Read Chimborazo Highland Quichua ISAÍAS 66 Bible Online

ISAÍAS 66 - Chimborazo Highland Quichua bible

ISAÍAS 66

¹Mandaj Diosca cashnami nin: “Jahua pachaca ñuca mandashpa tiyanami, cai pachaca ñuca chaqui sarunami. ¿Maipitaj ñucapajca huasita shayachi tucunguichigari? ¿Maipitaj ñuca samarinataca rurai tucunguichigari?” ninmi.

²Tucui caicunataca ñuca maquimi rurarca. Chaimantami tucui tiyai callarirca ninmi Mandaj Diosca. “Shina cajpipish ñucaca huajchacunapi, mana jatun tucushcacunapi, ñuca mandashcata manchaihuan cazujcunapimi ñuca ñahuita churani.

³Huagrata huañuchishpa cujca, shuj runata huañuchishpa cuj shinami. Ovejata huañuchishpa cujca, allcuta huañuchishpa cuj shinami. Vinota ñucaman cushpa tallijca, cuchi yahuarta cushpa tallij shinami. Inciensota cushpa rupachijca, rurashcalla diosta alli nicujmi tucunga. Paicunapaj quiquin ñanta agllashcamantami chashna tucurcacuna. Paicunallataj millanana ruranacunata c'uyashcamantami chashna tucungacuna.

⁴Chaimantami ñucapish paicunapajca llaquicunalla shamuchun agllasha. Paicuna manchacushcatami paicunapaj jahuaman apamusha. Ñuca cayajpipish, pi mana cutichircachu. Rimajpipish pi mana uyarcachu. Ashtahuanpish ñuca ñaupajpica millaillatami rurarcacuna. Ñuca mana munashcatami agllarcacuna” ninmi.

⁵Mandaj Dios rimashcata manchajcuna paipaj rimashcata uyaichigari. Paica cashnami nin: “Ñuca shutita mañajcunataca ñucata mana rijsinichu nij cancunapaj huauquicunaca: Mandaj Diosca pai jatun cashcata ricuchichun, chaipi cancuna cushicushcata ñucanchij ricungapaj ningacunami. Ashtahuanpish paicunaca chashna nicushpapish pingachishcami cangacuna.

⁶¡Jerusalenpica, caparishcacunami uyaricun. Diospaj huasipica bullashcamari uyaricun. Mandaj Dios paita p'iñajcunata paicuna ima shinalla rurashca shinataj llaquichicushcami uyaricun!

⁷¡Manaraj huachana punlla pajtajpimari huacharca. Huachana nanai manaraj japijpimari, c'ari huahuata huacharca!

⁸¿Cai shinataca pi uyashcachu? ¿Cai shinataca pi ricushcachu? ¿Allpaca shuj punllallapi chichungachu? ¿Shuj cutinllapi shuj llajta junda huacharishcachu? Sionca huachana punlla pajtajpi huachashpami churicunayuj tucurca.

⁹Mandaj Diosca: Ñucallataj huachacun nij cashcamantaca ¿ima shinataj huachajtaca jarcashari?” ninmi cambaj Taita Diosca.

¹⁰Jerusalenhuan cushicuichigari. Tucui paita c'uyajcuna paihuan cushicuichigari. Pai llaquilla cajpi llaquihuan cajcunaca paihuan cushicuihuan junda tucuichigari.

¹¹Cushicuna chuchuta mana nijta chuchushpa cushicuichij. Paipaj sumaj canahuan junda cangapaj chai chuchuta chuchushpa cushicuichij.

¹²Mandaj Diosca cashnami nin: “Riqui, ñucaca sumaj causaitami jatun yacuta shina paipi churani. Paipajmanca llajtacuna imalla charishcacunapish yacu jundashpa ladocunata rigaricuj shinatami churani. Chuchunguichijmi. Rigrapi apashcami canguichij. Changapi marcashpa c'uyashcami canguichij.

¹³Mama paipaj huahuata cushichij shinami, ñucapish cancunataca cushichisha. Jerusalenpimi cushicuita chasquinguichij” ninmi.

¹⁴Chaita ricushpaca, cancunapaj shunguca cushicungami. Cancunapaj tullucunaca llullujlla q'uihua shinami mushujyanga. Mandaj Diosca paipaj maqui tucuita rurai tucuj cashcatami paipajta rurajcunamanca rijsichiringa. Ashtahuanpish paita p'iñajcunahuanca p'iñaringami.

¹⁵Riqui, Mandaj Diosca nina lunyacunpimi shamunga. Paipaj carrocunaca jatun acapana shinami shamunga. Paica nina sindirij shina p'iñarishcata tallishpa llaquichingapajmi shamunga. Nina lunyacujhuan llaquichingapajmi shamunga.

¹⁶Mandaj Diosca tucui runacuna ima shinalla cashcataca nina lunyacujhuan, paipaj espadahuanmi ricuchinga. Mandaj Dios huañuchishcacunaca yallitaj achcacunami canga.

¹⁷“Huertacunaman ima mapa illajlla tucungapaj, chuyayangapaj huashan huashan rijcunata, cuchi aichata micujcunata, millananata rurajcunata, ucuchata micujcunataca tucuicunatami tandachishpa p'itishca canga ninmi Mandaj Diosca.

¹⁸Ñucaca paicunapaj rurashcacunata yachanimi. Paicunapaj yuyaicunatapish rijsinimi. Tucui llajtacunata, ch'ican ch'ican rimaicunata tandachina punlla chayamungami. Paicuna shamushpaca ñuca sumaj cashcatami ricungacuna.

¹⁹Ñucaca paicunapurapica shuj señaltami churasha. Paicunapuramanta mana huañushpa puchushcacunataca shujtaj llajtacunamanmi cachasha. Tarsisman, arcocunahuan macanacuj Fut, Ludpi causajcunapajman, Tubalman, Jabanman ñucamanta mana uyashca, ñuca tucuita rurai tucuj cashcata mana ricushca mama cucha c'uchupi caj ashtahuan caru llajtacunamanmi cachasha. Chaicunamanmi ñuca tucuita rurai tucuj cashcata huillangacuna.

²⁰Cancunapaj tucui huauquicunatapish ch'ican ch'ican llajtacunamantami Mandaj Diosman cuna cashcata apamuj shina caballocunapi, carrocunapi, toldoyuj carrocunapi, mulacunapi, camellocunapi Jerusalenpi caj ñucapajlla caj urcuman apamungacuna. Israelcuna ñucaman cuna cashcata, ima mapa illajllapi ñuca huasiman apamushpa cuj shinami, ñuca ñaupajpi churangacuna ninmi Mandaj Diosca.

²¹Paicunapuramantapish curacuna cachun, levitacuna cachunmi churasha” ninmi Mandaj Diosca.

²²Mushuj jahua pachacunata, mushuj cai pachata rurashcaca ñuca ñaupajpimi huiñaipaj canga ninmi Mandaj Diosca. Chashnallatajmi cancunapaj huahua huahuacunapish huiñaita causanga. Cancunapaj shutipish huiñai huiñaita mana chingaringachu.

²³Quillapi, quillapi, samana punllapi, samana punllapimi ñuca ñaupajpi adoranaman tucuicuna shamungacuna ninmi Mandaj Diosca.

²⁴“Paicuna llujshishpaca, ñucata p'iñashpa c'ariyajcunapaj huañushca aichacuna siricujtami ricungacuna. Paicunapi caj c'urucunaca nunca mana huañungachu. Paicunapi rupacuj ninapish, nunca mana huañungachu. Chaica pi mana munaipaj yallitaj llaquimi canga”.