Read Chimborazo Highland Quichua ISAÍAS 56 Bible Online

ISAÍAS 56 - Chimborazo Highland Quichua bible

ISAÍAS 56

¹Mandaj Diosca cashnami nin: “Cancuna imata ari nishcata pajtachichigari. Cashcata ruranata catichigari. Cancunata ñuca quishpichinaca ñallamari shamugrin. Cashcata rurashpa ñuca ricuchinapish ñallamari shamugrin.

²Tucui chaicunata ruraj runaca cushichishcami. Ugllarishca shina chai yuyai causaj huañujlla runaca cushichishcami. Samana punllatapish ama yanganchingapaj samarij, ima millaita ama rurangapaj paipaj maquita huaquichijca cushichishcami” ninmi.

³Mandaj Diosta mana Israel runa catishpaca: “Mandaj Diosca pai agllashcacunamantaca, ñucataca tucuimi anchuchishpa shitanga” ama nirichun. Eunuco runapish: “Riqui ñucaca chaquishca yurami cani” ama nirichun.

⁴Mandaj Diosca cashnami nin: “Samana punllacunapi huaquichirij, ñuca munashcacunata agllaj, ñucahuan ari ninacushcata ugllarij shina pajtachij eunucocunamanca,

⁵muyundij pircacunayuj pueblopi caj ñuca huasipimi causanata cusha. Churicunayuj ushushicunayuj cajcunapaj shutitapish yalli shutitami cusha. Chai shutica huiñaipaj pi mana cungarishcami canga.

⁶Mana israelcuna Mandaj Diospajta rurangapaj paita catijcunata, Diospajta rurajcuna cangapaj Mandaj Diospaj shutita c'uyajcunata, Mandaj Dios samarichun nishca punllata mana yanganchishpa huaquichijcunata, ñucahuan ari ninacushcata ugllarashca shina pajtachijcunataca,

⁷ñucaca ñucapajlla urcumanmi pushasha. Ñucata mañana huasipimi samachisha. Paicunapaj cushpa tucui rupachishcacunatapish, paicunapaj animalcunata cushcacunatapish, ñuca altar jahuapi rupachichun chasquishcami canga. Ñuca huasica tucui llajtacunamanta tandanacushpa Diosta mañana huasimi canga” ninmi.

⁸Caita, chaita rishca israelcunata tandachij Mandaj Jatun Diosca: “Shujtajcunatapishmi tandachisha. Ña tandachishcacunahuan tandachingapaj” ninmi.

⁹Tucui maipi tiyaj animalcuna, sachapi causaj p'iña animalcuna, millpunaman shamuichij.

¹⁰Israelcunata cuidajcunaca, mana ricujcunami. Tucui paicunaca mana yachashca shina tucujcunami. Tucui paicunaca mana ladraj upa allcucuna shinami. Dormicujlla q'uillacunami. Dorminallata munajcunami.

¹¹Chai allcucunaca micunatatajca mashnata micushpapish, manataj sajsajcunami. Michijcunapish chai shinallatajmi alli cashcata mana alli cashcata agllanata mana yachancuna. Tucui paicunami paicunapaj quiquin ñanta catinllacuna. Tucuicunami paicunapaj alli canallata mashcancuna. Paicunapaj alli canapajllami imatapish rurancuna.

¹²Paicunaca: “Shamuichij, vinota ubyashunchij, sidrahuan machashunchij. Cayapish cunan punlla shinallatajmi canga. Mana cashpaca ashtahuan yalli allipishmi canga” nincunami.