Read Chimborazo Highland Quichua ISAÍAS 8 Bible Online

ISAÍAS 8 - Chimborazo Highland Quichua bible

ISAÍAS 8

¹Mandaj Diosca ñucataca: “Shuj jatun tablata japishpa Maher-salal-hasbaz nishca shimicuna ima nisha nishcata alli rezanallata quillcai nircami.

²Chashna nijpica, Urías curata, Jeberequiaspaj churi Zacariastami chaicunata ricushpa ima shina cashcata huillachun ñucahuan tandachircani”

³Chai q'uipaca profeta caj ñuca huarmipi ñuca chayarijpica, paica chichushpami shuj c'ari huahuata huacharca. Chaimi Mandaj Diosca ñucataca: “Cai huahuataca Maher-salal-hasbazta shutichi.

⁴Huahua manaraj ñuca yayito, ñuca mamita ninata yachajpimi, Asiria llajtata jatun mandajca Damasco pueblopi achca charishcacunata, Samariapi causajcuna imalla charishcacunata quichunaman shamunga” nircami.

⁵Mandaj Diosca cutinmi ñucataca:

⁶“Cai runacunaca, casijllata ricuj Siloé yacucunata yanganchishpami Rezinhuanpish, Remaliapaj churihuanpish cushicurcacuna.

⁷Chaimantami Jatun Diosca, paicunapaj llajtamanca manchanana chai Éufrates jatun yacuta cachagrin. Asiria llajtata jatun mandajmi, chai jatun yacu jundashpa, tucui lado uri pambacunata tallirij shina cai tucui llajtacunata pai imallata rurai tucuj cashcahuan llaquichinga.

⁸Chai jatun yacuca, Judacama rishpa ashtahuan ashtahuan mirarishpami, cungacama millpunga. Paica cambaj llajtataca paipaj alasta pascashpami tucui tapanga. Emanuel-lla” nircami.

⁹Llajtacunapi causajcuna tandanacuichijllatagari. Urmanguichijllatajmi. Mai caru llajtacunapi causajcunapish, tucuicuna caita uyaichij: Alli chumbilliricuichijllatagari. Chingachishcallatajmi canguichij. Macanacuipaj alli allichirichijllatagari. Chingachishcallatajmi canguichij.

¹⁰Imalla ruranacunata yuyarinacucuichijllatagari. Chaicunatapish chingachishcami canga. Alli parlanacucuichijllatagari, chaipish yangallami canga. Diosca ñucanchijhuanmari.

¹¹Mandaj Diosca ñucataca, paipaj tucuita rurai tucuj maquihuanmi, caipi causajcunapaj ñanpi amataj purichun nishpa cashna nirca:

¹²“Caipi causajcuna huashalla alli yuyarinacushcahuantajca ña imatapish ruranatajmi nincunami. Paicuna yuyashca shinaca ama yuyaichijchu. Paicuna manchacushcacunatapish ama manchaichijchu. Manchanami canchij nishpallapish ama yuyaichijchu.

¹³Cancunaca tucuita Mandaj Diosta manchaichij. Paillata jucha illajmi cangui nichij. Cancuna manchana, cancuna chujchunaca Mandaj Dioslla cachun.

¹⁴Chashna cajpica, paica Diospajlla huasimi canga. Ashtahuanpish israelcunapaj, judacunapajca ñitcana rumimi canga. Paicuna urmanapajca ñitcana rumi shina, lazyana angu shinami canga. Jerusalenpi causajcuna urmanapajca linchi shinami canga.

¹⁵Paicunapuramantaca achcacunami ñitcangacuna, urmangacuna, ñuturingacuna. Maijancunaca tsagnarishpami urmangacuna. Prezu apashcami cangacuna.

¹⁶Dios ima shina cashca shina causanataca charirangui. Ñuca yachachishcacunataca ñucata catijcunapaj chaupipica chaitataj pajtachingui” nircami.

¹⁷Mandaj Diosca Jacobpaj huahua huahuacunamanta paipaj ñahuita pacajpipish ñuca Mandaj Diosllatami shuyasha. Paillapimi shunguta churasha.

¹⁸Ñucapish, Mandaj Dios ñucaman cushca ñuca churicunapish, israelcuna ima tucunata ricuchijcunami canchij. Sión urcupi causaj, tucuita Mandaj Dios churashcacunami canchij.

¹⁹Cancunata maijancuna: “Muspachij yumbucunata, adivinocunata, manapish entendipajta rimarijcunata tapuichigari” nijpica, cancunaca: Cai gentecunaca ¿manachari paicunapaj Diosta tapunari? ¿Causajcunamantaca huañushcacunatachu tapunari? nishpa cutichinguichij.

²⁰Mandashcapish, Dios ima shina cashca shina causachun nishcapish tiyanmi. Mandashcacunapi nishca shina mana nishpaca, paipica manaraj pacarishcachu.

²¹Paicunaca cai allpapica shaicushcacuna, yaricaihuanmi caiman chaiman puringacuna. Yaricaihuan cashpami p'iñarishpa jahua pachata huichilla ricushpa paicunata jatun mandajtapish, paicunapaj Diostapish mana alli nishpa rimangacuna.

²²Allpata ricushpaca llaquicunata, yallitaj amsatami ricungacuna. Paicunaca chai yallitaj amsapimi shitashca cangacuna.