Read Chimborazo Highland Quichua JEREMÍAS 14 Bible Online

JEREMÍAS 14 - Chimborazo Highland Quichua bible

JEREMÍAS 14

¹Mana tamyajpimi Mandaj Diosca, Jeremiastaca cashna nirca:

²“Judá runacunaca, tucuicunami llaquirishpa huacacuncuna. Pueblo pungucunatapish, pi mana llujshishpa yaicushpa ricurinchu. Jerusalenpi causajcunaca llaquirishpa pambapi tiyarishpami, caparirishpa huacancuna.

³Charijcunaca, cullqui jahua paicunata servijcunatami yacuman cachancuna. Paicunaca pugyuman chayashpapish, yacuta mana japishpami, chushaj puñucunahuan tigrancuna. Chaimantami yallitaj pingai tucushpa, llaquirishpa umata taparincuna.

⁴Mana tamyajpi allpa chijtarijta chaquishcamantami, chagrata rurashpa causajcunapish jatunta llaquirishpa umata tapashca purincuna.

⁵Q'uihua tucui chaquishcamantami, tarugacunapish maipipish huachashcahuan huahuata saquishpa rinllacuna.

⁶Sacha burrocunapish shitashca pamba lomacunaman huichiyashpami, chacal animalcuna shina huairata japincuna. Q'ihuapish tucui illajpimi, ñahui azulyashpa urmancuna” nircami.

⁷Mandaj Dioslla, ñucanchij juchacunahuanca cantamari p'iñachishcanchij. Chai juchacunallatajmari ñucanchijtaca llaquipi churashca. Cai tucui huatacunatamari canta mana cazushpa causashcanchij. Shina cajpipish, canta jatunyachingapaj ayudahuayari.

⁸Israelcuna shunguta churana Dioslla, canmari paicunata llaqui japijpipish, huaquichij carcangui. ¿Imamantataj cunanca cai llajtapajca carumanta shamushca runa shina, imata mana ricusha ninguiyari? ¿Imamantataj ñanta ricushpa shuj tuta pacaringapaj saquirij runa shinalla canguiyari?

⁹¿Imamantataj mancharishca runa shina saquiringuiyari? C'ari c'aritajmari cangui. ¿Imamantataj mana mitsai tucuj runa shina saquiringuiyari? Chashna cashpapish Mandaj Dioslla, canca ñucanchij chaupillapitajmari cangui. Ñucanchijca can Mandaj Diosta mañajcunami canchij. Amataj ñucanchijtaca shitashcata saquihuaichu.

¹⁰Mandaj Diosca Judá runacunamantaca cashnami nirca: “Cai runacunaca caiman, chaiman yanga puricunallatami munan. Chaimantami ñucaca p'iñani. Cunanca paicunapaj tucui juchacunata yuyarishpami, tucuimanta llaquichigrini” nircami.

¹¹Shinallataj Mandaj Diosca, ñucataca cashnapishmi nirca: “Ñucataca ama cai runacunapaj ima allita rurachun mañaichu.

¹²Paicuna mana micushpa ñucata mañajpipish, manataj uyashachu. Animalcunata huañuchishpa tucui rupachijpipish, imata cujpipish manataj chasquishachu. Ashtahuanpish espadahuan, yaricaihuan, jatun ungüihuanmi tucuchisha” nircami.

¹³Chashna nijpimi, ñucaca cashna nircani: “Mandaj Jatun Dioslla, canmanta huillajcunaca paicunamanca: Pi mana espadahuan huañuchinaman shamujta ricunguichijchu. Cancunapajca yaricaipish mana tiyangachu. Ashtahuanpish Diosca: Cai llajtapica mana tucurij sumaj causaitami cusha ninmi nishpami huillancuna” nircanimi.

¹⁴Chashna nijpimi, Mandaj Diosca cashna nirca: “Chai huillajcunaca llullashpallamari, ñuca shutipi chashna huillancuna. Paicunataca manapish ñuca huillanaman cachashcanichu, imallatapish mana nishcanichu. Manapish muscuipi shina ñuca ricuchishcata ricuncunachu. Ashtahuanpish adivinashpallamari, paicunapaj shungu yuyashcata huillashpa cancunataca umacuncuna.

¹⁵Manapish ñuca cachajpimari: Cai llajtamanca pi mana espadahuan huañuchingapaj shamungachu, yaricaipish mana tiyangachu nishpa llullashpalla ñuca shutipi huillancuna. Chaimanta Mandaj Diostajmi paicunataca cashna nini: Chai huillajcunaca espadahuan, yaricaihuanllatajmi huañushpa tucuringacuna.

¹⁶Paicuna huillashcata uyajcunatapish espadapish, yaricaipish huañuchijpimi, Jerusalén pueblo callecunapica shitashca siringacuna. C'aricunatapish, huarmicunatapish, churicunatapish, ushushicunatapish pi mana pambaipajmi canga. Paicuna millaita rurashcamantaca, paicunapaj jahuallapitajmi llaquita tallisha.

¹⁷Cunanca tucuicunata cashna nigri: Ñuca llajtapi causajcunapajca, c'arihuan manaraj chayarinacushca soltera shina cajpipish, jatun llaquimari chayamushca. Yallitaj jatun nanaimari japishca. Cunantajca tutapish, punllapish huacacushallami. Ñuca ñahuimantaca manataj huiqui illangachu.

¹⁸Pueblomanta llujshishpapish, maipipish espadahuan huañuchishca siricujllatami ricuni. Puebloman yaicushpapish, yaricaihuan ungushcacunallatami ricuni. Ñucamanta huillajcunamanta callarishpa, curacunacamami ima tucunataca manaraj yuyaita japishpa, yangallata yuyashpa purircacuna ninmi nigri” nircami.

¹⁹Mandaj Dioslla, Judá runacunataca ¿huiñaipajchu shitangui imatagari? ¿Sión urcutapish ña manatajchu ricunachingui imatagari? ¿Imamantataj imahuan mana jambiripajta chugrichihuarcanguiyari? Sumaj causaitamari shuyarcanchij, ima alli punllacuna mana chayamunca. Jambichunmari shuyarcanchij, ashtahuanpish mancharina llaquillamari shamun.

²⁰Mandaj Dioslla, ñucanchijpish ñucanchij yayacunapish juchata rurashpamari canta p'iñachishcanchij. Chai tucui millaita rurashcamantaca llaquirinchijmi.

²¹Can imata ari nishcata yuyarishpa, ñucanchijtaca ama shitahuaichu. Can sumaj jatun Dios mandashpa tiyana pueblotapish ama yangata ruraichu. Cantaca jatunyachishunmari, amataj shitahuaichu.

²²Shujtaj runacuna charishca, rurashcalla dioscunaca pi mana tamyachi tucunchu. Jahua pachapish paillatajca tamyata mana cachai tucunchu. Ñucanchijta Mandaj, can Diosmari tamyata cachaj cangui. Tucui chai ima tiyajcunataca, canmari rurarcangui. Chaimantamari canllata shuyanchij.