Read Chimborazo Highland Quichua JEREMÍAS 19 Bible Online

JEREMÍAS 19 - Chimborazo Highland Quichua bible

JEREMÍAS 19

¹Mandaj Diosca cashnami nirca: “Allpa mangata rurajpajman rishpa, shuj puñuta randigri. Chai q'uipaca Jerusalenpi causajcunata cunaj yuyajcunamantapish, curacunata cunaj yuyajcunapuramanta maijancunatapish cayangui.

²Chaimantaca inti llujshin ladopi caj pungu uranijman, Hinompaj churipaj pugru pambaman pushangui. Paicunamanca chaipi ñuca imata huillachun nishcata huillangui.

³Cashna ningui: Judá llajtata jatun mandajcunapish, Jerusalenpi causajcunapish Mandaj Dios rimashcata uyaichigari. Tucuita Mandaj, can israelcunapaj Diosca cashnami nin: Cai llajtamanca jatun llaquitami cachagrini. Chai llaquita uyajcunaca, rinrinta nanachingacunami.

⁴Judá runacunamari ñucamanta anchurishpa, cai llajtatapish shujtajpaj maquipi churarcacuna. Paicunapish, paicunapaj ñaupa yayacunapish, Judá llajtata jatun mandajcunapish shujtajcunapaj dioscunamanmi inciensota cushpa rupachincuna. Shinallataj alli shungu runacunata huañuchishpapishmi, caipica yahuarta jichancuna.

⁵Baalman paicunapaj huahuacunata cushpa tucui rupachingapajpishmi, altarcunata rurancuna. Chaicunata rurachunca mana mandashcanichu, mana imata nishcanichu, mana yuyarishcanillapishchu.

⁶Chaimantami cai pambataca Tofet shuti pugru pamba, mana cashpaca Hinom runapaj churipaj pugru pamba ninapaj randica, jatun Huañui Pamba nina punlla chayamugrin.

⁷Chai pambapimi Judá llajtapi causajcuna, Jerusalenpi causajcuna imata yuyarinacushcataca chingachisha. Paicunata p'iñashpa huañuchingapaj shamuj runacunapaj maquipi churashpami, espadahuan huañuchichisha. Chai huañushca aichacunataca huairata purij pajarocunaman, sachapi causaj animalcunamanmi carasha.

⁸Cai pueblotaca tucuicuna mancharinatapish, chanzata rurashpa asinatapishmi rurasha. Pipish caita pasacushpa, cai pueblo tucui urmashca siricujta ricushpaca mancharingapish, chanzata rurashpa asingacunapishmi.

⁹Caipi causajcunataca paicunapaj quiquin churicunapaj, quiquin ushushicunapaj aichallatatajmi cashtuchisha. Paicunata p'iñashpa huañuchingapaj shamujcuna cai pueblo muyundijta chapacujmi, imata mana micui tucushpa, tucuicuna caishuj chaishuj micunacungacuna ninmi ningui.

¹⁰Chashna nishca q'uipaca, canhuan rij yuyajcunapaj ñaupajpi puñuta p'aquingui.

¹¹Chaimantaca cashna ningui: Tucuita Mandaj Diosca cashnami nin: Caipi causajcunatapish, cai pueblotapish chashnallatajmi ñutugrini. Allpa mangata maijan runa p'aquishca shina mana cutin allichi tucuipajtami saquigrini. Huañushcacunatapish mana maipi pambana tiyajpimi, chai Tofet pambapi shitangacuna.

¹²Ñucaca cai pueblollatataj Tofet huaicuta shina rurashpami, caipi causajcunataca chashna llaquichigrini.

¹³Jerusalén tucui pueblo huasi jahuacunapipish, Judá llajtata jatun mandajcunapaj huasi jahuacunapipishmi, jahua pachapi tiyaj tucui luzerocunaman inciensota cushpa rupachijcuna carca. Shinallataj shujtajcunapaj dioscunamanpish vinota cushpami tallijcuna carca. Chaimanta chai tucui huasicunaca ñuca ñaupajpica, Tofet pamba shina mapami canga ninmi ningui” nircami.

¹⁴Mandaj Dios chai Tofet pambapi imallata huillachun mandashcata huillashpaca, Jeremiasca Mandaj Diospaj huasimanmi tigrarca. Chai huasi canllapi shayarishpami, tucui chaipi cajcunata cashna nirca:

¹⁵“Tucuita Mandaj, can israelcunapaj Diosca cashnami nin: Ñucaca cai pueblopajpish, tucui caishuj pueblocunapajpish jatun llaquitami apamusha nircanimi. Ñami chai llaquitaca apamugrini. Chai pueblocunapi causajcuna rumi shungu tucushpa, ñuca imata rimajpipish manataj uyashcamantami, chashna llaquichigrini ninmi” nircami.