Read Chimborazo Highland Quichua JEREMÍAS 23 Bible Online

JEREMÍAS 23 - Chimborazo Highland Quichua bible

JEREMÍAS 23

¹Mandaj Diosca cashnami nin: “Ñuca oveja canllata caita chaita cachashpa chingachij michijcunalla, ¡aij imachari tucunga!” ninmi.

²Israelcunata Mandaj Diosca paipaj agllashcacunata michijcunataca cashnami nin: “Cancunamari ñuca ovejacunata cuidanapaj randica manchachishpa caita, chaita cachashcanguichij. Cancunataca chashna millaicuna cashcamanta llaquichigrinitajmi. Ñuca, Mandaj Diostajmi chashna nini.

³Tucui llajtacunaman ñuca shitashca ovejacunapaj huahuacunataca ñucallatajmi cutin tandachisha. Chashna tandachishpaca, ñucallatajmi paicuna shayanaman tigrachimusha. Caipimi achcata mirarishpa jundaringacuna.

⁴Paicunata ima ama manchachichun, shujllapish ama chingarichunca alli michijcunatami churasha. Ima manchai illajllami causangacuna” ninmi Mandaj Diosca.

⁵Mandaj Diosca cashnapishmi nin: “Shamuj punllacunapica, Davidpaj huahuapuramantami cashcata ruraj mandajta churasha. Paimi cai llajtata Jatun Mandaj canga. Paica cushicushpami cai llajtapica alli mandanga, tucuicunapajmi cashcata ruranga.

⁶Pai mandacui punllacunapica Judá llajtapajpish, israelcunapajpish ima llaqui mana tiyangachu. Cushicushpami causangacuna. Paitaca: Ñucanchijta mitsaj Mandaj Dios nishpami cayangacuna” ninmi.

⁷Mandaj Diosca cashnapishmi nin: “Shamuj punllacunapica imapajpish ña mana: Egipto llajtamanta israelcunata llujshichimuj, causaj Mandaj Diosca ricucunmi ninguichijchu.

⁸Ashtahuanpish ñuca tigrachimujpi, quiquin llajtapi causacushpami: Israelcunapaj huahuacunataca janaj llajtamantapish, pai maillaman shitashca tucui shujtaj llajtacunamantapish tigrachimuj, causaj Mandaj Diosca ricucunmi ninguichij” ninmi.

⁹Llulla huillajcunahuanca yallitaj p'iñarishpami, shungu p'aquirishpa llaquirini. Ñuca tullucunacama chujchucunipishmi. Jucha illaj Mandaj Diospaj shimicunata uyashpaca, paipaj ñaupajpica yuyai chingarijta vinohuan machashca shinami tucuni.

¹⁰Cai llajtaca huainayajcunahuan jundamari. Millaita ruranallatami yachancuna, mandanapipish shujtajcunata llaquichishpallami tiyacuncuna. Chaimanta Dios llaqui tucuchun nijpimi, allpapish shitashca pamba shina chaquishca, michina pambacunapish tucui chaquishcami.

¹¹Mandaj Diosca cashnami nin: “Ñucamanta huillajpish, curapish ñucata mana manchajcunami. Paicunatacarin ñuca huasillapitaj millaita rurajtami ricuni. Paicunapajca jatun llaqui huatatami apamugrini.

¹²Chaipica paicunapajca, jatun lluchca ñanta amsa tutapi puricushca shinami canga. Chashna lluchcapi cajpitaj, t'angashpa shitajpi shinami llaquipi urmangacuna.

¹³Samaria llajtapi huillajcunapish, Baalpaj shutipi huillashpami, ñuca agllashca israelcunataca pandachircacuna. Chashna mana allita rurajtami ricurcani.

¹⁴Jerusalén pueblopi huillajcunatapish mancharina millaita rurajtami ricuni. Paicunaca huainayashpami purincuna, imatapish llullashpa umancunapishmi. Chashna rurashpami alliman ama pi cutirichunca, paicunallataj millai causaita ashtahuan yachachincuna. Tucui ñucamanta huillajcunapish, Jerusalenpi causajcunapish ñuca ñaupajpica Sodoma, Gomorra shuti pueblocunapi causajcuna shinami” ninmi.

¹⁵Chaimantami tucuita Mandaj Diosca chai huillajcunataca cashnapish nin: “Jerusalenpi huillajcunamantami tucui Judá llajtapi causajcuna mishqui shimi jayaj shungu tucuncuna. Chaimanta paicunamanca ajenjotami cashtuchigrini. Hielhuan chagrushca yacutapishmi ubyachigrini” ninmi.

¹⁶Tucuita Mandaj Diosca cashnapishmi nin: “Chaimanta chai huillajcuna huillashcataca ama uyaichijchu. Paicunaca mana ñuca shimimanta llujshishca shimicunata huillancunachu. Ashtahuanpish cancunapaj yuyai samarichun llullanllacunamari. Paicunapaj shungu yuyashcallatamari muscuipi ricushcata shina huillancuna.

¹⁷Ñucata p'iñachijcunatapish, paicunapaj shungu yuyashcata rurashpa causaj ch'ahuan runacunatapish, quiquin yuyaillamantamari paicunaca: Cancunapajca sumaj causaica mana tucuringachu, ima llaquipish mana shamungachu ninmi Mandaj Diosca nincuna” ninmi.

¹⁸Chashna ningapajca paicunaca, ¿pitaj Mandaj Dios imata rurasha nicushcataca yachashcari? ¿Pitaj paita ricushca, pitaj paipaj shimitapish uyashcari? ¿Pitaj pai imata nishcata uyaracushcari?

¹⁹Mandaj Dios cachashca jatun llaquica, jatun acapana shinami shamunga. Pai allichishpa charicushca jatun llaquica, millaicunapaj jahuapimi urmanga.

²⁰Mandaj Diosca jatunta p'iñarishca cashpami, chashna ruragrin. Chaita rurangacama paica manataj alli tucungachu. Pai imata ruranata yuyarishcataca pajtachingatajmi. Q'uipa punllacunaca pai tucui chaicunata rurajpimi, cancunaca pai imallata rurana cashcataca tucuita yachanguichij.

²¹“Chai llulla huillajcunataca mana ñuca cachashcanichu, paicunamanca imata mana nishcanillapishchu. Llullashpallamari, ñuca shutipi huillanaman callpancuna.

²²Ñuca imata rurasha nicushcata ñuca huillacujpi uyashca cashpaca, ñuca huillachun nishcatamari ñuca agllashcacunamanca huillanmancuna carca. Chashna huillashpaca, paicunataca millai causaita, millai ruranacunata saquichishpa, alliman tigrachinmanmi carca.

²³Ñucataca c'uchullapi cashpalla ricuj Dios ¿cashcatachu yuyanguichij? Ñucaca carupi cashpapish, tucuita ricuj Diosmari cani” ninmi Mandaj Diosca.

²⁴Mandaj Diosca cashnapishmi nin: “¿Pitaj ñuca mana ricunapi miticui tucungari? Ñucaca tucui jahua pachapipish, cai pachapipish jundamari cani. Mandaj Diostajmi chashna nini.

²⁵Ñucaca chai huillajcunataca: Muscunimari, muscunimari nishpa, llullashpalla ñuca shutipi huillajtami uyani.

²⁶Chai huillajcunaca ¿ima horascamachari paicunapaj shungu chashna panda yuyashcallata huillashpa, umashpa puringacuna?

²⁷Ñuca runacuna ñucata cungarichunmi, paicuna muscushcataca caishujman chaishujman parlashpa purincuna. Paicunapaj ñaupa yayacuna ñucata cungarishpa, Baalta catishca shinallatatajmi rurashun nincuna.

²⁸Maijan huillaj muscushpaca muscunillami nishpa parlachun. Ñuca shimicunatataj chasquishpa huillajpish, ñuca shimi cashcallata huillachun. Ujshaca trigohuanca, mana chai shinallatajchu” ninmi Mandaj Diosca.

²⁹Mandaj Diosca cashnapishmi nin: “Ñuca huillachishca shimicunaca nina shinami. Yacu rumitapish p'aquij martillo shinapishmi.

³⁰Chashna cashcamantaca shuj ashtahuan, shuj ashtahuan quichunacushpa, ñuca shimitataj huillacuj shina llulla huillajcunataca ñucatajmi llaquichigrini.

³¹Diosmi huillaj cachan nishpa, paicunapaj c'allumanta llujshichishpalla chashna huillajtacunataca ñucatajmi llaquichigrini” ninmi Mandaj Diosca.

³²Mandaj Diosca cashnapish ninmi: “Llulla muscuicunallata huillashpa, parlashpa, ñuca agllashcacunata pandachij huillajcunataca ñucatajmi llaquichigrini. Llulla shimicunahuan inquitashpami pandachincuna. Paicuna huillachunca mana ñuca cachashcanichu. Paicunaca cai runacunataca, ima allipi mana churashcacunachu” ninmi Mandaj Diosca.

³³“Cantaca caipi causajcunapuramanta maijanpish, mana cashpaca shuj huillaj, mana cashpaca shuj curapish: ¿Mandaj Diosca imatataj huillaj cachan? nishpa tapujpica, cashna ningui: Mandaj Diosca caitami huillaj cachan: Ñucaca cancunataca shitagrinimi ninmi ningui.

³⁴Shinallataj maijan huillajpish, maijan curapish, mana cashpaca caipi causajcunapuramanta maijan cashpapish: Mandaj Diosmi cashna huillaj cachan nijtaca paitapish, paipaj familiacunatapishmi jatunta llaquichisha ninmi.

³⁵Cancunapaj huauquita cashpa, cancunahuan apanacujpurata cashpapish: ¿Mandaj Diosca imatataj nishcari, imatataj cutichishcari? ninallami canguichij.

³⁶Cunanmantaca: Mandaj Diosmi huillaj cachan ninataca, ña ama yuyanguichijllapishchu. Maijan cutintaj chashna nijpica, chai shimicunallatatajmi cancunapaj llaquiman tigrachisha ninmi. Cancunallatajmari tucuita Mandaj, ñucanchij causaj Diospaj shimitaca yangacunata rimangapaj japishcanguichij.

³⁷Maijan huillajtapish: Mandaj Diosca ¿ima nintaj, imatataj cutichin? nishpa tapunguichij.

³⁸Mandaj Diosca ¿imatataj huillaj cachan? nishpaca ama ninguichijchu. Mandaj Diostajmi cashna nin: Ñucaca cancunamanca: Mandaj Diosmi huillaj cachan ama ninguichij nishpa ñami huillachircani. Chashna huillachishca jahua, cutintaj: Mandaj Diosmi huillaj cachan nijpica:

³⁹Cancunataca ñuca ñaupajmanta llujshichishpa cachashpa cungarishami. Cancunapaj ñaupa yayacunamanpish, cancunamanpish cushca cai pueblotapish tucui urmachishami.

⁴⁰Chashna rurashpami, cancunataca huiñaita pingai tucushpa, llaquilla causachun saquisha. Manataj cungaripajta, jatuntami pingachisha ninmi ningui” nircami.