Read Chimborazo Highland Quichua JEREMÍAS 1 Bible Online

JEREMÍAS 1 - Chimborazo Highland Quichua bible

JEREMÍAS 1

¹Cai shimicunaca, Hilcías curapaj churi Jeremías huillashca shimicunami. Hilciasca, Benjamín aillupaj llajtapi caj Anatot pueblopi causaj curacunapurami carca.

²Mandaj Diosca Jeremiastaca, Amonpaj churi jatun mandaj Josías, Judá llajtata chunga quimsa huatata mandacujpimi huillachi callarirca.

³Shinallataj Josiaspaj churi Joacim shuti jatun mandaj Judá llajtata mandacui huatacunapishmi huillachirca. Josiaspaj caishuj churica, Sedequías shutimi carca. Paica Judá llajtataca, ñami chunga shuj huatata mandacurca. Chai huatapaj pichca quillapimi, Jerusalenpi causajcunataca prezu aparcacuna. Chai huatapi pai mandana tucuringacamami, Diosca Jeremiastaca huillachirca.

⁴Mandaj Diosca ñucataca cashnami nirca:

⁵“Manaraj cambaj mamapaj huijsapi huiñachishpami, cantaca ña ricushcata charicurcani. Manaraj huacharijpimi, cantaca ñucallata servichun agllarcani. Cantaca tucui llajtacunapi causajcunaman ñuca ima nishcata huillajtami rurarcani” nircami.

⁶Shina nijpica, ñucaca cashnami nircani: “¡Mandaj Jatun Dioslla, ama chashna nihuaichu. Ñucaca alli rimanallatapish manaraj yachaj huambramari cani!” nircanimi.

⁷Shina nijpipish, Mandaj Diosca cashnami nirca: “Imata rurachun ñuca cachajpipish, canca ruragringuillami. Ñuca imata huillagrichun nijpipish huillanguillami.

⁸Canca ama pita manchaichu, ñucami canhuan casha. Ñucami cantaca imamantapish quishpichisha” nircami Mandaj Diosca.

⁹Chashna nishpaca paipaj maquita chutashpami, Mandaj Diosca ñuca shimipi tupashpa cashna nirca: “Ñuca shimicunatami huillachun cambaj shimipi churani.

¹⁰Riqui, cunantajmi cantaca llajtacunata jatun mandajcunatapish, llajtacunapi causajcunatapish sapimanta llujshichichun, urmachishpa chingachichun, cutin shayachichunpish, llajtacunata cutin tigrachichunpish cantaca churani” nircami.

¹¹Chai q'uipaca Mandaj Diosca ñucataca: “Jeremías, ¿imatataj ricungui?” nishpa tapujpi, ñucaca: “Shuj almendro yura ramatami ricuni” nircani.

¹²Shina nijpica Mandaj Diosca: “Allimi ricushcangui. Ñuca canta imallata huillachishcataca utcami pajtachigrini” nircami.

¹³Chai q'uipapish, Mandaj Diosca cutinllatajmi ñucataca: “¿Imatataj ricungui?” nishpa tapujpi, ñucaca: “Janajpi shuj manga t'imbushpa, ñalla jicharigrijtami ricuni” nircanimi.

¹⁴Shina nijpica, Mandaj Diosca cashnami nirca: “Janaj lado llajtamantami cai tucui llajtapi causajcunapajca, jatun llaqui tallirimugrin.

¹⁵Ñuca, Mandaj Diostajmi janaj lado llajtacunapi causaj ch'ican ch'ican runacunataca, tandanacushpa shamuchun mandani. Chai llajtacunata jatun mandajcuna shamushpami, tucuicuna cai Jerusalén pueblo pungu ñaupaj pambapi macanacungapaj tiyaringacuna. Cai jatun pirca huashanij tucui muyundijtami chapangacuna. Cai Judá llajta tucui pueblocunapimi, chashna macanacungapaj shayaringacuna.

¹⁶Cai tucui pueblocunapi causajcunatami, paicunallataj ñucata saquishpa millaita rurashcamantaca, chashna llaquichigrini. Paicunaca quiquin maquillahuantaj rurashca dioscunatamari inciensota rupachishpa adorarcacuna.

¹⁷Quiquinca alli chumbillirishpa shayarishpa, paicunataca ñuca imallata rimachun nishca shina rimanguilla. Paicunapaj ñaupajpi shayarinataca ama manchanguichu. Ñataj paicuna manchachichun, paicunapaj ñaupajpi quiquinllata saquiman.

¹⁸Cunan punllatajmi, cantaca muyundijta jatun pircayuj pueblota shina, fierro pilarta shina, bronce patata shina pi mana cuyuchipaj cachun churani. Cai Judá llajtapi causajcunaca quiquintaca, jatun mandajcuna cashpapish, paicuna churashca mandajcuna cashpapish, curacuna cashpapish, tucui cai llajtapi causajcuna cashpapish, mana imata rurai tucungachu.

¹⁹Quiquinhuan macanacungapaj shayarishpapish, quiquintaca manataj mishangacunachu. Ñucami quiquinhuan casha, ñucami quiquintaca imamantapish quishpichisha” nircami Mandaj Diosca.