Read Chimborazo Highland Quichua JEREMÍAS 13 Bible Online

JEREMÍAS 13 - Chimborazo Highland Quichua bible

JEREMÍAS 13

¹Mandaj Diosca ñucataca: “Ri, shuj lino chumbita randishpa chumbilligri. Chai chumbitaca ama yacupi satinguichu” nirca.

²Chashna nijpica, pai Mandaj Dios mandashca shinallatajmi, shuj lino chumbita randishpa chumbillircani.

³Chai q'uipami Mandaj Diosca, cutinllataj ñucataca cashna nirca:

⁴“Cunanca jatari, can randishpa chumbillishca chumbita pascarishpa, Éufrates yacu c'uchu c'aca jutcupi pacamugri” nircami.

⁵Chashna nijpica Mandaj Dios nishca shinallataj Éufrates yacu c'uchuman rishpami, rumi c'aca jutcupi pacamurcani.

⁶Chaimanta ña uni cajpimi, Mandaj Diosca cutinllataj: “Éufrates yacuman ri, ñuca mandajpi chaipi pacashca chumbita apamugri” nirca.

⁷Shina nijpica Éufrates yacuman rishpami, ñuca pacashcapi allashpa chai chumbita japircani. Chai chumbica ña ismushpa, imapaj mana valijmi cashca carca.

⁸Chaimantami Mandaj Diosca, cutinllataj cashna mandarca:

⁹“Ñuca, Mandaj Diostajmi cashna nini: Judá runacunapish, Jerusalenpi causajcunapish imahuan yallitaj jatun tucushpa cushicucushcataca cai chumbita shinami ismuchigrini.

¹⁰Cai runacunaca ñuca yachachishcata mana uyashun nij millai runcunami. Paicunapaj shungu yuyashcatami rurashpa causancuna. Shujtajcunapaj dioscunata mashcashpami, chaicunata servincuna, chaicunatami cungurincuna. Chashna rurashcamantaca, cai ismushca chumbi shina imapaj mana valijcunami.

¹¹Ñucaca tucui israelcunatapish, tucui Judá runacunatapish ñucapajlla causachun, ñuca jatun cashcata ricuchijcuna cachun, shujtajcunapish paicunamanta ñucata alli nishpa jatunyachichunmi chumbihuan chumbillishca shina ñuca muyundijpi charicurcani. Shina cajpipish, paicunaca ñucataca mana cazurcacunachu ninmi Mandaj Diosca ningui.

¹²Paicunataca cashnapish ningui: Israelcunata Mandaj Diosca: Tucui puñucunami vinohuan jundanga ninmi ningui. Chashna nijpica paicunaca: Ari, tucui puñucunapi vino jundanataca yachanchijtajmari ningacunami.

¹³Chashna nijpica cashna ningui: Mandaj Diosca cashnami nin: Cai llajtapi causajcunataca tucuicunatami yuyai chingarijta machachigrini. David tiyanapi tiyashpa mandacuj paipaj huahua huahua jatun mandajcunamanta callarishpaca curacunatapish, ñucamanta huillajcunatapish, tucui Jerusalén pueblopi causajcunatapishmi machachigrini.

¹⁴Chaimantaca puñucunata paicunapurallatataj tacashpa ñutuj shinami llaquichigrini. Yayacunatapish, huahuacunatapish mana llaquishpami ñacachigrini. Shujllatapish mana perdonashpa, tucuicunatami llaquichisha ninmi ningui” nircami.

¹⁵Judá runacuna, ama jatun tucuichijchu. Mandaj Diosmari cancunataca rimacun, tucui yuyaihuan uyaichigari.

¹⁶Cancunata Mandaj Diosca punllata amsayachigrinca, jatun urcucunahuanmari tsagmarigrinchij. Achijman llujshichichunmi cancunaca shuyacurcanguichij. Chaita ruranapaj randica, huañuna jatun amsa llaquipimari churanga. Amaraj chashna rurajpi, paitaca jatunyachichigari.

¹⁷Cancuna jatun tucushpa caita mana uyajpica imatataj rurashapish, cancunamantaca pacallapi huacashpa saquirishatajchari. Mandaj Diospaj oveja canllata prezu apajpica, ñuca ñahuicuna yacuyashpa tucuringacama jatunta huacacushallatajchari.

¹⁸Jatun mandajtapish, jatun mandajpaj mamatapish cashna ni: Cancuna jatun cashcata ricuchij coronaca, cancunapaj umamanta pambaman urmashcami. Cunanca jatun tiyanamanta uriyashpa, pambapi tiyarishpa huacaichijlla.

¹⁹Neguev pamba pueblocunamantapish, ama pi llujshichun muyundijtamari chapacuncuna. Tucui Judá llajtamantamari prezu apangacuna. Shujllatapish mana saquingacunachu.

²⁰Janaj lado llajtamanta shamujcunata huichilla ricuichigari. Jatun canlla, sumaj ovejacunatamari canmanca curcani. ¿Chai ovejacunaca maipitagari?

²¹Jerusalén, canhuan unita alli apanacushcacunata canta mandachun Dios churajpica ¿imatataj yuyanguiman? ¿Manachu cambaj shungutaca huachana nanai japishca huarmita shina nananga imashi?

²²Cambaj shungupica: ¿Imamantataj ñucataca cai tucui llaquicuna japinchu imamí? yuyanguichari. Cai tucui millaita rurashcamantamari cambaj changacuna llatanarirca. Sanpi mucucunacamami lluchulla puringui.

²³Etiopía llajta runaca, mana yuraj aicha tucui tucunchu. Leopardopish, muru millmataca mana shujtajyachi tucunchu. Chai shinamari cancunapish, millaita ruranapi aichayashcamantaca, manataj ima allita ruranaman tigrari tucunguichij.

²⁴Chaimantami cancunataca shitashca pambamanta shamuj huairapi t'amuta cachaj shina, maita cachagrini ninmi.

²⁵Mandaj Diosca cashnapishmi nin: “Canllatajmi ñucata cungarishpa, yanga dioscunallapi shunguta churarcangui. Chaimantami cambajca chai llaquita allichishpa charicuni. Can japina cashcamantaca, chaitami cusha.

²⁶Ñucaca cambaj pingai ricurichunmi, cambaj ñaupaj lado churanata huichi llatanagrini. Chaipimi pinganayajta can puricushcaca ricuringa.

²⁷Tucui lomacunapipish, tucui pambacunapipish huainayanallata yuyashpami, huacarishpa purircangui. Ñucaca chaitaca ricucurcanimari. ¡Aij, Jerusalenlla! ¿Mashna huata llaquita apashpachari chuya saquiringui? ¿Ima horaschari mapa illajlla saquiringui?” ninmi.