Read Chimborazo Highland Quichua ISAÍAS 51 Bible Online

ISAÍAS 51 - Chimborazo Highland Quichua bible

ISAÍAS 51

¹Cashcata ruranata catijcuna uyaichij. Mandaj Diosta mashcajcuna uyaichij. Jatun rumimanta p'itishpa cancunata anchuchishca rumita ricuichigari. Cancunata llujshichishca chai jatun rumi jutcuta ricuichigari.

²Cancunapaj yaya Abrahamta yuyarichigari. Cancunata huachaj Sarata yuyarichigari. Manaraj shuj huahuallatapish charijpi cayashpami, alli nishpa paimantaca achca huahua huahuacunata mirachircani.

³Mandaj Diosca Siontaca cushichingami. Chaica chashnatajmi canga. Ñuturishcacunataca cushichingami. Shitashca pambataca sumaj huertatami ruranga. Mana p'ucuj allpataca Mandaj Diospaj huertatami ruranga. Chaipica cushicushpa alabana, cushicushpa cantanacunami tiyanga.

⁴Ñuca agllashcacuna ñucata uyanajlla caichij. Ñucapajlla caj llajta ñucata uyai. Ñucamantamari mandashcaca llujshinga. Ñuca cashcata ruranaca pueblocunata achijyachingapajmi llujshinga.

⁵Ñuca cashcata rurashpa mandanaca ñami quichquiyamucun. Ñuca quishpichinaca ñami caillapi. Pueblocunataca ñuca rigrami ima shina cashcata ricuchinga. Mama cucha c'uchupi caj llajtacunapi causajcunapish, ñucatami shuyacuncuna. Ñuca rigrapimi paicunapaj shunguta churancuna.

⁶Cancunapaj ñahuihuan jahua pachata huichilla ricuichigari. Allpatapish urilla ricuichigari. Jahua pachaca cushni shinami chingaringa. Allpapish churana maucayaj shinami tucuringa. Allpapi causajcunapish chashnallatajmi chingaringacuna. Ashtahuanpish ñuca quishpichinaca huiñaipajmi. Ñuca cashcata ruranaca mana chingaringachu.

⁷Cashcata ruranaca ima cashcata rijsijcuna uyaichij. Ñuca mandashcaca cancunapaj shungupimari. Runacuna yanganchishcataca ama manchaichu. Paicuna c'amijpipish ama mana catisha nichu.

⁸Paicunaca churanata polilla micushca shinami tucuringacuna. Millmata c'uru micushca shinami chingaringacuna. Ñuca cashcata ruranaca huiñaita caticungallami. Ñuca quishpichinaca huahua huahuata quishpichicungallami ninmi.

⁹¡Rijchariyari, rijchariyari. Mandaj Diospaj rigra tucuita rurai tucuj canahuan churariyari! ¡Achca huatacuna ñaupaman shinallataj rijchariyari! Rahabta mirga mirgata rurajca quiquintajmari cangui. Dragonta chugrichijpish quiquintajmari cangui.

¹⁰Mama cucha yacuta chaquichijpish quiquintajmari cangui. Jundu jatun yacucunatapish quiquintajmari chaquichircangui. Quishpichishcacunata ch'imbachingapaj, ucujta caj yacuta chaquichishpa ñanta rurajca quiquintajmari cangui.

¹¹Mandaj Dios quishpichishcacunaca tigrangacunatajmi. Sionmanca cantaihuanmi tigrangacuna. Paicunapaj umapica huiñaitami cushicunga nishcata churashcami canga. Cushicuita, yallitaj cushicuitami charingacuna. Nanaipish, aij ninapish miticushpa maitatajshi rishcami canga.

¹²Cancunata cushichijca ñucamari cani. ¿Huañujlla runacunata manchangapajca yangallachari canguiyari? ¿Llullu q'uihua shina chaquirijlla runacunapaj churicunata manchangapajca yangallachari canguiyari?

¹³Cantapish Ruraj, jahua pachatapish linsota shina chutashpa ruraj, cai pachatapish ruraj Mandaj Diostaca cungarishcanguimari. Cancunata llaquichishpa chingachina tucushpa p'iña shamujpica paicunata manchashcamanta tucui punlla mana samashpami llaquilla cainangui. Nina sindirij shina p'iñarishcahuan llaquichisha nijcunaca maitagari, manapish llaquichinca.

¹⁴Prezu apashpa llaquichishca causacujcunaca ñallami cacharichishca canga. Pamba ucu carcelpica mana huañungachu. Micunapish paipajca mana illangachu.

¹⁵Mandaj Dios ñucami mama cuchatapish caiman chaiman cuyuchini. Chai yacuta jahuajta jatarichishpa huacachijpish ñucami cani. Ñuca shutica tucuita Mandaj Diosmi.

¹⁶Ñuca shimicunataca cambaj shimipimi churarcani. Jahua pachata linsota chutaj shina rurashpami, ñuca maqui llanduhuan cantaca taparcani. Allpataca sinchita rurashpami Siontaca: “Canca ñuca agllashcami cangui” nircani.

¹⁷¡Rijchari, rijchari, jatariyari Jerusalén. Mandaj Diospaj p'iñarishca copatamari paipaj maquimanta ubyarcangui! Muspachij vinotamari siquiyashcandij ubyarcangui.

¹⁸Can huachashca tucui huahuacunaca shujllapish canta pushajca mana tiyanchu. Tucui can huiñachishca huahuacunaca maquimanta aisajca shujllapish mana tiyanchu.

¹⁹Cai ishqui jatun llaquimari cantaca japirca: Ñutuchishca chingachishca cashpa yaricaihuan cana, espadahuan huañuchishca canami tucushca. ¿Pitaj cantaca llaquingari? ¿Pitaj cantaca cushichingari?

²⁰Cambaj churicunaca ñan esquinacunapimi tucui ñancunapi yuyai illaj tucushpa siricuncuna. Tarugacuna linchipi churarishpa siricuj shinami siricuncuna. Paicunaca cambaj Mandaj Taita Dios jatunta p'iñarishpa llaquichijpimi, chashna siricuncuna.

²¹Llaquihuan caj huarmi, cunanca caita uyai: Machashcamari cangui. Ashtahuanpish mana vinohuanchu machashca cangui.

²²Pai agllashcacunapaj randi shayarij canta Mandaj Jatun Dios cambaj Taita Diosca cashnami nin: “Riqui, cambaj maquimantaca muspachij vino copataca anchuchircanimi. Ñuca p'iñarishca vino copa siquiyashcataca anchuchircanimi. Cutinca ña manataj ubyanguichu.

²³Canta p'iñajcunaca: Cumuri cambaj jahuata pasangapaj nijpimi canca paicuna ñanta shina pasachun uri singa siririshpa cambaj huashataca pambata shina ruraj carcangui. Cunanca chai llaquicunataca canta p'iñajcunapimi churani” ninmi.