi ruran. Chai q'uipaca yaricachishpa fuerza illajmi tucun. Yacuta mana ubyashpaca shaicushpa tontiarinllami.

¹³Carpinteroca caspi jahuapi reglata churashpami, lapizhuan señalashpa cepillohuan llambuyachishpa, compas-huan señalashpa runaman rijchajta ruran. Paipaj huasipi charingapajmi, runaman rijchaj sumajta ruran.

¹⁴Achca yuracuna chaupipi huiñashca cedro yurata, ciprés yurata, encina yuratami urmachishpa apan. Mana cashpaca tamyahuan huiñachun pino yuratami tarpun.

¹⁵Chai yura caspicunataca rupachinmi. Chai caspicunamanta ashataca rupachishpa cununapajmi apan. Huaquincunataca hornopi rupachishpami, tandata cusan. Maijancunahuanca diosta ruranchij nishpami adoran. Rurashcalla diosta rurashpami chai ñaupajpi cungurin.

¹⁶Asha yantata rupachishpaca chai jahuapi aichata cusashpami, mana nijta micun. Chaipi ña cunushpaca: “Aij, cunantajca ninapi cununitajmari” ninmi.

¹⁷Puchushcahuanca diosta rurani nishpami, chai ñaupajpi cungurishpa adorashpa cashna nin: Quishpichihuai canmari ñuca dios cangui nishpami rogarin.

¹⁸Chaicunaca imata ruracushcata mana yachanchu. Mana entendincunachu. Ama ricungapaj ñahuicuna huichcashca cashpa, ama entendingapaj shungu huichcashca cashpami, chaicunata ruran.

¹⁹Imata ruracushcata mana entendinchu. Ima cashcata mana yachanchu. Ima cashcata mana entendishpami: “Ashacunataca rupachircanimari, chai jahuapica tandata, aichata cusashpami micurcani mana nirin. Puchushca ashahuanca millanana diostami rurashcani. Jatun yuramanta caspi ñaupajllapimari cunguricuni” nishpapish mana yuyarinchu.

²⁰Chashna rurashpaca ushpallatami micun. Paipaj shungu umarishpami shujtaj ñanta rin. Paillatajca mana quishpiri tucunchu: “Ñuca alli maquipi charicunca manachu yangalla” nishpapish mana ni tucunchu.

²¹Jacob caicunata yuyariyari, Israel ñucapajta rurajmari cangui. Ñucamari cantaca callarichircani, canca ñucapajta rurajmari cangui. Israel, ñucata ama cungarichu.

²²Cancuna c'ariyashcacunataca, p'uyuta shinami anchuchircani. Cancunapaj juchacunataca, p'uyulta shinami anchuchircani. Ñucamari cancunataca quishpichircani, ñucapajman cutirichigari” ninmi.

²³Jahua pacha cushicushpa cantayari. Mandaj Diosmari cantaca rurarca. Cai pacha allpa ucujman cajcunapish cushicushpa caparichigari. Urcucunapish, sachacunapish tucui chaipi tiyaj imalla yuracunandij sinchita caparishpa alabaichigari. Mandaj Dios Jacobpaj huahuacunata quishpichishcamantaca, Mandaj Diosca Israelpimi jatunyachishca canga.

²⁴Mamapaj huijsa ucumantapacha canta cuidaj canta Quishpichij Mandaj Diosca cashnami nin: “Ñucaca tucuita ruraj Mandaj Diosmi cani. Ñucallatajmi jahua pachatapish linsota chutaj shina churarcani. Cai pachatapish ñucallatajmi tucuita rurarcani. Ñucataca pi mana ayudarcachu.

²⁵Adivinocuna imalla huillashca ama pajtachunpish ñucami yanganchini. Brujocunatapish ñucami muspachini. Yachaisapacunatapish, ñucami huashaman tigrachini. Paicuna yachashcatapish ñucami yangapi churani.

²⁶Ñucapajta ruraj huillashcataca, ñucatajmi pajtachini. Ñuca cachajpi huillajcuna huillashcataca, chaitatajmi pajtachini Jerusalenpica: “Cutin causangami” nijca ñucami cani. Judá llajtapi caj pueblocunatapish: Cutin allichishcami canga. Tucui urmashca siricujta shayachijca ñucami cani.

²⁷Allpa ucupi caj yacucunata chaquirichij nijca ñucami cani. Cancunapaj jatun yacucunatapish ñucami chaquichisha.

²⁸Cirotaca: Ñuca michijmi nijca ñucami cani. Paimi ñuca imalla munashcataca tucuita pajtachinga. Jerusalentaca cutin allichinga nijca ñucami cani. Diospaj huasita shayachinapaj callari rumita churangami nijca ñucami cani”.