Read Chimborazo Highland Quichua ISAÍAS 60 Bible Online

ISAÍAS 60 - Chimborazo Highland Quichua bible

ISAÍAS 60

¹¡Israel cambaj luzmari shamushca jatariyari, cutin achijyachiyari. Mandaj Diospaj sumaj canamari canpi huacharishca!

²Riqui, cai pachataca amsami tapanga. Tucui llajtacunataca amsami pilluchinga. Ashtahuanpish Mandaj Diospaj achijmi canpica achijlla canga. Mandaj Diospaj sumaj cashcaca canpimi ricuringa.

³Llajtacunapi causajcunaca cambaj luzpimi puringacuna. Canpi caj luz achijllata pacarichishcapimi jatun mandajcunaca puringacuna.

⁴Cambaj ñahuita alzashpa muyundijta ricuyari. Tucui caicunamari tandanacushca cambajman shamungacuna. Cambaj churicunaca carumantami shamungacuna. Cambaj ushushicunataca marcashpami apamungacuna.

⁵Chaita ricushpaca achijllami tucungui. Chaipitajca cambaj shungu mancharishpa pascaringami. Mama cuchapi tiyaj sumaj charinacunapishmi cambajman tigranga. Llajtacunapi tiyaj charinacunami cambajman chayamunga.

⁶Achca camellocunami canta muyunchishca canga. Madianmanta, Efamanta dromedariocunapishmi muyunchishca canga. Chaicunaca tucuicunami Sabamanta shamungacuna. Curita, inciensota apashca shamushpami Mandaj Diosta alabangacuna.

⁷Cedarpi caj tucui animalcunatami cambaj apamungacuna. Nebaiotpi caj tucui carnerocunaca can imata ruranapajmi canga. Chaicunaca ñuca altarpi cushicushpa rupachinapajmi canga. Chaipimi ñuca sumaj huasitaca ashtahuan alli nishcata rurasha.

⁸¿Picunataj p'uyu shina callpacunchu imamí? ¿Picunataj palomacuna paicunapaj ventanacunaman callpacuj shina callpacuncunachu imamí?

⁹Mama cucha c'uchupi caj llajtacunapish ñucapimi shunguta churangacuna. Tarsismanta barcocunaca cambaj huahuacunata carumanta apamungapajmi paicuna puntashca shamungacuna. Paicunapaj cullquindij, curindijmi apamungacuna. Canta jatunyachij, cambaj Mandaj Diosman israelcunapaj jucha illaj Diosman cungapajmi apamungacuna.

¹⁰Mana israelcunami muyundij pircataca shayachingacuna. Paicunata jatun mandajcunaca cambajta rurajcunami cangacuna. Ñuca p'iñarishca cashpa canta llaquichishca cashpapish ñuca llaquij cashcamantami cantaca llaquisha.

¹¹Cambaj pueblo pungucunaca tutapish punllapish mana huichcashca pascashcami canga. Shujtaj llajtacuna paicuna charishcacunata cambajman apamuchunmi chashna canga. Paicunata jatun mandajcunatapishmi cambajman pushamunga.

¹²Cambajta mana rurasha nij maijan llajtaca, tucui llajta chingachishca shitashcami canga.

¹³Libanopi tucui sumaj cajcunaca cambajmanmari ciprés yuracunandij, pino yuracunandij, boje yuracunandij tandalla shamunga. Chaicunahuanmi ñuca chaqui saruna huasita sumajyachishpa, alli nishcata rurasha.

¹⁴Canta llaquichijcunapaj churicunallatajmi cambajmanca cumurishca shamungacuna. Tucui canta p'iñajcunaca cambaj chaquipi cungurishpa cumurishpami: Mandaj Diospaj Pueblo, israelcunapaj jucha illaj Sionmi cangui ningacuna.

¹⁵Ñuca shitashca, p'iñashca, canpica pi mana purishca cashca cajpipish cantaca huiñaipaj jatun nishca, huahua huahua cushicunatami rurasha.

¹⁶Llajtacunapaj lechetamari chuchungui. Jatun mandajcunapaj chuchutamari chuchungui. Chaipimi ñucataca Mandaj Dios cashcata yachangui. Cambaj Quishpichij cashcatapish yachangui. Jacobpaj tucuita rurai tucuj Dios cashcata, canta quishpichij cashcata yachangui.

¹⁷Broncepaj randica curita, fierropaj randica cullquita, caspipaj randica bronceta, rumicunapaj randica fierrotami apamusha. Sumaj causaimi mandanga. Cashcata ruranami mandanga.

¹⁸Cambaj llajtapica ña manataj macanacui tiyanamantaca rimangachu. Cambaj llajtapaj lindecunata, llajtata chingachingami nishcapish ña manataj uyaringachu. Ashtahuanpish cancunapaj muyujta pircashcacunataca: Quishpichijmi cangui ninguichijmi. Pungucunataca: Diosta alabanami cangui ninguichijmi.

¹⁹Intica punllata achijyachinapajca nunca ña mana cangachu. Luna achijyachijpish nunca ña mana achijyachingachu. Ashtahuanpish Mandaj Diosmi huiñaipaj achijyachij luz canga. Cambaj Taita Diosmi canta achijyachij canga.

²⁰Cambaj intica manataj huashicungachu. Lunapish manataj uchillayangachu. Mandaj Diosmari cambajca, huiñaita achijyachij luz canga. Can llaquilla cana punllacunapish tucuringami.

²¹Tucui canpi causajcunami tucui paicunami cashcata rurajcuna canga. Paicunaca huiñaipajmi paicuna japina cashca allpataca japingacuna. Paicunataca ñuca cutin mushujta tarpushcacunami canga. Ñuca jatun cashcata ricuchingapaj, ñuca maquihuan rurashca chagrami.

²²Uchillaca huaranga huarangami tucunga. Uchilla llajtaca imatapish rurai tucuj pueblomi tucunga. Mandaj Dios ñucami ñuca chashna rurashami nishca punllapi chashna rurajpi chaica utca pajtanga.