Read Chimborazo Highland Quichua JEREMÍAS 30 Bible Online

JEREMÍAS 30 - Chimborazo Highland Quichua bible

JEREMÍAS 30

¹Mandaj Dios Jeremiasman huillashca shimicunami caipica tiyacun.

²Israelcunata Mandaj Diosca cashnami nirca: “Ñuca canman tucui imalla nishcata shuj libropi quillcai.

³Mandaj Diostajmi cashna nini: Ñuca agllashca israelcunapuramantapish, Judá aillupuramantapish prezu apashcacunata tigrachimuna punlla chayamungami. Paicunapaj ñaupa yayacunaman ñuca cushca cai llajtamanmi pushamusha. Caipimi sumajta causangacuna” nircami.

⁴Mandaj Diosca israelcunamanta, Judamantaca cai shimicunatami nirca.

⁵Mandaj Diosca cashnami nirca: “Sumajta causacushcamanta cushicushpa caparijtaca mana uyanchijchu. Jatun manchaihuan chujchushpa caparicujtami uyanchij.

⁶Maipi shuj runa huachashcata pitapish tapushpa uyaichigari. Ñucaca tucui c'aricunatami huachana nanaihuan caj huarmi shina cintura quinrita chariricujta ricuni. Tucuicunamari quillu quillu ñahui tucushcacuna.

⁷¡Aij, Jacobpaj huahuacunalla! Paicunapajca manataj chashna tiyashca jatun punllamari chayamugrin. Jatun llaqui punllami canga. Shina cajpipish ñucami paicunataca quishpichisha nircami.

⁸Tucuita Mandaj Diosca cashnapishmi nin: Chai punllacunapica, ñucatajmi cancunapaj cungapi tiyacuj yugotaca p'aquisha. Huatashca cinta angucunatapish p'itishami. Chaipica shujtaj llajtapi causajcunaca, ña mana paicunata servichishpa charingachu.

⁹Ashtahuanpish chai punllaca, ñuca paicunata Mandaj Diostapish, paicunata mandachun ñuca churashca jatun mandaj Davidtapishmi servingacuna” ninmi.

¹⁰Mandaj Diosca cashnapishmi nin: “Ñucata servij Jacobpaj huahuacunalla, ama manchaichijchu. Can israelcunaca ama mancharichijchu. Ñucamari cancunataca huahuacunandij prezu causacun chai caru llajtamanta llujshichisha. Jacobpaj huahuacuna, cancunaca cai llajtaman tigrashpami samaringuichij. Pi mana manchachishca, ima llaquitapish mana yuyarishpami causanguichij.

¹¹Ñucaca cancunata quishpichingapaj cancunahuanmi cani. Ñuca cancunata mai llajtallaman prezu cachashca cashpapish, chai llajtacunataca tucuchishami. Ashtahuanpish cancunataca mana tucuchishachu. Llaquichinataca llaquichishatajmi. Shina cashpapish cancunataca allichingapajllami llaquichisha” ninmi Mandaj Diosca.

¹²Mandaj Diosca cashnapishmi nin: “Cambaj ungüica, mana imahuan jambipaj ungüimi. Cambaj chugrica, mana imahuan alliyachipajchu.

¹³Cantaca, pi mana jambishpa alliyachi tucunchu. Alliyachipaj ima jambipish mana tiyanchu.

¹⁴Cantaca tucui c'uyajcunami cungarincuna. Cunanca pipish ña mana mashcanchu. Cantaca ñucamari p'iñaj runa shina chugrichircani. Mana llaquishpa macaj p'iña runa shinami macarcani. Canllataj jatun millaita rurashcamanta, yallitaj juchacunata rurashcamantami chashna rurarcani.

¹⁵Canta llaquichishcamantaca ¿imapajtaj capariringuiyari? Cambaj nanaica imahuan mana jambipajchu. Canllataj jatun mana allita, yallitaj juchacunata rurashcamantami ñucataj chashna llaquichircani.

¹⁶Canta p'iñashpa tucuchijcunataca tucuicunallatatajmi tucuchingacuna. Tucui paicunami prezu ringacuna. Canta sarujcunaca sarushcallatajmi cangacuna. Tucui can charishcata quichujcunataca paicuna charishcatapish, shujtajcuna quichuchun cushami.

¹⁷Ashtahuanpish canmanca alliyanata cushpa, cambaj chugrita alliyachishami. Cantaca shitashca cashcata yuyashpami: Chai Sión puebloca shitashcami, pi mana yuyarinchu nincuna” ninmi Mandaj Diosca.

¹⁸Mandaj Diosca cashnapishmi nin: “Jacobpaj carpa huasicunamanta prezu apashcacunataca tigrachimushami. Chai carpa huasicunatapish llaquishami. Lomapi tiyashca pueblopish, chai lomallapitajmi shayachishca canga. Ñuca huasitapish ñaupa cashca shinallatajmi shayachishca canga.

¹⁹Ñucami paicunataca achcata mirachisha. Chaimantaca mana tucuchishca cangachu. Ñuca mirachishcamantaca mana pi huañuchishca cangachu. Paicunaca ñucata diosolopagui nishpa alabangacunami. Tucui llajta cushicushpa cantashcami uyaringa.

²⁰Paicunapaj huahuacunaca, ñaupa shina pi mana cuyuchipajmi cangacuna. Paicunata llaquichijcunataca tucuicunatami llaquichisha” ninmi.

²¹Mandaj Diosca cashnapishmi nin: “Paicunapurallamantatajmi paicunata pushaj llujshinga. Shuj mandajmari paicunapaj chaupillamantataj llujshinga. Paitaca ñucapajman c'uchuyachun saquishallami. Paipish ñucapajmanca c'uchuyangallami. Ñucapajmanca pi mana c'uchuyai tucuipajchu.

²²Cancunaca ñuca runacunatajmi canguichij. Ñucapish cancunapaj Diostajmi casha” ninmi Mandaj Diosca.

²³Mandaj Diosca paita mana manchajcunapajca, jatun acapana shina llaquitami allichishcata charicun. Jatunta p'iñarishpami, chai llaquitaca chaicunapaj jahuapi cacharinga.

²⁴Mandaj Diosca jatuntami p'iñaringa. Chaimantaca pai ima shinalla llaquichisha nicushca shinataj rurangacama manataj alli tucungachu. Pai yuyarishcataca pajtachingatajmi. Tucuri punllacunapimi chaitaca tucuita yachanguichij.