Read Chimborazo Highland Quichua ISAÍAS 50 Bible Online

ISAÍAS 50 - Chimborazo Highland Quichua bible

ISAÍAS 50

¹Mandaj Diosca cashnami nirca: “Cancunapaj mama Israelta ñuca shitashca cajpica shitashca cashcata ricuchij quillcaca ¿maipitagari? ¿Pimantaj ñucaca divishcaniyari? Chai divimantaca c'atushpa p'angangapajpish ñucaca ¿pimantaj diviyashcaniyari? Ashtahuanpish cancunataca millaicuna tucushcamantami c'aturcani. Cancunallataj c'ariyashcamantami cancunapaj mama Israeltaca shitarcani.

²Ñuca shamushpaca pita mana japircanichu. Huasiyuj nijpipish pi mana uyarircachu. ¿Ñuca maquica uchijllachari cancunata mana cacharichi tucungapajca? Cancunata quishpichingapajca ¿manachari poderta chariniyari? Riqui, ñucaca rimashcallahuanmi mama cucha yacutapish chaquichini. Jatun yacucunatapish shitashca pambatami rurani. Chaipi causaj chalhuacunapish yacu illashcamanta yacunaihuan huañushpa ismunmi.

³Jahua pachatapish amsatami churachini. Cañamazutami tindini” ninmi.

⁴Shaicushcacunata sumaj shimicunahuan samachichunca Mandaj Jatun Diosca ñucamanca yachaisapacunapaj c'allutami curca. Tucui tutamantacunami ñucataca rijchachin. Yachacuj shina uyachunmi ñuca rinrintapish rijchachin.

⁵Mandaj Jatun Diosmi ñuca rinrinta pascarca. Ñucaca mana c'ariyarcanichu. Huashatapish mana ricuchircanichu.

⁶Chugrichijcunamanca, ñuca huashata ricuchircanillami. Barbasta chutajcunamanpish ñuca quijadusta ricuchircanillami. C'amishpa ch'ucajpipish, ñuca ñahuita ricuchircanillami.

⁷Mandaj Jatun Dios ñucata ayudajpimi ñucaca mana pingarircani. Chaimanta ñuca ñahuitaca jatun rumita shina rurashpa llaquita aparcanillami. Mana pingaichishca canataca yachanimi.

⁸Ñucata quishpichijca ñuca c'uchullapimi: Ñucahuanca ¿pitaj ch'imbapurai tucungari? ¡Tandanacushunchij! Ñucata p'iñaj, ñucata juchachijca ¿pitagari? ¡Maijan tiyashpaca ñucapajman c'uchuyamuchun!

⁹Riqui, Mandaj Jatun Diosmi ñucataca ayudanga: ¿Pitaj ñucataca juchachishpa llaquipi churai tucungari? Riqui, paicunaca tucuicunami churana maucayaj shina yuyajyangacuna. Polilla c'urucuna micushcami cangacuna.

¹⁰¿Maijan cancunataj Mandaj Diosta manchashpa paipajta ruraj huillashcata uyanguichij? Amsapi maijanpish purij, luz illajlla cajca Mandaj Diospi shunguta churashpa, Taita Diospi taunarichun.

¹¹Riqui, cancunaca tucuicunami ninata japichinguichij. Cancunallataj japichishca nina sindicuna achijyachishcatami muyunguichij. Chai ninallahuantajmi ñuca maquihuan cancunataca llaquichijpi chai llaqui nanaipi pambashca canguichij.