Read Chimborazo Highland Quichua JEREMÍAS 21 Bible Online

JEREMÍAS 21 - Chimborazo Highland Quichua bible

JEREMÍAS 21

¹Judá llajtata jatun mandaj Sedequiasca: “Babilonia llajtata jatun mandaj Nabucodonosormari ñucanchijhuan macanacungapaj shamushca. Mandaj Diosta ñucanchijmanta tapupai. Paica tucuita rurai tucuj cashcamanta ima jatun mancharinata rurajpi, chai jatun mandajca ñucanchijmanta anchuringapishchari” nichunmi, Malquiaspaj churi Pasurtapish, Maasiaspaj churi Sofonías curatapish Jeremiaspajman cacharca. Chashna tapuchun cachai punllami Mandaj Diosca, Jeremiastaca cai shimicunata huillachun mandarca:

³Jeremiasca paicunamanca cashnami nirca: “Sedequiasman cashna huillagrichij:

⁴Israelcunata Mandaj Diosca cashnami nin: Ñucaca cancunapaj maquipi charicun macanacunacunataca imapaj mana valijtami rurani. Chai Babilonia llajtata jatun mandajtaca pirca huashamanta ama yaicuchun, ña mana ch'imbapura macanacushpa jarcai tucunguichijchu. Jatun pirca huasha muyundijta shayashpa cancunata chapacuj chai caldeo soldadocunataca tucuicunatami cai puebloman yaicuchisha.

⁵Ñucaca cancunahuanca yallitaj p'iñarishca, llaquirishcami cani. Chaimanta ñucatajmi cancunahuanca, tucuita rurai tucuj ñuca sinchi maquihuan macanacugrini.

⁶Tucui cai pueblopi causajcunatami jatunta llaquichigrini. Runacunapish, animalcunapish jatun ungüihuanmi huañungacuna.

⁷Chai q'uipaca, Judá llajtata jatun mandaj Sedequiastapish ungüipi, espadapi, yaricaipi mana huañushpa, cai pueblopi causacujraj paita servijcunatapish, Babilonia llajtata jatun mandaj Nabucodonosorpaj maquipimi churasha. Paicunata p'iñashpa huañuchingapaj shamushca chai mandajpaj maquipi churajpica, espadahuanmi huañuchichinga. Paica pita mana llaquingachu, pimanta mana nanaringachu. Japishcahuan huañuchingallami ninmi nigrichij ningui.

⁸Tucui Judá runacunamanca cashna huillai: Mandaj Diosca cashnami nin: Cunanca cancunamanca causanata, mana cashpaca huañunata agllachunmi ricuchini.

⁹Cai pueblopi saquirijcunaca espadapi cashpa, yaricaihuan cashpa, ungüihuan cashpapish huañungacunatajmi. Ashtahuanpish caimanta llujshishpa, cancunata muyujta chapacuj caldeo soldadocunapajman rishpaca causangacunami. Quiquin chaquihuan llujshishpa, paicunapaj maquipi yaicugrijcunaca huañunallamantapish quishpiringuichijmi.

¹⁰Ñucaca llaquichingapajmi tigrashpa ricurcani, mana ima allita cungapaj ricucunichu. Babilonia llajtata jatun mandajpaj maquipimi churani. Paimi ninata japichishpa tucuchinga ninmi Mandaj Diosca ningui.

¹¹Judá llajtata jatun mandajtaca, paipaj familiandijta cashna ningui: Mandaj Dios rimashcata uyaichij:

¹²Davidpaj tucui huasi ucupuracunataca, Mandaj Diosca cashnami nin: Cada tutamanta mandanapi tiyarishpaca, huajchacunata llaquichijcunapaj maquimanta mitsashpa allita ruraichigari. Ñataj cancuna mana chashna rurajpica, cancuna millaita rurashcamanta ñuca yallitaj p'iñarijpi nina lunyanman. Chaitaca pi mana huañuchi tucungachu ninmi.

¹³Mandaj Diosca cashnapishmi nin: Pugru pamba chaupipi caj jatun rumi jahuapi causajcunalla, ñucatajmi cancunata llaquichingapaj shayarini. Cancunaca: ¿Pitaj ñucanchijhuan macanacungapaj huichiyai tucungari? Ñucanchij causacunmanca ¿pitaj yaicui tucungari? ninguichijmi.

¹⁴Ñucamari cancuna millaita rurashcamanta llaquichina shinataj llaquichigrini. Ñucamari paipaj jatun sachacunataca tucui rupachichisha. Tucui muyundijpi ima tiyajcunatapishmi rupachichisha ninmi Mandaj Diosca ningui” nircami.