Read Chimborazo Highland Quichua JEREMÍAS 36 Bible Online

JEREMÍAS 36 - Chimborazo Highland Quichua bible

JEREMÍAS 36

¹Josiaspaj churi jatun mandaj Joacimca, Judá llajtataca ñami chuscu huatata mandacurca. Chai huatami Mandaj Diosca Jeremiastaca cashna mandarca:

²“Quillcana cara pillushca tiyacujta japi. Chaipica israelcunapajpish, Judá runacunapajpish, tucui shujtaj llajtacunapajpish, imalla llaquicunata cachanata Josías causacui punllacunamantapacha cunancama ñuca imallata huillashca shimicunata quillcai.

³Cai Judá runacunaca, ñuca ima shinalla llaquichisha nishcata uyashpallapish, llaquirishpa paicunapaj millai causaita saquishpa ñucaman cutiringacunapishchari. Cutirijpica, ñucapish paicuna imalla mana allita rurashca juchacunataca, tucuimi perdonasha” nircami.

⁴Chashna nijpimi Jeremiasca, Neriaspaj churi Baructaca cayarca. Paimi Mandaj Dios imalla huillachishcata Jeremías rimajpica, quillcana carapi tucuita quillcashpa pillurca.

⁵Chai q'uipami Jeremiasca, Baructaca cashna mandarca: “Ñucaca Mandaj Diospaj huasiman yaicunata jarcashcami tiyacuni.

⁶Chashna cashcamantaca, mana micushpa Diosta mañangapaj tandanacui punllapica, Mandaj Diospaj huasimanca can yaicungui. Chai punlla yaicushpaca, Mandaj Dios imallata huillachun nishcata ñuca rimajpi cai carapi can quillcashcataca Jerusalenpi causajcunamanpish, tucui Judá llajta pueblocunamanta tandanacushcacunamanpish rezashpa uyachingui.

⁷Mandaj Dios jatunta p'iñarishpa paicunata chashna mancharinata llaquichisha nicujta uyashpaca, Mandaj Dios uyana shinata tucui shunguhuan mañangacunapishchari. Paicunapaj millai causaitapish saquishpa cutiringacunapishchari” nircami.

⁸Shina nijpica Neriaspaj churi Barucca, Dios huillachishcata huillaj Jeremías mandashca shinatajmi rurarca. Mandaj Diospaj huasiman rishpami, Diospaj shimicunata carapi quillcashca tiyacujtaca, chaipi cajcunaman tucuita rezashpa uyachirca.

⁹Josiaspaj churi jatun mandaj Joacimca, Judá llajtataca ñami pichca huatata mandacurca. Chai huatapaj quillapimi Jerusalenpi causajcunatapish, Judá llajtapi caj tucui caishuj pueblocunamanta Jerusalenman shamujcunatapish Mandaj Diospaj ñaupajpi mana micushpa mañashun nircacuna.

¹⁰Chai tandanacuipimi Barucca, Mandaj Diospaj huasi chaupi ucuman yaicushpa, mushuj pungu ñaupajpi shayarirca. Chaipi shayarishpami Jeremías quillcachishcataca pillushca carata pascashpa, tucui chaipi cajcunaman rezashpa uyachirca. Chai ucupica Safanpaj churi Gemarías shuti quillcajmi tiyaj carca.

¹¹Gemariasca, Safanpaj churimi carca. Gemariaspaj churi Micaiapish, Mandaj Diospaj shimicunata chai carapi rezajtaca tucuitami uyarca.

¹²Chaita uyashpaca, jatun mandajpaj huasiman uriyashpami, quillcaj runapaj ucuman yaicurca. Chaipica tucui cai mandajcunami tiyacurcacuna: Quillcaj Elisama, Semaiaspaj churi Delaía, Acborpaj churi Elnatán, Safanpaj churi Gemarías, Ananiaspaj churi Sedequiaspishmi tiyacurcacuna.

¹³Paicunamanmi Micaiasca, tandanacushcacunaman chai carapi Baruc rezashcata uyashcataca tucuita huillarca.

¹⁴Chaita huillajpimi, chai tucui mandajcunallataj Netaniaspaj churi Jehuditaca, Neriaspaj churi Baructa cayanaman cacharcacuna. Netaniaspaj yayaca Selemiasmi carca. Selemiaspaj yayaca Cusi shutimi carca. Jehudimi Baructaca: “Tandanacushcacunaman rezashpa uyachishca pillushca carata apashpa shamui” nirca. Shina nijpimi Barucca, chai pillushca carata apashpa, mandajcunapajman rirca.

¹⁵Paicunaca Baructaca: — Tiyarishpa, ñucanchijmanpish rezashpa uyachi — nijpi, Barucca paicunaman rezashpa uyachirca.

¹⁶Chai tucui shimicunata uyashpaca tucuicunami mancharishpa, caishuj chaishuj ñahuita ricunacurcacuna. Chaimantaca Baructaca: — Cai shimicunataca jatun mandajman huillanatajmi canchij — nircacunami.

¹⁷Chai q'uipaca Baructami: — ¿Cai tucui shimicunataca ima shinataj quillcarcangui, Jeremías rimashcatachu quillcarcangui? Chaita huillai — nircacuna.

¹⁸Shina nijpimi Barucca: — Jeremiasmi tucui cai shimicunataca callarishpa rimarca. Chaitami ñucaca pillushca carapi tintahuan quillcashpa catircani — nircami.

¹⁹Shina nijpimi mandajcunaca Baructaca: — Canpish, Jeremiaspish pi mana ricunapi miticugrichij — nircacuna.

²⁰Chashna nishpaca Baruc charicushca pillushca carataca, Elisama shuti quillcaj runa tiyana ucupi saquishpami, jatun mandaj tiyacunman rircacuna. Chaipimi chai shimicunata uyashcataca, paiman tucuita parlarcacuna.

²¹Chaita huillajpimi jatun mandajca Jehuditaca, chai pillushca cara quillcata apaj cacharca. Paimi quillcaj Elisama tiyana ucumanta chai carata apashpa, jatun mandajmanpish, paihuan tiyacuj tucui mandajcunamanpish rezashpa uyachirca.

²²Huatapaj iscun quillapica, tamya punllacuna cashcamantami, jatun mandajca usyaringacama tiyana huasipi carca. Chiri cashcamantami paipaj ñaupajpica, yanta rupacuj brasero tiyacurca.

²³Jehudica ñami quimsa pilluitachu, chuscu pilluitachu imatajshi rezarca. Chashna rezacujpimi, jatun mandaj chai quillcata quichushpaca, quillcana plumata p'itina cuchillota japishcahuan lliquishpa ninapi shitarca. Chaipi shitashpami, chai pillushca cara quillcataca, paipaj ñaupajpi yanta rupacuj braseropi tucui rupachirca.

²⁴Chai tucui shimicunata uyashpaca jatun mandajpish, paita servij tucui mandajcunapish mana mancharcacunachu. Churanacunallatapish mana lliquircacunachu.

²⁵Chai pillushca cara quillcata rupachicujpica, Elnatanhuan, Delaiahuan, Gemariashuanmi ama rupachipaichu nircacuna. Shina nijpipish jatun mandajca mana uyashpa rupachircallami.

²⁶Shinallataj quillcaj Baructapish, Dios ima nishcata huillaj Jeremiastapish japichunmi, jatun mandajca Hamelecpaj churi Jerameelhuan, Azrielpaj churi Seraiashuan, Abdeelpaj churi Selemiashuan cacharca. Jeremiastapish, Baructapish Mandaj Dios pacashcamantami mana japircacuna.

²⁷Jeremías huillashpa Baructa quillcachishca cara pillushcata jatun mandaj rupachishca q'uipami, Mandaj Diosca Jeremiastaca cutinllataj cashna mandarca:

²⁸“Manaraj quillcashca tiyacuj shujtaj pillushca carata japi. Chaipica Judá llajtata jatun mandaj Joacim rupachishca carapi tiyacushca tucui shimicunallatataj quillcai.

²⁹Ña tucui quillcashpaca, Judá llajtata jatun mandaj Joacimtaca cashna nigringui: Mandaj Diosca cashnami nin: Punta quillcashca cara pillushcataca canmi rupachircangui. Imamantataj cai pillushca carapica, Babilonia llajtata jatun mandajca shamungatajmi. Paimi cai llajtapi ima tiyashcataca tucui chingachinga. Runacunatapish, animalcunatapish mana saquishpami chingachinga nishpa quillcarcanguiyari nishpami rupachircangui ninmi.

³⁰Chashna rurashcamantaca Mandaj Diosca, Judá llajtata jatun mandaj Joacimtaca cashnapishmi nin: Paica Davidpaj jatun tiyanapi tiyashpa mandachun huahuacunata mana charingachu. Pai huañujpipish punlla rupaipi, tuta chiripi sirichun shitangacunallami.

³¹Millaita rurashpa causashcamantaca paitapish, paipaj huahuacunatapish, paita servij mandajcunatapishmi llaquichisha. Ñucaca jatun llaquicunatami cachagrini nishpami huillarcani. Shina nijpipish, cancunaca manataj cazurcanguichijchu. Chashna cashcamantaca ñuca huillashca chai tucui llaquicunatami cancunapaj jahuapipish, Jerusalenpi causajcunapaj jahuapipish, tucui Judá runacunapaj jahuapipish cachagrini ninmi ningui” nircami.

³²Shina nijpimi Jeremiasca, shujtaj pillushca carata japishpa, Neriaspaj churi quillcaj Barucman curca. Chai carapimi Barucca, Judá llajtata jatun mandaj Joacim rupachishca carapi quillcashca shimicunallatataj Jeremías cutin huillajpi chashnallataj quillcarca. Chai quillcapicarin Jeremiasca, chai shinallataj ashtahuan llaquicuna tiyanata mirachishpa huillashpami quillcachirca.