Read Chimborazo Highland Quichua JEREMÍAS 35 Bible Online

JEREMÍAS 35 - Chimborazo Highland Quichua bible

JEREMÍAS 35

¹Josiaspaj churi jatun mandaj Joacim, Judá llajtata mandacujpimi, Mandaj Diosca Jeremiastaca cashna mandarca:

²“Recabpaj huahuacunapaj huasiman rishpa paicunahuan rimagri. Chaimantaca ñuca huasiman yaicuchishpa, jahua ucucunaman maijan ucumanpish huichiyachishpa vinota ubyachun cui” nircami.

³Shina nijpimi ñucaca, Jeremiaspaj churi Jaazaniaspajman rircani. Jeremiaspaj yayaca Habasiniasmi carca. Jaazaniastapish, paipaj tucui churicunatapish, paipaj huauquicunatapish, Recabpaj huahua huahuapuratapishmi,

⁴Mandaj Diospaj huasiman pusharcani. Chaiman pushashpaca, Igdalías runapaj churi Hanán tiyacun jahua ucumanmi huichiyachircani. Diosta servij chai runaca mandajcuna tiyana ucu ladopimi tiyacurca. Chai ucuca, Diospaj huasi pungupi cuidaj Maasías runa tiyana ucu jahua altomanmi carca. Maasiasca, Salumpaj churimi carca.

⁵Chaiman huichiyachishpaca, Recabpaj huahuacunataca tasacunapipish, vasocunapipish junda junda vinota ñaupajpi tiyachishpami: “Cai vinota ubyaichij” nircani.

⁶Shina nijpica, paicunaca cashnami nircacuna: “Ñucanchijca vinotaca mana ubyai tucunchijchu. Recabpaj churi Jonadab shuti ñucanchij ñaupa yayamari ñucanchijtaca cashna mandashca: Cancunapish, cancunapaj huahua huahuacunapish tucui causaipi amataj vinota ubyanguichijchu.

⁷Cancuna causanapaj huasicunatapish ama shayachinguichijchu, ima chagracunatapish ama ruranguichijchu, uva chagracunatapish ama ruranguichijchu, chaitaca ama charinguichijllapishchu. Ashtahuanpish tucui cancunaca carpa huasicunallapi causanguichij. Chashnami cancuna causacun cai llajtapica, uni huatacunata causanguichij nishcami.

⁸Recabpaj churi ñucanchij ñaupa yaya Jonadab imallata mandashcatamari tucuita pajtachishpa causanchij. Ñucanchijca pai mandashca shinallataj ñucanchij huarmicunapish, ñucanchij churicunapish, ushushicunapish vinotaca manataj ubyanchijchu.

⁹Shinallataj ñucanchij causangapajpish, mana huasicunata shayachinchijchu. Ñucanchij allpacunapipish uva chagracunata mana charinchijchu, ima chagracunayuj allpacunatapish mana charinchijchu.

¹⁰Ñucanchij ñaupa yaya Jonadab imalla mandashcataca, tucuitami chai shinataj pajtachishpa causanchij. Chaimantami causanatapish carpa huasicunallapi causanchij.

¹¹Shina cashpapish, cunanca Babilonia llajtata jatun mandaj Nabucodonosor cai llajtata llaquichinaman shamushca cajpimari: Jacuchij chai caldeo soldadocunamantapish, Siria llajta soldadocunamantapish Jerusalenpi miticushunchij nishpa shamushpa, cai Jerusalenpi saquirishpa causacunchij” nircacunami.

¹²Chai q'uipami Mandaj Diosca, Jeremiastaca cashna nirca:

¹³“Tucuita Mandaj, israelcunapaj Diostajmi cashna nini: Judá runacunatapish, Jerusalenpi causajcunatapish cashna nigri: Mandaj Diosca cashnami nin: ¿Riquichij, cancunaca manatajchu ñuca mandashcata cazunata yachai tucunguichij imatagari?

¹⁴Vinota ama ubyachun Recabpaj churi Jonadab mandashcataca, paipaj huahuacunaca manataj paquishcacunachu. Paicunapaj punta yaya mandashcata cazushpamari, cunancamapish vinotaca mana ubyashpa causashcacuna. Ñucacarin cancunataca ñaupamantapacha cai tucui huatacunatami rimani. Shina cajpipish, manataj cazunguichijca.

¹⁵Ñucata servij ñuca ima nishcata huillajcunataca, ñaupamantapacha cunancama huashan huashan cachashpa huillachicunillami. Chai tucui huillajcunahuanmi: Tucuicuna cancunapaj millai causaita saquishpa, ñucaman cutirichij. Mana allita ruranata saquichij. Ña ama chai shujtajcunapaj dioscunapajman rishpa cungurichijchu, ama chaicunata servichijchu. Tucui chaicunata saquishpaca cancunapaj yayacunamanpish, cancunamanpish ñuca cushca cai llajtapi causanguichijmi nishpa huillachircani. Shina cajpipish, cancunaca manataj uyanguichijchu, manataj cazunguichijchu.

¹⁶Recabpaj churi Jonadab mandashcataca, paipaj huahua huahuacunaca ñaupa yaya mandashca cashcamanta manataj paquishcacunachu. Ashtahuanpish cai Judá runacunaca ñucataca manataj cazuncunachu” ninmi.

¹⁷Cancuna chashna cashcamantaca tucuita Mandaj, israelcunapaj Diosca cashnami nin: “Ñuca rimashcataca cai Judá llajtapi causajcunapish, Jerusalenpi causajcunapish manataj uyancunachu, cayajpipish manataj cutichincunachu. Chaimanta paicunapajca, ñuca imalla llaquicunata apamusha nishcatami apamugrini” ninmi.

¹⁸Jeremiasca, Recabpaj huahuacunataca cashnami nirca: “Tucuita Mandaj, israelcunapaj Diosca cashnami nin: Cancunaca cancunapaj yaya Jonadab mandashcataca, tucuitami cazushcanguichij. Tucui imallata mandashcataca, chashnataj rurashpami causashcanguichij.

¹⁹Chashna cazushcamantaca, Recabpaj churi Jonadabpaj huahua huahuapuramantaca, shujllapish ñuca ñaupajpi ñucata servinamantaca manataj illangacunachu ninmi. Tucuita Mandaj, israelcunapaj Diostajmi chashna nin” nircami.