Read Chimborazo Highland Quichua ISAÍAS 7 Bible Online

ISAÍAS 7 - Chimborazo Highland Quichua bible

ISAÍAS 7

¹Jotampaj churi jatun mandaj Acaz, Judá llajtata mandacujpimi, Israel llajtata mandacuj Peka shuti jatun mandajca, Siria llajtata jatun mandaj Rezinhuan tucushpa, Jerusalenpi causajcunahuan macanacunaman huichiyamurcacuna. Shina cashpapish chai llajtataca mana japi tucurcacunachu. Acazpaj yaya Jotammi, Jotampaj yayaca, Uziasmi carca. Pekapaj yayaca, Remaliasmi carca.

²Davidpaj huahua huahuapura jatun mandajpajman huillajcuna shamushpaca: “Siria llajtaca Efrain llajtahuanmari shuj yuyailla tucushca” nishpa huillajpimi, jatun mandajpaj shungupish, Jerusalenpi causajcunapaj shungupish urcupi caj yuracuna huairahuan caiman chaiman cuyurij shina chujchurcacuna.

³Chaimi Mandaj Diosca, Isaiastaca: “Janajman caj tanqueman shamuj larca callariman ri. Tajshajcunapaj allpaman rina ñanpi jatun mandaj Acazhuan tupagri. Chaimanca cambaj churi Sear-jasubndij rishpa,

⁴Jatun mandajtaca cashna ni: Siria llajtamanta caj Rezinpish, Remaliaspaj churipish p'iñarishcaca ishqui caspi rupashpa cushnicuj shinallami. Chaitaca alli chaparashpa ama manchaichu nigri.

⁵Siria llajta runapish, Efrain aillupish, Remaliaspaj churipish shuj yuyailla tucunacushpami, canta llaquichinata yuyarinacushpa, cashna nincuna:

⁶Jacuchij Judacunata manchachishunchij. Paicunapaj llajtataca ñucanchij chaupinacushpa, chai llajtapi jatun mandaj cachunca Tabeelpaj churita churashunchij ninacurcacuna.

⁷Ashtahuanpish Mandaj Jatun Diosca: Mana chashna tucungachu, chashnaca mana cangachu ninmi.

⁸Siria llajtapaj mama puebloca, Damascomi. Damascota jatun mandajca Rezinmi. Cunanmanta sujta chunga pichca huatapica Efraín llajtaca ña mana llajtachu ningacamami chingachishca canga.

⁹Efrainpaj mama puebloca Samariami. Samariata jatun mandajca Remaliaspaj churimi. Cancuna ñucapi mana shunguta churashpaca, mana ashtahuan causashpa catinguichijchu. Chaica chashnatajmi canga ninmi nigri” nircami.

¹⁰Mandaj Diosca, Acaztaca cashnapishmi nirca:

¹¹“Canta Mandaj Taita Diostaca shuj ricuchinata cambaj mañai. Allpa ucumanta cashpapish, jahua pachamanta cashpapish ricuchichun mañai” nircami.

¹²Shina nijpimi Acazca: “Mana mañashachu. Tucuita rurai tucuj Mandaj Diostaca imapajtaj shuj ricuchinata ricuchichun nishpaca mañashari” nirca.

¹³Shina nijpica Isaiasca: Davidpaj huahua huahuacuna caita uyaichij: ¿Runacunata p'iñachicushcaca ima mana cashcata yuyashpachu cunanca ñuca Diostapish p'iñachinguichij?

¹⁴Chaimanta Jatun Diosllatajmi, cancunamanca shuj ricuchinata ricuchigrin: C'arita manaraj rijsij shuj huarmimi chichunga. Paica shuj c'ari huahuatami huachanga. Chai huahuataca Emanuel shutitami shutichinga.

¹⁵Chai huahuaca ima alli cajta, ima mana alli cajta yachangacamaca mantequillata, sacha chuspipaj mishquillatami micunga.

¹⁶Chai huahua ima alli cajta, ima mana alli cajta manaraj yachaj cajpimi cunan can manchacuj ishqui jatun mandajcunapaj llajtacunaca shitashca saquiringa.

¹⁷Mandaj Diosca cambaj jahuamanpish, can mandacun llajtapi causajcunapaj jahuamanpish, cambaj huasi ucupuracunapaj jahuamanpish jatun llaquitami cachanga. Efraín aillu, Judá aillumanta ch'icanyashca punllacunamanta cunancama mana ricushca llaquicunami shamunga. Asiria llajtata jatun mandaj shamushpami llaquichinga.

¹⁸Chai punllapica Mandaj Diosca Egipto llajta jatun yacucuna tucurinpi caj tábano chuspicunatami silbashpa cayanga. Asiriapi caj abejacunatami silbashpa cayanga.

¹⁹Chaicuna shamushpaca, shitashca pugru pambacunapi, jatun rumi ucucunapi, casha yuracunapi, tucui yuracunapi causangapajmi tucuicuna tiyaringacuna.

²⁰Chai punllapica Jatun Diosca, jatun yacumanta ch'imbanijman cajcunata alquilamushca navajahuanmi tucuicunata raspanga. Asiria llajtata jatun mandajhuanmi uma ajchatapish, chaqui millmatapish, barbastapish tucuita raspanga.

²¹Chai punllapica cashnami tucunga: Shuj runaca shuj vacata, ishqui ovejacunatami huiñachinga.

²²Chaipica yallitaj achca leche tiyajpimi, mantequillallata micungacuna. Chai llajtapi saquirijcunaca mantequillata, sacha chuspipaj mishquitami micungacuna. Chashnatajmi canga.

²³Chashna cajpipish chai punllacunapica, ñaupaman huaranga uvacunata tarpushca allpa caj cashca cashpapish huaranga siclo cullqui valij caj cashca cashpapish casha yuracuna, casha q'uihuacunallami jundashca canga.

²⁴Tucui chai allpacunapica casha yuracunalla, casha q'uihuacunalla junda cajpimi, chai allpamanca puntajlla caspicunata, arcocunata apashca ringacuna.

²⁵Azadonhuan tsagmana cashca urcucunamanca ña mana rinata yuyangacunachu. Casha yuracunalla, casha q'uihuacunalla cajpi manchashcamantami mana ri tucungacuna. Chai allpacunaca huagracunata michinapaj, ovejacuna purinapajllami canga.