Read Chimborazo Highland Quichua ISAÍAS 63 Bible Online

ISAÍAS 63 - Chimborazo Highland Quichua bible

ISAÍAS 63

¹Bosrapi caj Edommanta puca churanata churarishca shamucujca ¿pitagari? Achij nicuj churana churashca tucuita rurai tucuj cashcahuan, c'ari c'ari shamucujca ¿pitagari? Chaica cashcata ruranamanta rimaj, quishpichingapaj poderta charij ñucami cani.

²Cambaj churanaca ¿ima nishpataj pucajlla? ¿Ima nishpataj uvata capinapi sarujpaj churana shinari? ningacunami.

³“Uvata capinapimari ñucalla uvata sarumuni. Shujtajcunaca ñucahuanca pi mana carcachu. Yallitaj p'iñarishpa llapijpi, nina sindirij shina p'iñarishpa sarujpimari chai yahuar ñuca churanacunaman saltajpi ñuca churanacunaca yahuarlla tucurca.

⁴P'iñajcunataca paicunatapish llaquichina punlla chayamujpi llaquichingapaj ñuca shungupi ña yuyarishcatami charini. Tucuita mushujyachina huatamari chayamushca.

⁵Ñucata ayudangapishchari nishpa ricujpica pi ayudaj mana tiyarcachu. Ñucata mitsajca pi mana tiyajta ricushpami mancharircani. Ñuca quiquin rigrapaj poderllatajmi ñucataca quishpichirca. Ñuca p'iñarishca cashcallatajmi, c'ari c'arita rurarca.

⁶Ñuca p'iñarishcahuanmi llajtacunataca sarurcani. Nina sindirij shina ñuca p'iñarishcahuanmi machachircani. Paicunapaj yahuartaca pambapimi jichachircani” ninmi.

⁷Mandaj Diospaj jatun c'uyaitami yuyarisha. Mandaj Diosta alabana cashcatami yuyarisha. Mandaj Dios ñucanchijpaj ima shinalla rurashca shinallatajmi yuyarisha. Mandaj Diosca yallitaj c'uyaj cashpa israelcunapaj huahua huahuacunapaj yallitaj jatun allicunata rurashcatami yuyarisha. Pai ima shina c'uyaj cashca shina rurashcatami yuyarisha. Pai ima shina yallitaj llaquij cashca shinallatajmi yuyarisha.

⁸Paica: “Ñuca agllashca huahuacunaca mana llullajcunami” nishpaca, paicunata quishpichijmi tucurca.

⁹Paicunapaj tucui llaquicunapica, chai llaquicunataca paimi aparca. Paipaj ñaupajpi caj angelhuanmi quishpichirca. Pai c'uyashpa, pai llaquishpami quishpichirca. Ñaupa punllacunapi apamuj cashca shinallatajmi jatarichishpa paipaj rigrapi apamurca.

¹⁰Ashtahuanpish paicunaca c'ariyashpami paipaj jucha illaj Espirituta p'iñachircacuna. Chaimantami Mandaj Diosca paicunahuan p'iñarishpa macanacurca.

¹¹Paicunaca ñaupa punllacuna israelcunata Dios Moiseshuan llujshichishcata yuyarishpami cashna ningacuna: “¿Diosca paipaj ovejacunataca, pai churashca michijhuan mama cuchata huichiyachimujca maitagari? ¿Paicunapaj chaupipi paipaj jucha illaj Espirituta churajca maipitagari?

¹²¿Paipaj tucuita rurai tucuj rigrahuan Moisespaj alli maquihuan pushachijca maitagari? ¿Paicunapaj ñaupajpi jatun cucha yacuta chaupishpa paica huiñaipaj cashcata ricuchij Diosca maipitagari?

¹³¿Jatun yacu cuchata chaquichishpa chaita ch'imbachijca maipitagari? ¿Shitashca pambata caballocuna mana ñitcashpalla rijta shina ch'imbachij Diosca maipitagari?

¹⁴Mandaj Diospaj Espirituca pugru pambapi animalcunata michingapaj pushaj shinami michirca” ningacunami. Cambaj shutica jatun cashcata ricuchingapajmi can agllashcacunataca chashna michircangui.

¹⁵Jahua pachamanta ricuyari. Can causana jucha illaj sumaj huasimanta cushicushpa ricuyari. ¿Cambaj rupaj shunguhuan, tucuita rurai tucuj canahuan c'uyaica maipitagari? ¿Ñucanchijta c'uyaj, llaquij canaca quiquinpica ñachu mana tiyan?

¹⁶¡Quiquinmari ñucanchij yaya cangui! Abraham ñucanchijta mana charishca shina tucujpipish, Jacob ñucanchijta mana rijsisha nijpipish, Mandaj Dios quiquinmi ñucanchij yaya cangui. Huiñaimanta caj shuti quiquinca ñucanchijta quishpichijmi cangui.

¹⁷Mandaj Dioslla, ¿ima nishpataj quiquinpaj ñanmanta anchurichun saquircanguiyari? ¿Imamantataj canta ama cazuchun ñucanchij shunguta sinchiyachircanguiyari? Ñucanchijca cambajta rurajcunamari canchij. Can cushca allpacunapi causaj aillucunamari canchij. Ñucanchijta llaquishpa ña alli tucupayari.

¹⁸Quiquin agllashca jucha illajcunaca asha huatacunallatami chaipi causarcanchij. Ñucanchijta p'iñajcunamari quiquinpaj huasita sarurcacuna.

¹⁹Quiquin ñucanchijtaca nunca mana mandacushca shinamari tucushcanchij. Quiquinpaj shutita nunca mana mañajcuna cashca shinamari tucushcanchij.