Read Chimborazo Highland Quichua ISAÍAS 57 Bible Online

ISAÍAS 57 - Chimborazo Highland Quichua bible

ISAÍAS 57

¹“Cashcata ruraj runa huañujpica, pipaj ima mana cashca shina saquirinllami. Dios yuyailla cajcunataca, cashcata ruraj cashcamanta llaquita ama ricuchun apashca cashcataca pi mana yuyanchu.

²Ashtahuanpish paica sumaj causaimanmi yaicunga. Taita Diospaj ñaupajpi purijcunaca tucuicunami sumaj camapi samaringacuna.

³¡Bruja huarmipaj churicuna caiman c'uchuyamuichij. Huainayaj runapaj, huainayaj huarmipaj huahua huahuacuna caiman c'uchuyamuichij!

⁴¿Pitataj chanzata rurashcata yuyanguichij? Shimita pascashpa, c'alluta cacharishpa c'amishpaca ¿pitataj chashna rurashcata yuyanguichij? ¿Manachu cancunaca ñucata mana cazuj huahuacuna canguichij? ¿Manachu llullacunapaj huahua huahuacuna canguichij?

⁵Cancunaca encina yura ucucunapi, ima yura cashpapish p'angasapa yura ucucunapi cushicushpa huainayajcunami canguichij. Pugru pambacunapi, rumi c'aca machiyashcacunapi cancunapaj huahuacunata cushpa rupachijcunami canguichij.

⁶Canca pugru pambapi tiyaj llambu rumicunatami adorangui. Chaicunami canmanca imatapish cun yuyanguimi. Chai rumicunamanmi vinotapish tallircangui. Granocunatapishmi cushpa rupachircangui. Chai tucui millaita rurashcamantaca, ¿manachu llaquichisha imatagari?

⁷Jatun urcu puntapimi cambaj camata churarcangui. Chaipipish sacrificiocunata cunaman huichiyarcanguimi.

⁸Pungu huashacunapi pungu jahuacunapimi rurashcalla dioscunata yuyarinapaj churangui. Ñucapaj ñaupajpi llatanarinapaj randica, shujtajpaj ñaupajpimi llatanarircangui. Paicunapaj jatun camaman huichiyashpami sirirircangui. Paicunapaj dioscunapaj causanatami ari ninacurcangui. Chaicunapaj camataca maipi ricurijpipish munacurcanguimi.

⁹Mishquijllata ashnacuj jambicunahuanmi jatun mandajpajmanca rircangui. Mishquijllata ashnaj jambicunataca mirachircanguimi. Cambaj randi rimajcunatapish caruman cachashpami, Seol ucujman cacharcangui.

¹⁰Cambaj achca ñancunapimi shaicurcangui. Ashtahuanpish: “Mana allitamari ruracuni” ninallatapish mana nircanguichu. Chaipaj randica, ashtahuan fuerzata japishpami, mana rurashachu ninapaj randica ashtahuan rurashpa catircangui.

¹¹¿Pita manchashpataj ñucapi shunguta churanataca saquircanguiyari? ¿Pi manchachijpitaj ñucataca mana cringuiyari? ¿Ima nishpataj ñucataca mana yuyaringuiyari? Cambaj yuyaimanca ¿manachu ñucata yuyarinallapish shamurca? Ñucata manataj manchajpipish ñaupamantapachami imata mana nishpa, upalla saquircani.

¹²Cashcatami rurashpa causacuni, alli ruranacunatami ruracuni nishcataca imapajpish mana alli cashcatami ricuchigrini.

¹³¡Llaqui shamujpi cambaj dioscuna quishpichichun. Can caparijpica ashtahuanpish tucui paicunatami huaira apanga! Shuj p'ucuillami chingachinga. Ashtahuanpish ñucapi shunguta churajca, pai japina cashca allpatami japinga. Ñucapajlla ch'icanchishca urcutami japinga” ninmi.

¹⁴Chaipica: “Ñantaca llambujllata ruraichigari. P'ichaichigari. Ñuca agllashcacuna purichun ñitcarinacunata ñanmanta anchuchichij” ningami.

¹⁵Jahuajman caj, tucuita yalli jatun, huiñaita causacuj, jucha illaj shutica cashnami nin: “Ñucaca jahuajman ima jucha illajpimi causani. Ashtahuanpish ñucaca llaquihuan cajcunahuan, mana jatun tucushcacunahuanmi causani. Mana jatun tucushcacunata, shungu p'aquirishcacunata jatarichingapajmi paicunahuan causani.

¹⁶Ñucaca mana huiñaita llaquichicushallachu. Mana huiñaita p'iña cashachu. Ñuca chashnalla cajpica ñuca rurashca espirituyuj, almayuj runacunaca ñuca ñaupajmantaca tucuimi chingarinman.

¹⁷Mana israelcunapaj rurashcata munashpa paicuna shina millaita rurajpimi, p'iñarishpa llaquichircani. Ñuca ñahuita shujman churashpami paicunataca llaquichircani. Ashtahuanpish paicunaca ashtahuan ñucata c'ariyashpami, paicunapaj shungu munashca ñanta catircallacuna.

¹⁸Paicuna ima shinalla ruracujta ima shinalla puricujta ricunimi. Chashna cajpipish ñallami alliyachisha. Ñallami michisha. Paimanpish, paihuan llaquilla cajcunamanpish cushicuita cushami.

¹⁹Paicunapaj shimipica: Carupi causajcunapajpish, c'uchullapi causajcunapajpish sumaj causai, sumaj causai tiyachun nishpa cantana yuyaitami paicunamanca cusha. Paicunataca ñucami alliyachisha” ninmi Mandaj Diosca.

²⁰Ashtahuanpish Diosta mana rijsijcunaca huairandij tamyahuan mama cucha mana casilla cai tucushpa, mapacunata, lodota yacu uriman shitacuj shinami.

²¹“¡Mandaj Diosta mana rijsijcunapajca, sumaj causaica mana tiyangachu!” ninmi ñuca Taita Diosca.