Read Chimborazo Highland Quichua ISAÍAS 45 Bible Online

ISAÍAS 45 - Chimborazo Highland Quichua bible

ISAÍAS 45

¹Mandaj Diosca, pai ch'icanchishca Cirotaca: Ñucami paitaca llajtacunata paipaj ucupi churangapaj, jatun mandajcunapaj chumbillirishcata pascachun paitaca paipaj alli maquimanta charicuni. Pueblo pungucunatapish paipaj ñaupajpimi pascasha. Pungucuna amataj huichcarichun cambaj ñaupajpi pascangapajca:

²Ñucami canta ñaupashpa risha. Quingu ñancunatapish derechashami. Bronce pungucunatapish p'aquishami. Fierro aldabacunatapish ñutushami.

³Sumaj charinacuna pacashca tiyacujtapish canmanmi cusha. Pacalla alli huaquichishcacunatapish canmanmi cusha. Ñucaca Mandaj Dios cashcata, israelcunapaj Taita Dios cashcata yachachun cantaca ñuca shutipi ñuca cayashca cashcata yachachunmi chashna rurasha.

⁴Ñucapajta ruraj Jacobta c'uyashcamanta, ñuca agllashca israelcunata c'uyashcamantami cantaca shutipi cayarcani. Ñucata mana rijsijpipish cantaca alli nishca cana shutitami churarcani.

⁵Mandaj Diosca ñucami cani, pi shujtaj mana tiyanchu. Ñucamanta shujtaj Diosca mana tiyanchu. Ñucata mana rijsij cajpipish, ñucami cantaca chumbillichisha.

⁶Inti llujshinmanta, inti huashicuncama ñuca shinaca pi mana tiyashcata yachachunmi chashna rurasha. Mandaj Diosca ñucami cani, pi shujtajca mana tiyanchu.

⁷Ñucami luztapish callarichij cani. Ñucami amsatapish callarichij cani. Sumaj causaitapish ñucami cuni. P'iñanacuitapish ñucami callarichini. Tucui chaicunata rurajca pi shujtaj mana tiyanchu. Mandaj Dios ñucami tucui chaicunata rurajca cani.

⁸Jahua pacha, jahuamanta garhuayari. P'uyu, cashcata ruranata garhuayari. Allpa pascariyari. Quishpirinata cashcata ruranata p'ucuyari. Chaicunataca tandallata huiñachiyari. Mandaj Dios ñucami chaicunataca huiñachircani.

⁹Imapish allpamanta rurashcacunaca caishuj allpamanta rurashca shinallatajca paita rurajta mana cazushpa paihuan mana p'iñanacunchu. Lodoca allpamanta imatapish rurajtaca: “Imatataj ruragringuichu imamí” mana ninchu. Mana cashpaca: “Pai rurashcaca maqui illajllatamari rurashcangui” mana ninchu. ¡Aij, chashna nijca imachari tucunga!

¹⁰Paipaj yayata: “¿Imapajtaj ñucataca charingui?” nijcunaca aij, imachari tucunga. Mamatapish: “¿Imapajtaj ñucataca huacharcangui?” nijcunaca aij, imachari tucunga.

¹¹Israelcunata callarichij, jucha illaj Mandaj Diosca cashnami nin: “Q'uipa punllacuna imalla tucuna cashcata ñucata tapuichij. Ñuca huahuacuna imalla rurashcataca cancunachari tapusha ninguichij. Ñuca maquihuan imalla rurashcacunata ñuca imallata ruranataca cancunachari mandashun ninguichij.

¹²Allpa pachatapish ñucami rurarcani. Runatapish chaipi causachun ñucami rurarcani. Ñucami ñuca maquicunahuan jahua pachatapish linsota chutaj shina churarcani. Chaipi imalla tiyajcunatapish ñucami paicuna maipi cana cashcapi churarcani.

¹³Ciromanca ñucami allita rurana yuyaita curcani. Llaquichina yuyailla cajtapish ñucami allichircani. Paimi ñuca pueblotapish cutin shayachinga. Ima cullquita, ima camarita mana japishpami, ñuca agllashcacunata prezu apashcacunataca tigrachishpa cachanga” ninmi tucuita Mandaj Diosca.

¹⁴Mandaj Diosca cashnami nin: “Egiptocunapaj trabajashcacunapish Etiopiapaj c'atuna randinacunapish cambajmi tucunga. Sabá llajta jatun runacunapish cambajman rishpami cambaj tucungacuna. Cadenacunahuan huatashcami cambaj huashata catingacuna. Cambaj ñaupajpi cumurishpa rogarishpami: Diosca cancunahuantajmari cashca. Cancunapaj Diosmanta ch'ican pi shujtajca mana tiyanchu ningacuna” ninmi.

¹⁵Mana ricurij Dios cashpapish, mana dios nishcallachu cangui Diostajmi cangui. Israelcunata quishpichij Taita Diosmi cangui.

¹⁶Paicunaca tucuicunami pingachishca, cumurichishca cangacuna. Imamanpish rijchaj dioscunata rurajcunaca cumurichishcami ringacuna.

¹⁷Ashtahuanpish israelcunaca Mandaj Diospimi huiñaipaj quishpiringacuna. Cancunaca nunca mana pingachishca canguichijchu. Nunca mana cumurichishca canguichijchu.

¹⁸Jahua pachata ruraj Mandaj Diosmi chashna nin. Cai pachata ruraj. Ima shinalla canapi churaj Diosmi paica. Paica cai pachataca mana yanga tiyachun rurarcachu, runacuna causachunmi rurarca. Ñucami Mandaj Dios cani, shujtajca mana tiyanchu.

¹⁹Ñucaca mana pacallapi rimarcanichu. Ñucaca cai pacha mai amsallapica mana rimarcanichu. Jacobpaj huahuacunataca: Ñucataca yangallami mashcanguichij mana nircanichu. Mandaj Dios ñucaca cashcatataj rimaj, ima pandata mana huillajmi cani.

²⁰¡Tandanacuichigari, shamuichigari! Llajtacunapi mana huañushpa saquirijcuna tucuicuna c'uchuyamuichij. Caspi dioscunata apashpa purijcuna, manapish dioscunata quishpichihuai nishpa rogajcunaca imata mana yachajcunami.

²¹Paicuna caimi tucunga chaimi tucunga nishpa huillashca pajtashcata mana pajtashcata tapunacuichij. Imalla tucuna cashcata callarimantapacha huillajca ¿pitaj tiyanri? Mandaj Dios ñucami chashna huillajca cani. Ñucallami chashna Dios cani, pi shujtajca mana tiyanchu. Cashcata ruraj, Quishpichijca ñucallami cani, pi shujtajca mana tiyanchu.

²²¡Tucui cai pachapi causajcuna ñucata chaparaichij. Quishpichishcami canguichij. Ñucami Diostajca cani, pi shujtajca mana tiyanchu!

²³Ñucatajmi chashnatajmi rurasha nircani. Cashcatataj rurana shimicunaca ñuca shimimantami llujshin. Chashna nishcaca mana huashaman tigrarishcachu canga. Ñuca ñaupajpica tucuicunami cunguringacuna. Tucuicunami ñuca shutipi imatapish rurashun ningacuna.

²⁴Ñucataca cashnami ningacuna: Cashcata ruraj canapish, fuerzapish Mandaj Diospitajmi tiyan ningami. Mandaj Diospajman shamushpa nina sindirij shina p'iñarijcunaca tucuicunami pingachishca cangacuna.

²⁵Israelpaj huahua huahuacunataca, Mandaj Dios ña mana juchayujchu canguichij nijpica, tucuicunami paita jatunyachingacuna.