Read Chimborazo Highland Quichua LEVÍTICO 21 Bible Online

LEVÍTICO 21 - Chimborazo Highland Quichua bible

LEVÍTICO 21

¹Mandaj Diosca Moisestaca: “Aaronpaj churi curacunataca cashna nishpa mandai: Cancunapurapi maijanpish huañujpi chai huañushcapi tuparishpa ama mapayachun.

²Quiquin mama cashpa, yaya cashpa, churi cashpa, huauqui cashpa huañujllapi tuparichun.

³Maijanpaj pani manaraj cazarashca cashpa, paipaj turipaj huasipi causacushpa huañujpica chai huañushcapipish tuparichunlla.

⁴Cancunapurapi ima mana cajcuna mapayashca shina ama mapayachun.

⁵Uma ajchatapish corona pamballata lluchuta ama rutuchichun. Barbas puntatapish ama utuchichun. Aichatapish ama chugrichichun.

⁶Cancunaca Taita Diospajlla cachun ch'icanchishcacuna, Diospaj shutita mana yanganchinapaj cajcuna, Mandaj Diosman cushcacunata rupachijcuna, Mandaj Diosman tandata cujcunami canguichij. Chaimanta ima jucha illajllami cana canguichij.

⁷Shinallataj huainayashcahuan causaj huarmihuanpish, millaita ruraj huarmihuanpish, cusa shitashca huarmihuanpish ama cazarachun. Curaca Taita Diospajllata ruranapaj ch'icanchishca cashcamantami chashna cana can ninmi ningui.

⁸Ñucaman tandata cujcuna cashcamanta paicunataca jucha illaj cana cashcatami yuyana cangui. Cancunataca ñucami jucha illajta rurarcani. Cancunata Mandaj Diosca jucha illajmi cani. Cancunata jucha illajta rurajca jucha illajmi cani. Chaimanta paicunapish cambajca ima jucha illajcunami cana can.

⁹Curapaj ushushi huainayashpa callarishpaca, paipaj yayatami pingachin. Chaimanta paica rupachishcami canga.

¹⁰Curacunata mandaj curaca, Diospajlla ch'icanchishca cashcata ricuchinapaj aceitehuan umapi churashca cashcamanta, Diospajlla ucuman yaicunapaj churarinata churarij cashcamanta paica paipaj uma ajchatapish alli allichirichun, paipaj churanacunatapish ama lliquirichun.

¹¹Maijan huañushca siricuj ucumanpish ama yaicuchun. Paipaj yayamanta cashpa, paipaj mamamanta cashpapish mana mapayanachu can.

¹²Taita Diospajlla ch'icanchishca cashcata ricuchingapaj churana aceitehuan umapi churashca cashcamanta Taita Diospajlla ch'icanchishca ucumantaca ama llujshichun. Taita Diospajlla ch'icanchishca ucutapish ama yanganchichun. Ñucami Mandaj Dios cani.

¹³Curaca paipaj huarmi cachunca pihuan manaraj chayarinacushca huarmita japichun.

¹⁴Viuda huarmita, cusa shitashca huarmita, millaita ruraj huarmita, huainayashcahuan causaj huarmitaca paipaj huarmi cachunca ama japichun. Ashtahuanpish paipaj huarmi cachunca pihuan manaraj chayarinacushca quiquinpura huarmita japichun.

¹⁵Chashna rurashpami paicunapura huahua huahuacunaca mana yanganchishca canga. Mandaj Dios ñucami cancunata jucha illajta ruraj cani” nircami.

¹⁶Mandaj Diosca Moisesta mandashpaca:

¹⁷“Aarontaca cashna mandai: Cancunapaj Taita Diosman cuna cashca micunata cungapajca, cambaj huahua huahuamantaca cunanpish shamuj punllacunapish ima mana tucushcacunalla c'uchuyachun.

¹⁸Maijanpish ima tucushca runa cashpaca: Ñahui mana ricuj cashpa, cojo cashpa, mana cashpaca paipaj cuerpopi ima illaj cashpa,

¹⁹chaqui p'aqui cashpa, maqui p'aqui cashpa,

²⁰curcu cashpa, uchilla cashpa, ñahuipi yuraj tiyarishca cashpa, carachalla cashpa, sisulla cashpa, paipaj lulun llapirishca cashpaca mana c'uchuyai tucunchu.

²¹Aarón curapaj huahua huahuacuna cashpapish ima tucushca cajcunaca, Mandaj Diosman rupachishpa cunamanca ama c'uchuyachun. Chashnacunaca ima tucushca cashcamanta Taita Diosman micunata cunamanca manataj c'uchuyangachu.

²²Chashna cashpapish Diospajlla ch'icanchishpa Diosman cushca tandata, ima shujtajcunatapish Diosman cushcacunataca micuchunlla.

²³Ashtahuanpish ñucapajlla ch'icanchishca ucuta ama yangachingapajmi, ima tucushcacunaca linsohuan jarcachishca huashaman, altarmanca mana c'uchuyai tucuncuna. Ñucami cancunata ima jucha illajta ruraj Mandaj Dios cani ni” nircami.

²⁴Chashnami Moisesca Aarontapish, paipaj churicunatapish, tucui israelcunatapish mandarca.