Read Chimborazo Highland Quichua LEVÍTICO 10 Bible Online

LEVÍTICO 10 - Chimborazo Highland Quichua bible

LEVÍTICO 10

¹Nadab, Abiú Aaronpaj churicunaca inciensota rupachinacunata cada quiquinpajta japishpa chaicunapica ninata churashpa, chai jahuapica inciensota churashpami, Mandaj Diosman manapish cuna cashca ninahuan rupachircacuna. Mandaj Diosca chai ninahuan cuchunca nunca mana mandashcachu carca.

²Chaimi Mandaj Diospaj ñaupajmanta nina llujshishpa, rupachijpi Mandaj Diospaj ñaupajpi huañurcacuna.

³Chai q'uipami Moisesca, Aarontaca: — Cashna tucunataca Mandaj Diosca ña nircallatajmi. Paica: Ñucapajman c'uchuyajcunapimi ñucaca ima jucha illaj cashcata ricuchisha. Ñucaca tucui israelcunapaj ñaupajpimi jatunyachishca casha nijpica Aaronca upajlla carcallami.

⁴Chaipimi Moisesca Misael, Elzafán runacunata cayashpaca: — C'uchuyamushpa Diospajlla huasi ucumanta cancunapaj huauquicunata llujshichishpa, carpa huasicunamanta canllaman llujshichichij — nirca. Chaicunaca Aaronpaj tío Uzielpaj churicunami carca.

⁵Shina nijpi paicuna c'uchuyamushpaca Moisés mandashca shinallataj paicunapaj churanacunallapitajmi carpa huasicunamanta canllaman llujshichircacuna.

⁶Chaimi Moisesca Aarontapish, paipaj churicuna Eleazartapish, Itamartapish: — Paicunamanta cancuna llaquilla cashcata ama ricuchingapajca cancunapaj uma ajchatapish alli allichiringuichij, cancunapaj churanacunatapish ama lliquirichijchu. Chashna rurashpami cancunapish mana huañunguichij. Diospaj p'iñarishcapish tucui israelcunapaj jahuamanca mana shamunga. Mandaj Dios rupachishpa huañuchishcamantaca, tucui Israel cancunapaj huauquicuna huacangallacunami.

⁷Cancunaca Mandaj Diospajlla cachun ch'icanchishcata ricuchij aceite cancunapaj jahuapi cashcamantaca, cancunaca Mandaj Dioshuan tupana carpa huasi pungumantaca ama caruyanguichijchu. Chaimanta caruyashpaca huañunguichijmi — nircami. Paicunaca Moisés mandashca shinallatajmi rurarcacuna.

⁸Chaimi Mandaj Diosca Aarontaca cashna nishpa mandarca:

⁹“Mandaj Dioshuan tupana carpa huasiman yaicushpaca canpish, cambaj churicunapish, vinotapish, sidratapish ama ubyanguichijchu. Chashna rurashpallami mana huañunguichij. Tucui cai mandashcacunaca cancunapaj huahua huahuacunapaj huiñaipaj mandashcami.

¹⁰Chashna rurashpami imalla ñucapajlla ch'icanchishca cashcatapish, imalla mana ñucapaj ch'icanchishca cashcatapish yachanguichij. Shinallataj imalla mapa cashcatapish, imalla mana mapa cashcatapish yachai tucunguichij.

¹¹Mandaj Dios cushca mandashcacunataca israelcuna chaitataj pajtachichun paicunata yachachichun Moisesman cushcami” nirca.

¹²Moisesca Aarontapish, Aaronpaj saquirishca Eleazar, Itamar shuti churicunatapish cashnami nirca: — Mandaj Diosman cuna cashcata cushpa rupachijpi saquirishcacunataca cancuna japichij. Chaicunaca Diospajlla ch'icanchishca cashcamanta, levadura illajllata altar c'uchullapi micuichij.

¹³Mandaj Diosman cushpa rupachijpi saquirishcacunataca canpish, cambaj churicunapish japinapajmi. Chaicunataca Diospajlla ch'icanchishcapi micunguichij. Mandaj Diosmi ñucataca chashna mandarca.

¹⁴Mandaj Dioshuan alli cangapaj huichi ricuchishpa paiman cuna animalta huañuchishca pecho aichatapish, Mandaj Diosman cungapaj ch'icanchishpa cushca changa aichatapish can japina cashcamanta japingui. Chai aichataca ima mapa illanpi canpish, cambaj churicunahuan ushushicunahuan micunguichij.

¹⁵Cushpa rupachina huiracunatapish Diosman ch'icanyachishpa cuna changa aichatapish, huichi ricuchishpa cuyuchishpa cuna pecho aichatapish apamuchuncuna. Chaicunaca Mandaj Dios mandashca shinallataj cambajpish, cambaj huahua huahuacunapish japicuchunlla mandashcami — nircami.

¹⁶Chaipimi Moisesca juchamanta Diosman cuna chivomanta tapurca. Ashtahuanpish ña rupachishca cashcatami ricurca. Chaimi Moisesca Aaronpaj saquirishca Eleazar Itamar shuti churicunahuan p'iñarishpa cashna nirca:

¹⁷— Juchamanta cushca chivotaca ¿ima nishpataj Diospajlla ch'icanchishcapi mana micurcanguichij? Chaica tucuimanta yalli Diospajlla ch'icanchishcami. Tucui israelcunapaj juchata anchuchingapajmi, chai cushcacunataca cancunapaj cachun curca. Paicunaca Mandaj Diospaj ñaupajpi paihuan alli tucushca cachunmi chaipi micuna carcanguichij.

¹⁸Chai animalpaj yahuartaca Diospajlla ch'icanchishca ucuman mana apashca cashcamanta, cancunaca ñuca mandashca shinallataj Diospajlla ch'icanchishcapimi Diosman cushca cashcamanta micuna carcanguichij — nircami.

¹⁹Chaimi Aaronca Moisestaca: — Riqui, paicunapaj juchamanta cunatapish, tucuita cushpa tucui rupachinatapish cunanmari Mandaj Diosman cushcacuna. Ashtahuanpish ñucaca chai llaquicunamantamari chashna tucuni. Chashna cashca jahua juchamanta cushpa rupachishcata cunan ñuca micushca cajpica ¿Mandaj Dios munashcachu caiman carcami imashi? — nirca.

²⁰Shina nijta Moisés uyashpaca allimi nishpa mana ashtahuan imata nircachu.