Read Chimborazo Highland Quichua JEREMÍAS 17 Bible Online

JEREMÍAS 17 - Chimborazo Highland Quichua bible

JEREMÍAS 17

¹Judá runacunalla, cancunapaj shungupica fierropi churashca diamante puntahuan rumipi quillcashca shinami juchaca tiyacun. Cancuna shayachishca altar gachucunapipishmi chashna quillcashca tiyacun.

²Cancunapaj huahuacunaca p'angasapa yura ucucunapi, jatun lomacunapi, urcucunapi, pugru pambacunapi cancuna churashca altarcunata, Asera shuti huarmi dioscunallatami yuyaipi charincuna. Cancunapaj tucui llajtapi cancuna chai altarcunata shayachishpa juchata rurashcamantami, cancuna charishca tucui ima sumajcunataca shuhuacunaman cusha.

⁴Ñuca cushca cai llajtatapish shitashpami, cancuna mana rijsishca llajtaman ringuichij. Chaipimi cancunata p'iñajcunata servichishpa huatashcata shina charisha. Cancuna ñucata p'iñachishcamantaca, lunyacuj nina shinami huiñaita p'iñarircani ninmi.

⁵Mandaj Diosca cashnami nin: “Ñucamanta anchurishpa, runallapi shunguta churajcunaca llaqui tucushca cachun.

⁶Paicunaca shitashca pambapi retama yura huiñaj shinallami causangacuna. Tucui causaipi ima allicunata mana chasquingacunachu. Pi mana nishpa shitashca, chaquishca allpacunallapimi causangacuna.

⁷Ashtahuanpish Mandaj Dios ñucapi shunguta churashpa, ñucata shuyajcunaca allicunata chasquingacunami.

⁸Paicunaca yacu uripi tarpushca yura shinami canga. Yacu llujshicuj allpapi sapiyashca yuraca inti sinchita rupachijpipish, mana anguyanchu. Verdijlla p'anga shayacunllami. Tamya mana tiyai huatapish mana chaquirishpa, granota p'ucunllami.

⁹Runapaj shunguca tucui imatapish yalli, umajlla millai shungumi. Chaitaca pi mana yachai tucunchu.

¹⁰Mandaj Dios ñucami tucuicunapaj shunguta, yuyaita callarishpa ricuni, yachani. Tucuicunamanmi imallata rurashcamantapish, ima shina causashcamantapish chasquina cashcatataj cusha” ninmi.

¹¹Pitapish quichushpalla jahuanpi jahuanpi charijyajcunaca, manapish pai churashca lulunta yutu ugllacuj shinami. Q'uipataca, upa runacuna cashcallami ricuringacuna. Sinchiraj runacuna cashpami, tucui charishcacunata shitashpa ringacuna.

¹²Ñucanchij Diospaj huasica, callarimantapacha jahuamanmi tiyacun. Chaica jatun Diospaj achij nicuj jatun tiyanamari.

¹³Mandaj Dioslla, canmari israelcuna shunguta churana Dios cangui. Canta saquijcunaca tucuicunami pingai tucungacuna. Can Mandaj Diosca causaita cuj yacu llujshicuj pugyumari cangui. Canmanta anchurijcunaca ñutu allpapi quillcashca shinallami chingaringacuna.

¹⁴Mandaj Dioslla, canmari ñuca alabana Dios cangui. Alliyachihuayari, can alliyachijpica alliyashatajmi. Quishpichihuayari, can quishpichijpica quishpirishatajmi.

¹⁵Judá runacunaca ñucataca: “Mandaj Dios huillachishcaca ¿maitaj ima mana ricurinca? Cunantaj pajtachijta ricushun ninchijca” nincunamari.

¹⁶Shina nicujpipish, ñucaca mana paicunata utca llaquichichun mañashcanichu. Paicunapaj jatun llaqui punlla chayamuchunpish mana mañashcanichu. Ñuca imallata nishcataca canllataj yachanguimi. Cambaj ñaupajpimi, imatapish shimi llujshini.

¹⁷Llaqui punllacunapica, canmari ñucata huaquichij cangui. Chashna cashcamantaca ama manchachihuaichu.

¹⁸Ñucata manchachinapaj randica, ñucata p'iñajcunata manchachiyari. Ñucata pingachinapaj randica, paicunata pingachiyari. Paicunapajca jatun llaqui punllata apamuiyari. Yuyarishpa, yuyarishpa llaquichiyari.

¹⁹Mandaj Diosca ñucataca cashnami nirca: “Jerusalén puebloman tucuicuna yaicuna, llujshina punguman ri. Chaiman rishpaca, Judá llajtata jatun mandajcuna yaicuna, llujshinapi shayaringui. Shinallataj tucui caishuj pungucunapipish shayarigringui.

²⁰Chaicunapi shayarishpaca cashna ningui: Judá llajtata jatun mandajcunapish, tucui Judá llajta runacunapish, tucui Jerusalenpi causajcunapish, tucui cai punguta yaicujcunapish, Mandaj Dios rimashcata uyaichij.

²¹Mandaj Diosca cashnami nin: Cancunapaj causaita llaquichigari, samana punllapica ama cargacunata apamuichijchu. Jerusalén pueblo pungucunataca, ama imahuan yaicumuichijchu.

²²Samana punllapica cancunapaj huasimantaca, ima quipillatapish ama llujshichichijchu. Ima ruranacuna saquiricujpipish, ama ruraichijchu. Ashtahuanpish samana punllataca, cancunapaj ñaupa yayacunata ñuca mandashca shina, ñucapajlla ch'icanchishcata charichigari.

²³Paicunapish mana uyarcacunachu, mana cazurcacunachu, sinchi shungucuna tucushpami manataj uyashun nircacuna, imata jarcachunpish manataj munarcacunachu ninmi ningui” nircami.

²⁴Mandaj Diosca cashnapishmi nin: “Paicuna chashna cashca cajpipish, cancunaca ñucata cazuichij. Samana punllapica cai pueblomanca imata ama yaicuchimuichijchu. Ashtahuanpish samana punllataca, ñucapajlla ch'icanchishca cashcata yuyarishpa, ama imata ruraichijchu.

²⁵Chashna huaquichijpica, Davidpaj tiyanapi tiyarishpa mandacuj jatun mandajcunapish, caishuj mandajcunapish caballocunapi, carretacunapi cai pueblo pungucunata llujshinga, yaicungacunami. Shinallataj tucui Judá runacunapish, cai Jerusalenpi causajcunapish caipi puringacunami. Cai pueblopica causacungallacunami.

²⁶Shinallataj Judá llajtapi caj tucui caishuj pueblocunamantapish, Jerusalén muyundijcunamantapish, Benjamín llajtamantapish, Sefela pambamantapish, Neguev pambacunamantapish, cai Jerusalén puebloman shamungacunami. Ñucaman cushpa huañuchingapajpish, tucui rupachingapajpish animalcunata apashpa, ñucaman cuna micunatapish, inciensotapish, ñucata diosolopagui nishpa alabangapaj cuna cashcatapish apashpami, ñuca Mandaj Diospaj huasiman shamungacuna.

²⁷Ashtahuanpish samana punlla huaquichichun ñuca mandashcata mana cazushpa, chai punllapi ima cargatapish apamushpa, cai Jerusalén puebloman yaicuchijpica, jatun ninahuanmi cai pungucunataca rupachisha. Chai ninaca, Jerusalén pueblopi caj mandana huasicunandijmi tucui rupachinga, pi mana huañuchi tucungachu” ninmi.