Read Chimborazo Highland Quichua ISAÍAS 52 Bible Online

ISAÍAS 52 - Chimborazo Highland Quichua bible

ISAÍAS 52

¹¡Rijchariyari, rijchariyari Sión. Imatapish rurai tucuj canata churariyari! ¡Cambaj sumaj churanata churariyari, Diospajlla caj Jerusalén pueblo! Circuncisionta mana rurashca mapacunaca cambajmanca ña manataj shamungachu.

²Jerusalén, ñutu allpata chaspiri. Jatarishpa tiyari. Prezu apashca caj Sionpaj ushushi, cambaj cungapi huatashcata cachaririyari.

³Mandaj Diosmari cashna nin: “Cancunaca ima cullquita mana japishpa c'atushcacunami carcanguichij. Chashnallatajmi ima cullquita mana cushpallataj llujshichimushcacuna cana canguichij” ninmi.

⁴Mandaj Jatun Diosca cashnami nin: “Ñaupa punllacunapica ñuca agllashcacunaca Egiptopi causangapajmi chaiman uriyarcacuna. Ashtahuanpish asiriocunaca imamanta mana prezu apana cajpipish prezumi aparcacuna”.

⁵Mandaj Diosca: “Cunanca ¿imatataj ruranichu imamí? Ñuca agllashcacunataca yangamantamari prezu apancuna. ¡Paicunata mandacujcunaca llaquinayajtamari caparichicuncuna. Ñuca shutitapish p'iñashpa punllantami c'amishpa rimacunllacuna!” ninmi Mandaj Diosca.

⁶Chai punllaca ñuca agllashcacuna ñuca shutita rijsina punllami canga. Ñuca shimihuantajmi caitaca nini: Ñucatajmi chaitaca rurasha.

⁷¡Urcucunata shamushpa cushicui huillaita apamujpaj chaquica yallitaj sumajmari! Paica sumaj causaita, alli huillaita, quishpirinata huillashpami Sionmanca: “¡Cambaj Taita Diosmi mandagrin!” ninmi.

⁸¡Uyaichigari, cancunapaj chapajcunami caparicun! Tucuicuna cushicushpamari shuj shinalla caparicuncuna ningacunami. Mandaj Dios Sionta cutin tigrachimucujta paicunapaj quiquin ñahuihuantaj ricushpami caparingacuna.

⁹¡Mandaj Diosca, pai agllashcacunatamari cushichishca. Jerusalentamari cutin cacharichishca. Chaimanta Jerusalenpi urmashca siricujcuna alabashpa cantaichij. Tandalla cushicuichij!

¹⁰Mandaj Diosca tucui llajtacunapaj ñaupajpimi paipaj jucha illaj rigra camizata huichiman pillushca. Ñucanchij Taita Dios quishpichishcataca tucui cai pachapi tiyaj llajtacunapi causajcunami ricungacuna.

¹¹¡Anchurichij, anchurichij, chaimanta llujshichij. Imapish mapapica ama tuparichijchu. Paicunapaj chaupimanta llujshichij! ¡Mandaj Diospaj ch'icanchishca charinacunata apajcunapish ima mapa illajlla tucuichij!

¹²Mandaj Dios ñaupashpa ricushcamanta mana jahuai ucu llujshinguichijchu. Mana miticushpalla ringuichijchu. Cancunata cuidashpa rijca Israelcunapaj Taita Diosmari canga.

¹³Riqui ñucapajta rurajca tucuipi allimi ringa. Jatunyachishcami canga. Alli nishcami canga. Tucuicunapaj jahuaman churashcami canga.

¹⁴Paipaj ñahuica ña mana ñahui shinachu carca. Paipaj cuerpoca ña mana cuerpo shinachu carca. Chaita ricushpaca achcacunami canmantaca mancharircacuna.

¹⁵Chai shinallatajmi achca llajtacunapish mancharingacuna. Jatun mandajcunapish paipaj ñaupajpica tucuicunami imata mana ni tucunga. Paicunaman pi mana parlashcatami uyangacuna. Maipi manataj uyashcatami yachaj chayangacuna.