Read Chimborazo Highland Quichua JEREMÍAS 18 Bible Online

JEREMÍAS 18 - Chimborazo Highland Quichua bible

JEREMÍAS 18

¹Mandaj Diosca, Jeremiastaca cashnami nirca:

²“Jatari, allpa mangata ruraj runapaj huasiman ri. Chaipimi canmanca ñuca imata huillachun nishcata huillagrini” nircami.

³Shina nijpimi, ñucaca allpa mangata rurajpaj huasiman uriyarcani. Ñuca chayanapajca, paica muyuchina ruedapimi mangata ruracushca carca.

⁴Chai manga mana alli llujshijpica, chai shutuj allpallahuantajmi pai munashca shina shujtaj mangata rurarca.

⁵Chaipimi Mandaj Diosca, ñucataca cashna nirca:

⁶“¿Shutuj allpata cai runa ima shina rurajtaca ricunguichu? ¿Manachu ñucapish israelcunataca, chai shinallataj rurai tucusha? Shutuj allpaca, cai mangata ruraj runapaj maquipica, imatapish ruranapaj jahuallami. Can israelcunapish ñuca maquipica, chashnallatajmari canguichij.

⁷Ñucaca, huaquinpica maijan runacunata cashpa, maijan llajtata cashpapish ña tucui chingachinata, tucuchinata yuyarishpami huillachini.

⁸Shina cashpapish, ñuca tucuchisha nicushca llajta runacuna millaita ruranata saquishpa cutirijpica, mana llaquichinichu. Paicunapaj cachasha nicushca llaquitaca, jarcarishpa mana cachanichu.

⁹Huaquinpica maijan runacunataca, llajtata rurashpa shayachinatami yuyarini.

¹⁰Shina cajpipish, chai runacuna ñuca mandashcata mana cazushpa, ñuca ñaupajpi millaita rurajpica, paicunapaj allita ruranata yuyarishca cashpapish, jarcarishpa mana ruranichu.

¹¹Chashna cashcamantaca cunanca tucui Judá runacunatapish, Jerusalenpi causajcunatapish cashna ni: Mandaj Diosca cashnami nin: Ñucaca cancunata llaquichinatamari yuyarircani. Ñamari alli yuyarishcata charicuni. Ama chaita rurachunca, tucuicuna millai causaita saquishpa cutirichigari. Allita rurai callarichigari ninmi nigri” nircami.

¹²Chaita huillajpica paicunaca: “Yangamari chashna rimaringui. Ñucanchijca rurashcalla dioscunatamari catishun. Tucuicunallataj ñucanchij millai shungu yuyachishcatami rurashun” nircacunami.

¹³Chaimantami Mandaj Diosca cashna nirca: “Israelcunaca pi c'arita manaraj rijsij soltera shina cashpapish, mancharina jatun millaitamari rurashca. Maipi chashna millaicuna tiyajta uyashcacunachu imamí, shujtaj llajtacunapi causajcunata tapuichigari.

¹⁴Líbano urcu jatun rumicuna jahuamantaca, ¿rasu ima horas anchurishcachu? Urcucunamanta chirijlla shamucuj yacucunaca ¿ima horas chaquirishcachu?

¹⁵Ñuca agllashcacunaca imapaj mana valij yangacunaman inciensota cushpa rupachishpa, ñucataca cungarinllacunami. Ñaupa ñancunaman yaicushpamari chingarishcacuna. Paicuna mana purishca, mana rijsishca ñancunatamari puricuncuna.

¹⁶Paicunallataj chashna rurashcamantami, paicunapaj llajtaca shitashca saquiringa. Tucuicuna asina llajtatamari rurancuna. Maijanpish cai llajta ñanta pasacushpaca, mancharishpa umata cuyuchishpami ringacuna.

¹⁷Paicunata p'iñajcunata apamushpami, inti llujshin ladomanta shamuj huairahuan ujshata ñaupachij shina callpachisha. Jatun llaqui chayamui punllaca paicunamanca ñahuita ricuchinapaj randica, huashatami ricuchisha” ninmi.

¹⁸Jeremías huillashcata uyashpaca, cashnami ninacurcacuna: “Shamuichij, Jeremiasta huañuchinata yuyarinacushunchij. Mandashcacunata ñucanchijman yachachichunpish curacunaca mana illanchu. Alli yuyaita cungapajpish, yachajcuna mana illanchu. Dios ima nishcata huillajcunapish mana illangachu. Juchachishpa huañuipi churashunchij. Pai huillashcataca imata mana uyashunchijchu” nircacunami.

¹⁹Mandaj Dioslla, ñucata ricuhuayari. Ñucata p'iñashpa imata ninacucujta uyayari.

²⁰Cambaj ñaupajpi shayarishpa, ñuca paicunamanta mañashcataca canllataj yuyaripayari. Can paicunahuan ama ashtahuan p'iña cachunmari mañarcani. Chashna allita rurashcamantaca ¿llaquita cutichina cajpichu ñucapajca pambana jutcuta ña allashpa charicuncuna imatagari?

²¹Chaimanta cunanca paicunapaj huahuacunataca, espadahuan manchachishpa caita chaita cachashpa, yaricaihuan huañuchun saquiyari. Cazarashca runacunatapish, manaraj casarashcacunatapish espadahuan huañuchichun saquiyari. Chashna rurashpa paicunapaj huarmicunataca cusapish, huahuacunapish illajta saquiyari.

²²Paicunapaj huasicunapi caparirishca uyarichun, p'iñaj soldadocunata ñapish chayachinguillami. Paicunaca ñucata urmachingapajmari jutcuta allashcacuna. Ñuca chaqui sarunapimari urmanata churashcacuna.

²³Mandaj Dioslla, ñucata huañuchingapaj paicuna ima shinalla yuyarinacushcataca yachanguimi. Cambaj ñaupajpi chashna millaita ruracushcataca, amataj perdonanguichu. Paicunapaj juchataca amataj p'ichanguichu. Paicunataca, can p'iñarishpa cambaj ñaupajpi urmachilla.