Read Chimborazo Highland Quichua LEVÍTICO 18 Bible Online

LEVÍTICO 18 - Chimborazo Highland Quichua bible

LEVÍTICO 18

¹Mandaj Diosca Moisesta mandashpaca:

²“Israelcunaman cashna huillai: Ñucaca Mandaj Dios, cancunapaj Diosmi cani.

³Cancuna causacushca Egiptopi causajcuna rurashca shinaca ama ruranguichijchu. Ñuca cancunata cunan Canaán llajtaman pushacun llajtacuna ruraj cashca shinapish ama ruranguichijchu. Paicunapaj mandashcacunapi nishcacunatapish amataj ruranguichijchu.

⁴Ñuca mandashcacunata chaitataj pajtachina yuyailla ruranguichij. Ñuca chaitataj pajtachichun nishcacunata huaquichishpa, chaipi nishca shinataj puringuichij. Ñucami Mandaj Dios cancunapaj Taita Dios cani.

⁵Ñuca chaitataj pajtachichun nishcacunata, mandashcacunatapish pajtachinguichij. Chai mandashcacunata pajtachijcunami causanga. Ñucami Mandaj Dios cani.

⁶Maijan c'aripish quiquin familiamanta caj huarmihuanca ama chayarinacuchun. Ñucami Mandaj Dios cani.

⁷Cambaj yayata, mana cashpaca cambaj mamataca ama llatanashpa ricungui. Quiquin mama cashcamanta ama llatanashpa ricungui.

⁸Cambaj yayapaj huarmitaca ama llatanashpa ricungui. Cambaj yaya llatanashpa ricunami.

⁹Cambaj quiquin panitaca ama llatanashpa ricungui. Cambaj yayamanta cashpa, cambaj mamamanta cashpa panitaca huasi ucupurapi huacharishca cajpi, mana huasi ucupurapi huacharishca cajpipish ama llatanashpa ricungui.

¹⁰Cambaj churipaj ushushita cashpa, cambaj ushushipaj ushushita cashpa ama llatanashpa ricungui. Quiquin aichapura cashcamantami mana llatanashpa ricuna cangui.

¹¹Cambaj yayapaj huarmipaj ushushitaca ama llatanashpa ricungui. Cambaj yayapaj ushushi cashcamanta quiquin pani cashcamanta ama chashna rurangui.

¹²Cambaj yayapaj panitaca ama llatanashpa ricungui. Paica cambaj yayapaj huasi ucupurami.

¹³Cambaj mamapaj ñañataca ama llatanashpa ricungui. Paica cambaj mamapaj huasi ucupurami.

¹⁴Cambaj yayapaj huauquipaj huarmitaca ama llatanashpa ricungui. Paipaj huarmipajman ama quichquiyangui. Paica cambaj yayapaj huauquipaj huarmimi.

¹⁵Cambaj churipaj huarmita ama llatanashpa ricungui. Paica cambaj churipaj huarmimi. Paitaca ama llatanashpa ricungui.

¹⁶Cambaj huauquipaj huarmita ama llatanashpa ricungui. Paica cambaj huauqui llatanashpa ricunami.

¹⁷Mamandij ushushindijca ama llatanashpa ricungui. Paipaj churipaj ushushitapish, paipaj ushushipaj ushushitapish ama llatanashpa ricungui. Paicunaca quiquin familiapurallataj cashcamanta, chaita rurajpica yallitaj millaimi canga.

¹⁸Ñañandijtatajca cambaj huarmi cachun ama japingui. Cambaj huarmi causacujpirajca, ñañallatataj llatanashpa ricushpa ama ñañandijta p'iñanacuchingui.

¹⁹Quillanta shamuna yahuar shamucujpi mapalla huarmita llatanashpa ricunapaj ama paipajman c'uchuyanguichu.

²⁰Shujtajcunapaj huarmihuan ama chayarinacunguichu. Paihuan chayarinacushcamanta ama mapayanguichu.

²¹Cambaj churitaca Moloc nishca rurashcalla diosman cushpa ama rupachinguichu. Chashna rurashpaca, cambaj Taita Diospaj shutitami yanganchingui. Ñucami Mandaj Dios cani.

²²Huarmihuan siririj shinallatajca shuj c'arihuanca ama siriringuichu. Chaica yallitaj millananami.

²³Animalhuanca ama chayarinacunguichu. Paihuanca ama mapayanguichu. Shinallataj huarmipish animal paipi chayarichun animalpaj ñaupajpi ama ricuchichun. Manapish rurana cashcata ruraj millaimi canga.

²⁴Cai shina manapish ruranacunata rurashpaca ama mapayanguichijchu. Cancunapaj ñaupajmanta ñuca anchuchishpa shitana llajtacunaca tucui cai manapish ruranacunata rurashpa mapayajpimi,

²⁵llajtapish yallitaj millai mapa tucurca. Paicuna millaita rurashcata ñuca ricugrijpica, chai llajtaca chai llajtapi causajcunataca shungu tigrarcami.

²⁶Chaimanta cancunaca ñuca chaitataj pajtachichun nishcacunata, ñuca mandashcacunata huaquichishpa chai llajtapi causajcuna rurashca shina millananacunataca amataj ruranguichijchu. Israelcuna cashpapish, cancunapurapi causaj mana israelcuna cashpapish chai shina millananacunataca amataj ruranguichijchu.

²⁷Chai llajtaman cancuna manaraj chayajpimi, chai llajtapi causajcunaca chai shina millananacunata rurashpa causajpi, chai llajtaca mapayarca.

²⁸Cancuna millananata rurashpa chai llajtata mapayachijpica ñataj cancunatapish cancuna manaraj chayajpi, chaipi causajcunata shungu trigrashca shina cancunatapish shungu tigranman.

²⁹Maijanpish chai shina millananacunata rurajpica, chashna millananata rurajcunataca israelcunapuramanta anchuchishcami canga.

³⁰Cancunaca ñuca mandashcacunata huaquichinguichij. Cancuna manaraj chai llajtaman rijpi, chai llajtapi causajcuna paicunapaj millanana ruranacunata ruraj cashcataca amataj ruranguichijchu. Chai rurashcacunahuan ama mapayangapajmi mana rurana canguichij. Ñucami Mandaj Dios cancunapaj Dios cani” nircami.