Read Chimborazo Highland Quichua LEVÍTICO 25 Bible Online

LEVÍTICO 25 - Chimborazo Highland Quichua bible

LEVÍTICO 25

¹Mandaj Diosca Sinaí urcupi Moisesta mandashpaca cashnami nirca:

²Israelcunata mandashpa cashna ni: Cancunaman ñuca cugrin llajtaman ña chayashpaca, Mandaj Diosta alli nishpa allpacunapica ama tarpushpa samachinguichij.

³Cambaj allpapica sujta huatacunallata tarpungui. Cambaj uva chagratapish sujta huatacunallata allichingui. P'ucushca uvacunatapish chai huatacunallapi tandangui.

⁴Ashtahuanpish canchis huatapica ñucata alli nishpaca allpaca samaringami. Cambaj allpapipish ama tarpungui. Uva chagratapish ama allichingui.

⁵Cozichashcapi ñau huiñashcatapish ama tandangui. Cambaj uva chagramantapish uvacunata ama tandangui. Chai huataca allpa samarina huatami canga.

⁶Allpacunata samachicui huatapi ñau p'ucushca granoca cambaj, cambajta ruraj c'aripaj, cambajta ruraj huarmipaj, can huiñachishcapaj, canhuan causaj mana israelpajpish micunapajmi canga.

⁷Chai allpapi p'ucushca granocunaca cambaj animalpish, cambaj llajtapi tiyaj shujtaj animalpish micunapajmi canga.

⁸Cada canchis huatapi samarishca huatacunataca, canchis huatacama yupashcaca semana huata nishcami tucunga. Semana huatacuna canchista tandachishpa yupajpica, chuscu chunga iscun huatacunami canga.

⁹Canchis quillapaj chunga punllapica, sinchita trompetapi tocachinguichij. Juchacunata perdonana punllapi, chashna tucui cancunapaj llajtapi trompetata tocachinguichij.

¹⁰Pichca chunga huatapica chai huatataca chashna Diospajlla ch'icanyachinguichij. Israel llajtapi tucui causajcunapajca, tucui imamantapish cacharirina huatami nishpa huillanguichij. Chai huataca imamantapish cacharirina huata cashcamanta tucuicuna quiquin allpaman, quiquin familiapajman tigrachun.

¹¹Pichca chunga huatapica imamantapish cacharirina huata cashcamanta ama tarpunguichijchu. Allpapi ñau huiñashca granocunatapish ama tandanguichijchu. Cancunapaj uva chagramantapish uvacunata ama pallanguichijchu.

¹²Chai huataca imamantapish cacharirina huata cashcamanta, cancunapajca Diospajlla ch'icanchishcami canga. Ñau granocunallata micunguichij.

¹³Imamantapish cacharirina huatapica, cada quiquin cancunapaj quiquin allpacunata japingapaj tigranguichij.

¹⁴Maijanpish shujtajman imata c'atushca cashpa, mana cashpaca shujtajpaj maquimanta imata randishca cashpapish caishuj chaishuj ama llaquichinacushpa,

¹⁵imamantapish cacharirina huatapaj mashna huata illashcata yupashpa pagachun. Shinallataj c'atujpish mashna huatahuan tarpungapaj cashcata yupashpa ricushpalla c'atuchun.

¹⁶Tauca huatacunata tarpunaraj cajpica, achca huatacunata tarpunaraj cashcata yupashpa pagachun. Mana achca huatacunata tarpuna cajpica, chai huatacunallamanta pagachun.

¹⁷Maijanpish pita ama umanguichijchu. Ashtahuanpish cancunapaj Taita Diosta manchanguichij. Ñucami Mandaj Dios cancunapaj Dios cani.

¹⁸Ñuca chaitataj pajtachichun nishcata, ñuca mandashcacunata pajtachina yuyailla tucushpa chaitataj ruraichij. Chashna rurashpaca chai llajtapica, imata mana manchashpami causanguichij.

¹⁹Chai llajtapish alli granocunatami p'ucunga. Mana nijtami micunguichij. Chai llajtapica imata mana manchashpami causanguichij.

²⁰Cancunaca: Canchis huata tucujpica, ña mana tarpushpaca, ima p'ucushca granocunatapish mana tandashpaca ¿Imatataj micushunri? ninguichijchari.

²¹Ashtahuanpish sujta huatapi tarpujpimari, ñucaca tucuimanta yalli achca granocunata p'ucuchisha. Chai huatapica, quimsa huatacama micunapajmi p'ucunga.

²²Pusaj huatapi tarpushca granocunaca cati iscun huatapi cozichanalla tucungacamaca ñaupa huataman huaquichishca granocunatami micunguichij.

²³Allpaca ñucapaj cashcamanta, nunca mana tigrachinapajca mana c'atui tucunguichijchu. Cancunaca chai allpapica shujtaj llajtamanta purij runa shinalla, shujtaj llajtamanta shamushcalla shinami canguichij.

²⁴Chaimanta maijanpaj allpata can randishpa charicushpaca, chai allpayujllataj tigra randisha nijpica, paillamantaj tigra c'atunguilla.

²⁵Cancunapurapi maijanpish huajchayashpa pai charishca maijan allpata c'atujpica allpata randijman paipaj c'uchulla familia cullquita tigrachishpa, chai allpataca tigrachichichun.

²⁶Chai runa c'atushca allpamanta paipaj randi cullquita cutichij, c'uchulla familia mana tiyajpica, c'atujllataj cullquita tandashpa cutichi tucushpaca,

²⁷chai allpataca, tigrachina huatapaj mashna huata illashcata yupashpa, illashca huatacunamantaca mashnata cutichina cashcallata cutichishpa c'atujllataj chai allpataca japichunlla.

²⁸Mana cashpaca c'atujca randijman cullquita cutichingapaj mana pajtata charingachari. Mana charishcamanta mana cutichi tucujpica, chai allpaca imamantapish cacharirina huatacama randijpajllataj saquirichun. Imamantapish cacharirina huata pajtajpica, chai allpataca c'atujllataj japichunlla.

²⁹Maijanpish muyujta pircashca pueblopi huasita charishpa, chai huasita c'atushpaca manaraj huata tucujpi, mana cashpaca huata jundapi chai huasimanta, randijman cullquita cutichishpaca c'atujllataj japi tucunmi.

³⁰Shina cajpipish muyundijta pircashca pueblopi charishca huasita c'atujca shuj huata tucungacamapish, randijman cullquita mana tigrachishpaca chai huasitaca mana japingachu. Ashtahuanpish randijpajllatajmi tucui paipaj causaipaj saquiringa. Pai huañujpipish randijpaj huahua huahuacunapajllatajmi saquiringa. Imamantapish cacharirina punllapipish c'atujca, chai huasitaca mana japi tucungachu.

³¹Shinallataj pueblo muyundijta mana pircashca llajtacunapi charishca huasicunaca, tarpuna allpacunata shinallataj ima punllapish cullquita cutichishpaca japichunlla. Tucui imamantapish cacharirina huatapica cullquita cutichishpa c'atujllataj japichunlla.

³²Levitacunapaj pueblocunapica paicuna c'atushca huasicunataca paicunapaj huasicuna cashcamanta, ima horapish tigrachi tucunllami.

³³Israelcunapurapica levitacuna causana pueblopimi paicunapaj quiquin huasita charingacuna. Chaimanta levitacunaman huasita randishca cashpaca imamantapish cacharirina huatapica c'atujllamantaj tigrachishpaca chai huasimantaca llujshichunlla.

³⁴Levitacuna causan pueblo muyundij michina allpacunataca, paicunapaj tucui causaipi paicuna causachun cushca cashcamanta ama c'atuchun.

³⁵Cancunapuramanta maijan huajchayashpa cambajman shamujpica paitaca chasquinguilla. Paica shujtaj llajtamanta purij runa shina, shujtaj llajtamanta shamushca runa shina canhuan causangallami.

³⁶Paiman cullquita mañachishpapish ama huahua cullquita mañangui. Ashtahuanpish cambaj Taita Diosta manchangui. Chai huajcha runaca canhuan causangallami.

³⁷Cullquita can mañachishpaca, ama huahua cullquita mañangui. Micunacunata fiyachishpapish ama yallihuan japingui.

³⁸Ñucaca Mandaj Dios cancunapaj Taita Diosmi cani. Canaanta cancunaman cungapajmi, cancunataca Egiptomanta llujshichimurcani. Cancunapaj Dios cangapajmi chashna llujshichimurcani.

³⁹Cancunapuramanta maijan canhuan causacushpa ashtahuan huajchayangachari. Chashna cashpa canman c'aturijpica, cambajta ruranapaj randishca runata shinaca ama trabajachingui.

⁴⁰Paica can huiñachishca shina, caru llajtamanta shamushca shinami canhuan causanga. Paica imamantapish cacharirina punllacamami cambajta rurashpa causanga.

⁴¹Imamantapish cacharirina huatapi, paica paipaj huahuacunandij cambaj huasimanta llujshishpa paipaj familiacunapajman rishpaca paipaj yaya cushca allpallamantajmi tigranga.

⁴²Paicunaca ñucapajta rurajcunami. Paicunataca ñucami Egiptomanta llujshichimurcani. Chaimanta paicunaca huatashca shina shujtajcunapajta rurangapajca mana c'aturi tucuncunachu.

⁴³Chaimanta paitaca ama llaquinayajta imatapish rurachishpa charinguichu. Ashtahuanpish cambaj Taita Diosta manchangui.

⁴⁴Cancunapaj llajta muyundijpi cajcunallami cancunapajta huatashca shina ruraj cai tucuncuna. Paicunatami huatashca shina ruraj c'aricuna huarmicuna cachun randina canguichij.

⁴⁵Caru llajtamanta pasacushpa cancunahuan causacujpaj huacharishca huahuacunallatami huatashca shina ruraj cachun randi tucunguichij. Paicunami cancunapajtaca huatashca shina ruraj cai tucuncuna.

⁴⁶Cancunapajta ruraj cachun randishcacunataca, cancuna huañushpaca cancunapaj huahuacunaman saquinguichij. Paicunami tucui causaipi cancunapaj huahuacunapajta rurashpa causangacuna. Cancunapurallataj cashcamanta, ima ruranapipish ama llaquinayajta charinguichijchu.

⁴⁷Shujtaj llajtamanta pasacuj runa cancunapurapi causaj, mana cashpaca shujtaj llajtamanta shamushca runa cancunapurapi causacushpa achcata charij tucungachari. Chai runapaj huasi c'uchullapi causacuj shuj Israel runa huajchayashpa chai runapajta ruraj tucungapaj c'aturingachari. Mana cashpaca, chai runapaj familiaman c'aturingachari.

⁴⁸Chashna c'aturishca cashpapish randijman cullquita tigrachishpaca llujshi tucunmi. Mana cashpaca maijan paipaj huauqui llujshichichun.

⁴⁹Mana cashpaca paipaj tio cashpa, paipaj tiopaj churi cashpa, paipaj c'uchulla familia cashpapish cullquita tigrachishpaca llujshichichunlla. Paillataj cullquita tigrachi tucushpapish, paillataj tigrachishpa llujshichunlla.

⁵⁰Randijhuanca cashna allichichun: C'aturishca punllamanta imamantapish cacharirina punllacama mashna huata tucushcata yupachun. Mashnapi c'aturishcatapish, c'aturishca punllamanta mashna huatata paipajta rurashcatapish yupachun. Chaitaca cancunapaj llajtapi cullqui jahua trabajajcunaman punllanta mashna cullquita cuj cashca shinapi yupachun.

⁵¹C'aturij runaca achca huatacunata paipajta rurashpa causana illajpirajca, randijmanca chai tucui huatacunamanta paipaj cullquita cutichichun.

⁵²Imamantapish cacharirina huatacunapaj asha huatacunalla illajpica, chai huatacunallamanta mashnata cutichina cashcata cutichichun.

⁵³Paitaca cullqui jahua trabajanapaj cada huatapajlla ari nichishcata shinalla trabajachichun. Paitaca ama maipish cachun llaquichishpa mandachun.

⁵⁴C'aturishcamanta imamantapish cacharirina huatacunacama maijan huatapi mana cullquita tigrachi tucushcamanta mana llujshi tucushpaca, imamantapish cacharirina huatapica paipish paipaj huahuacunapish llujshichunlla.

⁵⁵Israelcunaca ñucapajta rurajcunami, ñucapajta rurajcunatajmi. Paicunataca ñucami Egiptomanta llujshichimurcani. Ñucami Mandaj Dios cancunapaj Taita Dios cani.