Read Chimborazo Highland Quichua JEREMÍAS 3 Bible Online

JEREMÍAS 3 - Chimborazo Highland Quichua bible

JEREMÍAS 3

¹Maijanpish: Shuj runa paipaj huarmita shitajpi, chai huarmi ch'icanyashpa shujtaj c'arihuan apanacushpa causajpica, ¿punta cusaca chai huarmihuan cutin tandanacui tucunchu? ¿Manachu cutin tandanacujpica, tucui llajtatami mapayachin nincuna? Cancarin mashnatajshi c'aricunahuanmari c'uyanacushpa huainayashcangui. Shina cajpipish, cantaca ñucaman tigrai ninimi. Mandaj Diostajmi chashna nini.

²Tucui urcucunata huichilla ricuyari. Maijan lomata ricujpipish, can huainayashcaca ricunallami tiyacun. Cambaj c'uyashcacunahuan tupangapajmi, shitashca pambapi árabe runa chapashpa tiyacuj shina ñan c'uchupi tiyarij carcangui. Chashna huainayashpa, millaita rurashpamari tucui llajtata mapayachingui.

³Chashna rurashcamantamari punta tamyana punllacunapipish, q'uipata tamyana punllacunapipish mana tamyarca. Shina cajpipish huainayaj, pingai illaj huarmi shinamari manataj pingai tucungui.

⁴¿Manachu cunanmantapachallapish cutintaj ñucataca: Ñuca Yayitu, huambraraj cajpica canmari ñucata pushashpa purij carcangui nisha ningui?

⁵Ashtahuanpish canca: Diosca mana huiñaitachu p'iña canga, alli tucungallami nishpami, ima millaita rurasha nishcata rurashpa causangui ninmi.

⁶Mandaj Diosca jatun mandaj Josías mandacui punllacunapimi ñucataca cashna nirca: “¿Chai mana cazuj Israel huarmi imata rurajta ricunguichu? Paica tucui lomacunapi, tucui p'angasapa yura ucucunapimari huainayanaman rin.

⁷Ñucaca: Chai tucuita rurashca q'uipaca, ñucapajman tigrangami yuyarcanimi. Ashtahuanpish paica manataj ñucapajman tigrarcachu. Paipaj ñaña mana cazuj Judapish chaitaca ricurcami.

⁸Paipaj ñaña Israeltaca ñucata mana cazushcamantami, shitanimi nishpa quillcata rurashpa curcani. Chaita cushpa llujshichishpa cachajtaca, paipaj ñahuihuantajmi ricurca. Chaita ricushpapish, cai mana cazuj Judá huarmica mana mancharcachu. Ashtahuanpish paipish ñaña shinallatajmari huainayanaman rirca.

⁹Paica, shujtaj dioscunahuan huainayashca mana alli canataca, mana yuyarcachu. Chaimantami rumi dioscunahuan, caspi dioscunahuan huainayarca. Chashna rurashpami tucui llajtata mapayachirca.

¹⁰Chashna millaita rurashca cashpapish, Israelpaj ñaña mana cazuj Judá huarmica, mana tucui shunguhuan ñucapajman tigrarircachu. Jahua shungullahuanmi cutirij tucurca” ninmi Mandaj Diosca.

¹¹Mandaj Diosca ñucataca cashnapishmi nirca: “Israel huarmica ñucamanta anchurishca cashpapish, cai mana cazuj Judá shinaca manaraj ricurinchu.

¹²Chashna cashcamantaca, janaj lado llajtata ricushpa cashna caparigri: Mandaj Diosca cashnami nin: Mana cazuj Israel huarmilla, ñucapajman tigrari. Ñucaca ña mana ashtahuan p'iñarishpa llaquichishachu. Ñucaca llaquij Diosmari cani, mana huiñaita p'iñalla cashachu ninmi Mandaj Diosca.

¹³Mandaj Diosca cashnapishmi nin: Canta Mandaj ñucatamari mana cazushpa p'iñachircangui. Chai juchata rijsiriyari. Tucui p'angasapa yura ucucunapimari shujtajcunahuan huainayarcangui. Ñuca cayajpica manamari uyarcanguichu ninmi” nircami.

¹⁴Shinallataj Mandaj Diosca cashnami nin: “Mana cazuj huahuacuna, ñucapajman tigramuichij. Ñucamari cancunapaj cusa cani. Ñucaca cancunataca cada pueblomanta shujta, cada familiamanta ishquita japishpami, Siónpi causachun churasha.

¹⁵Chaipi cancunata michichunca, ñuca shungu munashca michijcunatami churasha. Paicunamari alli yachaihuan, alli yuyaihuan michingacuna” ninmi.

¹⁶Mandaj Diosca cashnapishmi nin: “Cancuna mirarishpa, cai llajtapi achca huahuacunayuj tucui punllacunapica: Mandaj Dioshuan ari ninacushcata huaquichina cajón nishpa parlanacushcaca, ña mana uyaringachu. Chai cajón tiyashca canman ninallatapish, mana yuyangacunachu. Chai cajontaca mana yuyaringacunallapishchu, ña mana minishtingacunapishchu. Chai cajón shina shujtajtapish, ña mana rurana cangachu.

¹⁷Ashtahuanpish chai punllacunapica Jerusalentamari: Mandaj Dios mandashpa causana pueblo ningacuna. Tucui llajtacunamanta Jerusalenman shamushpamari, Mandaj Dios ñucataca alabangacuna. Ña mana paicunapaj millai sinchi shungucuna yuyachishcata rurangacunachu.

¹⁸Chai punllacunapica Judá llajtapi causajcunaca, Israel llajtapi causajcunahuan tandanacungallami. Chashna causangapajca janaj lado llajtamantami cancunapaj ñaupa yayacunaman ñuca cushca llajtaman tandalla shamungacuna.

¹⁹Ñucaca: ¿Ima shinataj cancunataca ñuca huahuacunata rurashpa, tucui llajtacunamanta yalli munananqui sumaj llajtata cushari? nishpami tapurcani. Shina nicushpapish ñucallatajmi: Ñucataca ñucanchij Yayitu nichijlla. Ñucamantaca amataj anchuringuichijchu nircani.

²⁰Ashtahuanpish can israelcunaca shuj mana c'uyaj huarmi paipaj cusata shitaj shinamari ñucataca mana cazushpa shitarcanguichij. Mandaj Diostajmi chashna nini.

²¹¡Lomacunapica caparirishcamari uyaricun! Israelcunamari alli ñanmanta llujshishpa, ñuca, paicunata Mandaj Taita Diosta cungarishcacuna. Chaimantamari llaquichun nishpa huacashpa mañacuncuna.

²²Mana cazuj huahuacuna, ñucapajman tigrarichigari. Cancuna tigrarijpica ñucata mana cazushcamanta, llaqui tucushcataca alliyachishallami” ninmi. “Canca ñucanchijta Mandaj Diosmari cangui, chaimanta cunanca ñami cambajman tigramunchij.

²³Lomacunapi, urcucunapi caparirishpa mañagrinaca yangallami. Ñucanchij israelcunamanca ñucanchijta Mandaj Diosllamari quishpirinata cun.

²⁴Ñucanchijllataj pandarishcamantamari, ñucanchij huambraraj cajpi ñucanchij yayacuna trabajashpa charishcacunataca tucui chingachishcanchij. Ovejacuna, huagracunapish illaj, churicuna, ushushicunapish illajllamari saquirinchij.

²⁵Ñucanchij ñaupa yayacunapish, ñucanchijpish huambramantapacha cunancamamari juchata rurashpa, ñucanchijta Mandaj Diostaca p'iñachishpa causanchij. Chashna rurashca jahuamari, ñucanchijta Mandaj Dios rimashcatapish manataj uyashun nircanchij. Chaimantamari cunanca maita mana llujshipaj jatun llaqui tucushpa, pingaihuan huañucunchij” nircacunami.