Read Chimborazo Highland Quichua ISAÍAS 5 Bible Online

ISAÍAS 5 - Chimborazo Highland Quichua bible

ISAÍAS 5

¹Ñuca c'uyashca alli apanacujtami cantagrini, paipaj uva chagratami cantagrini. Ñuca c'uyashca alli apanacujca, uva chagratami charirca. Alli p'ucuj quinri allpapimi charirca.

²Chai allpamantaca, tucui rumicunatami anchuchirca. Muyundijtami pircarca. Chaipica ashtahuan alli uvacunata agllashpami tarpurca. Chai uva chagra chaupipica torretapishmi shayachirca. Chai uvata capinapajpish tanquetami rurarca. Chai chagraca alli uvatami cunga yuyarcami. Ashtahuanpish chai chagraca sacha uvatami p'ucurca.

³Cunanca Jerusalén c'uchupi causajcunapish judacunapish uyaichij. Ñuca uva chagratapish ricushpa, ñucatapish ricushpa ¿ima shina cashcata cancunallataj ricuichigari?

⁴Ñuca uva chagrataca ¿imatataj ashtahuan rurana carcari? ¿Imata ruranatataj mana rurashcani? Ñucaca alli uva p'ucujtamari shuyacurcani. ¿Ima nishpataj sacha uvata p'ucurcari?

⁵Cunanca ñuca uva chagrata imata ruragrishcatami ricuchigrini. Muyundij pircatami anchuchigrini. Tucui tucuchishcami canga. Tucui pircata anchuchishca cajpica, pipish sarushcami canga.

⁶Shitashca pambatami saquigrini. Uva yura ramacunatapish pi mana p'itishpa allichingachu. Pi mana jallmangachu. Ashtahuanpish cashacuna, mapa q'uihuacunallami jundanga. Chai uva chagra jahuapica p'uyuca mana tamyachingachu. Ñucami chashna mandagrini.

⁷Tucuita Mandaj Diospaj uva chagraca, israelcunami. Chaica chashnatajmi. Judaca Mandaj Dios munashpa tarpushca sumaj uvacunami. Allita rurajcuna cachunmi munarca, ashtahuanpish mapa q'uihuacunami tucurca. Cashcata rurajcuna cachunmi munarca, ashtahuanpish caparishca huacaicunallami tiyan.

⁸Aij, caipi chaipi huasicunata randijcunalla. Aij, caipi chaipi haciendacunayuj tucucujcunalla. Tucuicunapajta quiquinpajlla tandacujcunalla. ¿Cancunallachari tucui llajtacunapi causashun ninguichij?

⁹Achca huasicunami urmachishca saquiringa. Sumaj jatun huasicuna cashca cashpapish shitashcami saquiringa nishpa tucuita Mandaj Dios nishcami ñuca rinrinman uyarirca.

¹⁰Chunga huagra yuntahuan yapushca uva chagraca shuj barril vinopajlla uvatami p'ucunga. Chunga costal muyu yaicushca trigo chagrapish, shuj costal trigollatami p'ucunga.

¹¹Machanaman ringapajlla utca jatarijcunalla. Tutayangacama ubyacujcunalla. Nina sindirij shina vino machachingacama ubyacujcunalla. ¡Aij, imachari tucunga!

¹²Paicunapaj jatun micuicunapica, arpacunapi tocajcunami tiyan. Salteriocunapi, tamborcunapi, flautacunapi tocajcunami tiyan. Achca vinomi tiyan. Mandaj Dios rurashcataca pai rurashca cashcata mana yuyanchu. Paipaj maquihuan rurashca cashcataca mana yuyanchu.

¹³Ñuca agllashcacunaca manataj entendishcamantami, prezu apashca tucungacuna. Alli nishcacuna cashca cashpapish yaricaihuanmi huañucungacuna. Achcacunami yacunaihuan chaquicungacuna.

¹⁴Chaimi seolpish tiyashcata millpungapaj huijsata jatunyachinga. Shimitapish yallitajmi pascanga. Chaimanca paicuna sumaj cashcandij, achcacunandij, cushicujndij, paicuna cushicushcandijmi uriyangacuna.

¹⁵Tucuicunami cumurichishca cangacuna, jatun tucushcacunapish cumurichishcami canga.

¹⁶Tucuita Mandaj Diosca, runacunataca paicuna ima shina cashcatataj ricuchishpa mandashpami, alli nishca canga. Jucha illaj Diosca cashcata rurashpa mandashpami alli nishca canga.

¹⁷Malta ovejacunaca michina cashca shina michishcami canga. Charijcunapaj cashca shitashca allpacunataca shujtaj llajtamanta cajcunami japingacuna.

¹⁸Millaita ruranataca mana alli anguhuan, juchahuan apamujcunalla, huagracunaman carrota aisachij shina millaita ruranata apamujcunalla. ¡Aij imachari tucungacuna!

¹⁹Paicunaca: ¡Shamuilla can rurasha nicushcataca rurailla ña ricungapaj nincunami! C'uchuyamuilla, shamuilla Israelcunapaj jucha illaj Dios quiquin rurasha nicushcataca utca rurailla. Ima shina rimashcata ña yachangapaj nincunami.

²⁰Mana allitaca alli nijcunalla. Allitaca mana alli nijcunalla. Luztaca amsata rurajcunalla. Amsataca luzta rurajcunalla. Jayajtaca mishquimi nijcunalla. Mishquitaca jayajmi nijcunalla. ¡Aij, imachari tucungacuna!

²¹Paicunapaj quiquin yuyaillapi yachajmi canchij yuyajcunalla. Alli yuyaiyujcunami canchij yuyajcunalla. ¡Aij, imachari tucungacuna!

²²Vinota ubyangapaj c'ari c'ari cajcunalla. Ubyanacunata chagrushpa allichingapaj c'ari c'ari cajcunalla. ¡Aij, imachari tucungacuna!

²³Cullquita cujpica millaita ruraj cajpipish allimi nincunami. Millaita rurajpura tucushpa cashcata rurajtaca llaquichinllami.

²⁴Nina lunyacuj c'allucunami rastrojo ujshata shina tucuchinga. Ujshata nina tucuchij shinami tucuchinga. Chashnami sapi ismushca yura shina chingaringa. Paicuna sumaj sisacuna shina cashcapish ñutu allpa shinami chingaringa. Tucuita Mandaj Diospaj mandashcata yanganchishcamantami chashna tucunga. Israelcunapaj jucha illaj Diospaj shimita millashcamantami chashna tucunga.

²⁵Mana cazushcamantaca Mandaj Diosca, pai agllashcacunahuanca nina sindirij shinami yallitaj p'iñarirca. Mandaj Diosca paipaj maquita chutashpami chugrichirca. Urcucunapish chujchurcami. Huañushcacunapish chaupi ñancunapimi shitashca saquirircacuna. Chashna llaquichishpapish pai yallitaj p'iñarishcaca manaraj pararircachu. Ashtahuanpish paipaj maquitaca chutaracunrajmi.

²⁶Mandaj Diosca, caru llajtacunataca banderata alzashpami cayanga. Cai pacha tucuri llajtacunamantaca silbashpami cayanga. Chashna cayancami tucuicuna utca shamungacuna.

²⁷Paicunapurapica, pi mana shaicungacunachu. Ñitcarishpa urmajcunapish pi mana tiyangachu. Shujllapish mana dormingachu, pita mana dormi japingachu. Paicuna chumbillirishcatapish pi mana pascangachu. Paicunapaj pargate huatashcatapish pi mana p'itingachu.

²⁸Paicunapaj puntajlla caspicunapish ashtahuan puntajllata rurashcami canga. Paicunapaj arcocunapish shitanajllami canga. Paicunapaj caballocunapaj sillucunapish, yacu rumi shinami canga. Paicunapaj carrocunapaj ruedacunapish, acapana shinami callpanga.

²⁹Paicunaca jatun león huacaricuj shinami caparingacuna. Paicunaca uchilla leoncuna shinami caparingacuna. Ima animalta alli amullishpa apaj shinami apangacuna. Pi mana quichuipajtami apangacuna. Pi mana quichungachu.

³⁰Chai punllaca jatunta huajiashpami shamunga. Mama cucha yacu huajiaj shinami shamunga. Jahua pachamanta achijyachijcunapish amsayangami. Maijanpish cai llajtata ricushpaca, jatun amsa llaquitami ricunga.