Read Chimborazo Highland Quichua JEREMÍAS 10 Bible Online

JEREMÍAS 10 - Chimborazo Highland Quichua bible

JEREMÍAS 10

¹Israelcuna, Mandaj Dios cancunata ima nishcata uyaichij.

²Mandaj Diosca cashnami nin: “Caishuj llajta runacuna ima rurashcataca ama catichijchu. Jahua pachapi ima ricurijpipish, ama caishuj llajta runacuna shina manchaichijchu.

³Caishuj llajta runacunaca yangatamari yuyarishpa causancuna. Sacha caspita p'itishpami, yachaj runaman cushpa, escoblohuan sumajta allichishpa diosta rurachincuna.

⁴Chai q'uipaca cullquihuan, curihuan jahuata churashpami, ama cuyurichun clavohuan martillohuan alli shayachincuna.

⁵Maipi churajpipish palmera yura shayacuj shina, upalla shayacunllami. Mana purij cajpimi, maimanpish aparishpa apancuna. Chaicunataca ama manchaichijchu. Chaicunaca ima llaquitapish, ima allitapish mana rurai tucunchu” ninmi.

⁶Mandaj Dioslla, can shina tucuita rurai tucujca, pi shujtaj mana tiyanchu. Canca jatun Diosmari cangui.

⁷Tucui llajtacunata Jatun Mandajlla, ¿cantaca pitaj mana manchangari? Tucui cai pacha llajtacunapi causaj jatun yachajcunapurapipish, tucui jatun mandajcunapurapipish can shina jatunca mana tiyanchu.

⁸Tucui paicunaca upacunami, imata mana yachajcunami. Paicunapaj yanta caspicunaca, imata mana yachachi tucunchu.

⁹Paicunapaj dioscunaca Tarsis pueblomanta tacashca cullquita apamushpa, Ufaz llajta curita apamushpa rurashcallami. Alli yachajman cushpami, yacuyachishpa diosta rurachincuna. Chaimantaca tucui laya churanacunata ahuanata yachaj runacuna ahuashca morado churanacunata, puca churanacunatami churachincuna. Tucui chaicunaca yachaj runacuna rurashcallami.

¹⁰Ashtahuanpish Mandaj Diosca Diostajmari. Paica huiñaita Jatun Mandajmi, causaj Diosmari. Pai p'iñarijpica, allpapish chujchunmi, llajtacunapi causajcunapish mana causai tucunchu.

¹¹Israelcuna, cashna nichigari: “Manapish cai pachata, jahua pachata ruraj dioscunaca allpamanta anchuchishca cachun. Chaipica shujllapish ama saquirichun” nichigari.

¹²Mandaj Diosmari tucuita rurai tucuj cashpa cai pachata rurarca. Jatun yachaj cashpamari, tucui cai pachata alli churarca. Alli yuyaiyuj cashpamari, jahua pachatapish linsota shina churarca.

¹³Pai mandajpimari, jahua pachamantaca achca tamya urman. Paillatajmi p'uyutapish cai allpa tucurimanta huichiyachin. Paimari tamyachingapajpish, ninahuan achij nichin. Paimi huairatapish huaquichishca ucucunamanta llujshichin.

¹⁴Chaita ricushpaca tucui runacunami: “Imata mana yachaj, upami canchij” nishpa yuyarincuna. Diosta rurajcunapish cullquita yacuyachishpa diosta rurashcamantaca, pingai tucunmi. Pai rurashca diosca yangallamari. Causaillatapish mana charincunachu.

¹⁵Chaicunaca yangallami, imapaj mana valinchu. Dios llaquichi punllapica chingaringallami.

¹⁶Ashtahuanpish Jacobpaj Diosca manamari chashnachu. Paica tucui ima tiyajta rurajmari. Paimari israelcunataca, paipajlla cachun agllarca. Pai Diosca “Tucuita Mandaj” shutimari.

¹⁷— Muyundijta jatun pircayuj pueblopi tiyajcuna, cunanca ima charishcacunata quipishpa llujshirichijlla.

¹⁸Mandaj Diostajmi cashna nin: Cunanca cai llajtapi causajcunataca, huaracahuanmi caruta shitagrini. Chaipi ñacachijpitajca nanachingacunami — ninmi.

¹⁹— ¡Aij ñucalla, jatun nanaihuanmari cani! Ñuca chugrita yallitaj nananca. Shina cajpipish ñucaca: Cai ungüica ñucataca japinallatajmi cashca canga. Chashna ungushca puricushatajchari yuyarcanimi.

²⁰Cunanca ñuca carpa huasipish urmashcamari siricun, tucui huascacunatamari p'itishpa urmachishcacuna. Tucui ñuca huahuacunamari shitashpa rincuna, paicunaca ña chingarinmi. Ñuca carpa huasitaca ¿pitaj cutin shayachingari? ¿Pitaj muyundij linsota cutin churangari?

²¹Paicunata michijcunamari ch'ahuan shungu tucushpa, Mandaj Diostaca mana mashcarcacuna. Chaimantamari llaqui tucuncuna. Cunanca paicunapaj tucui oveja canllamari caita chaita rincuna.

²²Judá llajtapi caj tucui pueblocunata shitashcata saquingapajmari, janaj llajtamantaca caparirishpa shamuncuna. Chacal animalcuna causanatamari rurangacuna — nircanimi.

²³Mandaj Dioslla, runapaj causaica mana paipajchu. Pipish quiquin causaitaca mana mandai tucunchu.

²⁴Chashna cashcamantaca Mandaj Dioslla, ama p'iñarishpa llaquichihuaichu. Ashtahuanpish huanachishpa allichihuailla. Mana cashpaca huañuchihuanguimari.

²⁵Canta mana rijsijcunata, canta mana mañajcunata p'iñarishpa llaquichiyari. Paicunamari Jacobpaj huahuacunataca millpuncuna. Tucuicunatamari huañuchishpa tucuchincuna. Can causana huasitapish, shitashcatamari saquincuna.