Read Chimborazo Highland Quichua LEVÍTICO 23 Bible Online

LEVÍTICO 23 - Chimborazo Highland Quichua bible

LEVÍTICO 23

²“Tucui israelcunata cashna nishpa mandai: Mandaj Diosta yuyarina jatun fiestacunataca, cai punllacuna ruranguichij. Chai fiestacunaca Diospajlla cashcamanta chaimanca tucuicunata cayanguichij.

³Sujta punllacunata trabajanguichij. Canchis punllapica samaringuichij. Chaipica tucuita cayashpa Diospajlla tandanacuimi canga. Chai punllapica sinchi trabajocunataca imata ama ruranguichij. Chai punllacunapica cancuna maipi causajpipish Mandaj Diospajlla ch'icanchishca samana punllami canga.

⁴Tucuicuna Mandaj Diosta yuyaringapaj fiestataca ñuca mandashca punllapitaj ruranguichij.

⁵Huata callaripaj punta quilla chunga chuscu punlla tutayamuitaca Mandaj Diospaj Pascuami.

⁶Chai quillapaj chunga pichca punllapica, Mandaj Diosta alli nishpa, levadura illajlla tandata micuna jatun fiestami canga. Levadura illajlla tandataca canchis punllata micunguichij.

⁷Chai fiesta callari punllapica tucuita cayashpa Diospajlla tandanacuita charinguichij. Sinchi trabajocunataca imata ama ruranguichij.

⁸Mandaj Diosman rupachishpa cunataca canchis punllata cunguichij. Tucuri canchis punllapica tucuita cayashpa Diospajlla tandanacuimi canga. Chai punllapica sinchi trabajocunataca imata ama ruranguichij ningui” nircami.

⁹Mandaj Diosca Moisesta mandashpaca:

¹⁰“Israelcunataca cashna mandai: Cancunaman ñuca cushca allpaman chayashpa, cancunapaj granota tandashpaca punta p'ucushca granotaca ñucaman cuna cashcamanta ñucamanraj cungapaj shuj gavillata curapajman apanguichij.

¹¹Chai gavillata huichi ricuchishpa cuyuchishpa Mandaj Diosman cura cujpimi, cancunataca chasquinga. Chai gavillataca samana punlla cayandijta huichi ricuchishpa cuyuchichun.

¹²Chai gavillata Diosman cui punllaca shuj huatata charij ovejata cushpa rupachichun. Chaica Mandaj Diosman tucuita cushpa tucui rupachina cashcamanta ima mana tucushca cachun.

¹³Mandaj Diosman cuna cashcata cungapajca ashtahuan alli cutata shuj efamanta chungapi chaupishca, ishqui parteta aceitehuan chapushcata apamuchun. Chaitaca Mandaj Diosman cushpa rupachijpi mishquijllata ashnaj cachun cungapaj apamuchun. Mandaj Diosman cushpa tallina vinotapish shuj hinmanta chuscupi chaupishca shuj parteta apamuchun.

¹⁴Cancunapaj Taita Diosmanraj punta cuna cashcamanta chaita manaraj cushpaca, chai cuna punllacama tandatapish, canchashca granotapish, llulluraj espigatapish amaraj micunguichij. Cai mandashcacunaca, cancuna maipi causashpapish, huahua huahuacuna chaitataj pajtachicuchunlla mandashcami.

¹⁵Samana punlla cayandijmanta, gavillata huichi ricuchishpa cuyuchishpa cushca punllamanta canchis semanacunata yupanguichij.

¹⁶Canchis semana tucuri samana punlla cayandij punllacamaca pichca chunga punllacunata yupanguichij. Chaipica mushuj granocunata Mandaj Diosman cunguichij.

¹⁷Mandaj Diosman huichi ricuchishpa cuyuchishpa cungapajca, cancunapaj huasicunamanta ishqui tandacunata apanguichij. Chaicunaca ashtahuan alli cutata shuj efamanta chungapi chaupishca shuj parteta levadurahuan rurashpa cusashca cachun. Chaica cozicha callarinapaj Mandaj Diosman cushcami canga.

¹⁸Chai tandacunahuanca shuj huatayuj, ima mana tucushca canchis c'ari ovejacunata, shuj bizita, ishqui carnerotapish cunguichij. Chaicunaca Mandaj Diosman tucuita cushpa tucui rupachishca cachun. Chaicunataca chaquishca granohuanpish, tallina vinohuanpish cuchun. Chashna cushpa rupachijpimi Mandaj Diospajca mishquijllata ashnacuj canga.

¹⁹Juchamanta cuna cashcataca shuj chivota cunguichij. Sumaj causaimantaca shuj huatayuj ishqui ovejacunata cunguichij.

²⁰Chai ishqui malta ovejacunataca punta p'ucushca granocunandij, cura huichi ricuchishpa cuyuchishpa Mandaj Diosman cuchun. Chai cushcacunaca Diospajlla ch'icanchishca cashcamanta curapajmi canga.

²¹Chai punllallataj Diospajlla tandanacuiman cayanguichij. Chai punllapica sinchi trabajocunataca imata ama ruranguichijchu. Tucui cai mandashcacunaca cancuna maipi causashpapish cancunapaj huahua huahua chaitataj pajtachicuchunlla mandashcami.

²²Cambaj allpapi granota tandai punllacuna tandacushpaca, ama maipi tiyajta tucuita tandanguichijchu. Pambapi urmashca granotapish ama pallanguichijchu. Chaicunataca imata mana charij huajchacuna, shujtaj llajtamanta shamujcunapaj saquinguichij. Ñucami Mandaj Dios cancunapaj Dios cani ninmi ni” nircami.

²³Mandaj Diosca Moisesta mandashpaca:

²⁴“Israelcunata cashna nishpa mandai: Canchis quillapaj callari punllapica samana punllami canga. Chai punllapica trompetacunapi tocashpa tucuita cayashpa Taita Diosta yuyarishpa Diospajlla tandanacuita charinguichij.

²⁵Sinchi trabajocunataca imata ama ruranguichijchu. Chai punllapica, Mandaj Diosman rupachishpa cunguichij ni” nircami.

²⁶Mandaj Diosca Moisesta mandashpaca:

²⁷“Chai canchis quillapaj chunga punllapica, Dios perdonana punllami canga. Chai punllapica tucuita cayashpa, tucui almahuan llaquirishpa Diospajlla tandanacuita charinguichij. Mandaj Diosman rupachishpa cunatapish cunguichij.

²⁸Mandaj Dios cancunata perdonana punlla cashcamanta ima trabajota ama ruranguichijchu. Mandaj cancunapaj Dioshuan alli tucuna cashcamantami chashna rurana canguichij.

²⁹Chai punllapi mana ayunajcunataca tucuicunatami israelcunapuramanta anchuchishca canga.

³⁰Chai punllapi maijanpish ima trabajota rurajpica, chai runataca ñucami israelcunapuramanta chingachisha.

³¹Chashna cashcamanta chai punllapica ima trabajota ama ruranguichij. Chaitataj pajtachichun mandashcaca, cancunapaj huahua huahuacuna pajtachicuchunlla mandashcami. Chaimanta maipi causashpapish chaitataj pajtachicunguichijlla.

³²Chai punllaca cancuna samana punllami. Chaipica ayunanguichij. Chai quillallapitaj iscun punlla chishita callarishpaca, cayandij chishi chai horascamallataj samarichun” nircami.

³³Mandaj Diosca Moisesta mandashpaca:

³⁴“Israelcunaman cashna nishpa huillai: Chai canchis quillallapitaj chunga pichca punllapica, ramacunahuan rurashca chugllacunata rurashpa canchis punllacunata Mandaj Diosta alli nishpa jatun fiestata ruranguichij.

³⁵Fiesta callari punllapica tucuita cayashpa Diospajlla tandanacuimi canga. Chaipica sinchi trabajocunataca imata ama ruranguichijchu.

³⁶Chai canchis punllacunapipish Mandaj Diosman rupachishpa cunguichij. Pusaj punllapica tucuita cayashpa Diospajlla tandanacuita charinguichij. Chai punllapipish Mandaj Diosman cushpa rupachinguichij. Fiesta punlla cashcamanta chai punllapica sinchi trabajocunataca imata ama ruranguichijchu.

³⁷Mandaj Diospajlla jatun tandanacuita rurangapaj cayashpaca caicunapajmi: Mandaj Diosman cushpa rupachinapaj, tucuita cushpa tucui rupachinapaj, chaquishca granocunata cungapaj, animalta huañuchishpa Diosman cungapaj, vinota tallingapajmi tandachina canguichij. Chaicunataca maijan punllallapi cunapimi huashan huashan cuna canguichij.

³⁸Samana punllacunapi Mandaj Diosman cuna cashcata cushca jahua, cusha nishcatapish pajtachishca jahua, cushca cashpapish cushca jahuami chaicunataca rurana canguichij.

³⁹Shinallataj canchis quillapaj chunga pichca punllapica, cancunapaj chagramanta p'ucushca granocunata ña tucui tandai punllapica Mandaj Diosta pagui nishpa canchis punllacunata fiestata ruranguichij. Chai fiesta callari punllapipish, tucuri pusaj punllapipish tucuicunapaj samarinami canga.

⁴⁰Chai fiesta callari punllapica tucuimanta yalli alli yuracuna p'ucushca granocunatapish, palmera ramacunatapish, p'angasapa yura ramacunatapish yacu c'uchupi tiyaj sauce ramacunatapish japishpa canchis punllacunata Mandaj Dios cancunapaj Taita Diospaj ñaupajpi cushicunguichij.

⁴¹Mandaj Diospaj fiestataca cada huata canchis punllacunata ruranguichij. Cancunapaj huahua huahua pajtachicuchunlla mandashcami. Chaitaca huatapaj canchis quillapi ruranguichij.

⁴²Chai punllacunapica canchis punllacunata ramacunahuan rurashca chugllacunapi causanguichij. Israeltaj cajcunaca chai punllacunapica chai carpa huasita shayachishcallapi tucuicuna causanguichij.

⁴³Cancunata Egiptomanta llujshichimucushpa, carpa huasicunapi causachun ñuca churashcata cancunapaj huahua huahuacuna yachachunmi chashna rurana canguichij. Ñucami Mandaj Dios cancunapaj Taita Dios cani ni” nircami.

⁴⁴Chashna mandashca shinallatajmi Moisesca Mandaj Diosta yuyaringapaj jatun fiestata ima punllallapi ruranataca tucui israelcunaman yachachirca.