Read Chimborazo Highland Quichua LEVÍTICO 3 Bible Online

LEVÍTICO 3 - Chimborazo Highland Quichua bible

LEVÍTICO 3

¹Alli causaimanta Mandaj Diosman animalta rupachishpa cucushpaca c'ari huagrata cashpa, huarmi huagrata cashpa, ima mana tucushcata cuchun.

²Chai cucujca Mandaj Diosman cushca animalpaj uma jahuapi paipaj maquita churashpa, Mandaj Dioshuan tupana carpa huasi pungupi huañuchichun. Yahuartaca, Aronpaj churi curacuna altar muyundijta tsirapachun.

³Mandaj Dioshuan alli cangapaj animalta cushpa rupachicushpaca, Mandaj Diosman cushpa rupachishca shinallataj cachun. Chunllullicunapi tiyaj huiratapish, huijsapi tiyaj tucui huiratapish,

⁴ishqui riñoncunatapish, chaipi tiyaj huiratapish, lomopi tiyaj huiratapish, yana shungupi tiyaj huiratapish, chunllullicunapi tiyaj huiracunandijllataj yana shungundij tucuita llujshichichun.

⁵Chaicunataca, Mandaj Diosman tucuita cushpa tucui rupachina altar jahuapi Aaronpaj churicuna rupachichun. Chashna cujpimi Mandaj Diospajca sumaj mishquijlla ashnacuj canga.

⁶Mandaj Dioshuan alli cangapaj Mandaj Diosman ovejata cushpa rupachicushpaca, c'ari ovejata cashpa, huarmi ovejata cashpa ima mana tucushcata cuchun.

⁷Mandaj Diosman malta ovejata cucushpaca, Mandaj Diospaj ñaupajman apamushpa,

⁸cucujca chai ovejapaj uma jahuapi paipaj maquita churachun. Chai q'uipaca Mandaj Dioshuan tupana carpa huasi ñaupajpi chai ovejataca huañuchichun. Yahuartaca Aaronpaj churicuna altar muyundijta tsirapachun.

⁹Mandaj Dioshuan alli cangapaj Mandaj Diosman cushpa rupachicushpaca, Mandaj Diosman cushpa rupachishca shinallataj cachun. Ovejapaj chupataca c'uchupi p'itichun, chunllullipi tiyaj tucui huiratapish, huijsapi tiyaj tucui huiratapish,

¹⁰ishqui riñoncunatapish, chaicunapi tiyaj huiratapish, lomopi tiyaj huiratapish, yana shungupi tiyaj huiratapish, chunllullicunapi tiyaj huiracunandijllataj yana shungundij tucuita llujshichichun.

¹¹Tucui chaicunataca curami altar jahuapi rupachinga. Chashna cujpimi Mandaj Diospajca mishquijllata ashnacuj micui canga.

¹²Mandaj Diosman chivota cucushpaca, Mandaj Diospaj ñaupajman apamushpa,

¹³chai chivopaj uma jahuapi paipaj maquita churashpa, Mandaj Dioshuan tupana carpa huasi ñaupajpi huañuchichun. Yahuartaca, Aaronpaj churi curacuna altar muyundijta tsirapachun.

¹⁴Chai cushcaca Mandaj Diosman cushpa rupachishpa cushca shinallataj cachunca chunllullicunapi tiyaj huiratapish, huijsapi tiyaj tucui huiratapish,

¹⁵ishqui riñoncunatapish, chaipi tiyaj huiratapish, lomopi tiyaj huiratapish, yana shungupi tiyaj huiratapish riñoncunandij llujshichichun.

¹⁶Chai q'uipaca tucui chaicunataca altar jahuapi cura rupachichun. Chaimi Mandaj Diospajca sumaj micuita rupachishpa cushca mishquijllata ashnacuj canga. Tucui chai huiraca Mandaj Diospajllami.

¹⁷Tucui cai mandashcaca cancunapish, cancunapaj huahua huahuacunapish maipi causashpapish huiratapish, yahuartapish amataj micuchun huiñaipaj mandashcami nircami.