Read Chimborazo Highland Quichua JEREMÍAS 37 Bible Online

JEREMÍAS 37 - Chimborazo Highland Quichua bible

JEREMÍAS 37

¹Joacimpaj churi Coniaspaj randica, Josiaspaj churi Sedequiasmi Judá llajtataca mandacurca. Paitaca Babilonia llajtata jatun mandaj Nabucodonosormi, Judá llajtata jatun mandaj cachun churarca.

²Shina cajpipish Mandaj Dios Jeremiasman huillachishcataca paipish, pai churashca mandajcunapish, tucui chaipi causajcunapish manataj cazurcacunachu.

³Jatun mandaj Sedequiasca: “Ñucanchijta Mandaj Diosta ñucanchijmanta mañapai” nichunmi, Selemiaspaj churi Jucaltapish, Maasiaspaj churi Sofonías curatapish Dios ima nishcata huillaj Jeremiaspajman cacharca.

⁴Jeremiasca chaipajca, manaraj prezu tiyacurcachu. Chaimantami paica chaipi cajcunapurapi puricurcaraj.

⁵Chai punllacunallapitajmi, faraonpaj soldadocuna Egiptomanta shamucushca uyarirca. Jerusalén pueblo muyundijpi chapacuj caldeo soldadocuna chaita uyashpaca, anchurishpa rircacunami.

⁶Chaipimi Jeremiastaca Mandaj Diosca cashna nichun mandarca:

⁷“Mandaj Diosca cashnami nin: Ñucata tapuchun cancunata cachaj cai Judá llajtata jatun mandajmanca cashna nigrichij: Faraonpaj soldadocunaca cancunata ayudanaman Egiptomanta shamucushpapish, ñami paicunapaj llajtallamantaj tigrancuna.

⁸Ashtahuanpish caldeocunamari cutin tigramugrin. Paicunaca cai pueblota mishashpami, ninata japichishpa tucui rupachingacuna ninmi.

⁹Mandaj Diosca cashnapishmi nin: Caldeocunaca ña anchurishpa ringacunatajmi nishpa ama cancunallataj umarichijchu. Paicunaca manataj anchuringacunachu.

¹⁰Cancunahuan macanacucuj caldeo soldadocunataca, tucuicunata chugrichinguichijchari. Chashna chugrichishca huaquin soldadocunalla saquirishpapish, paicunapaj carpa huasicunamanta llujshimushpa cai pueblotaca ninata japichishpa tucui rupachingallami ninmi” nircami.

¹¹Jerusalén muyundijpi chapacuj caldeo soldadocunaca, faraonpaj soldadocuna Egiptomanta shamucujta yachashpami anchurircacuna.

¹²Paicuna anchurijpimi Jeremiasca Jerusalenpi causajcunamanta anchurishpa, Benjamín llajtaman ringapaj Jerusalenmanta llujshicurca.

¹³Paica Benjamín shuti pungutami llujshigrirca. Chai pungupica soldadocunata mandaj Irías shuti soldadomi cuidacurca. Paimi Jeremías llujshigrijpica: — Canca caldeocunapajmanmi ricungui — nishpa japirca. Iriaspaj yayaca Selemiasmi carca. Selemiaspaj yayaca Hananiasmi carca.

¹⁴Irías japijpica Jeremiasca: — Pandatami yuyangui, manapish caldeocunapajman ricunichu — nircami. Shina nijpipish Iriasca mana uyashpami, Jeremiastaca mandajcunapaj ñaupajman aparca.

¹⁵Mandajcunaca p'iñarishpami, Jeremiastaca anguhuan macarcacuna. Chaimantaca Jonatán shuti quillcaj runapaj huasi cashca ucupimi prezu churarcacuna. Chai huasitaca ñaupamanca, quillcashpa tiyana huasi cashca cajpipish, prezuna huasitami rurarcacuna.

¹⁶Chai huasipica Jeremiastaca, pambata allashpa rurashca ucupimi churarcacuna. Chaipimi paica achca punllacunata tiyarca.

¹⁷Jatun mandaj Sedequiasmi, Jeremiasta chai ucumanta llujshichichun cacharca. Chaimanta llujshichishpa paipaj huasiman pushaj cachashpami, Jeremiastaca: — ¿Mandaj Diosca imata huillanchu? — nishpa paillata tapujpimi, Jeremiasca: — Ari, huillanataca charinimi, Babilonia llajtata jatun mandajpaj maquipimi churagrin — nirca.

¹⁸Jeremiasca, jatun mandaj Sedequiastaca cashnapishmi nirca: — Ñucaca cantapish, can churashca mandajcunatapish, tucui cai pueblopi causajcunatapish ¿ima mana allitataj rurashcaniyari? ¿Imamantataj ñucataca prezu churanguichigari?

¹⁹Babilonia llajtata jatun mandajca cancunatapish, cai llajtatapish mana llaquichinaman shamungachu nishpa cancunaman huillajcunaca ¿maitagari?

²⁰Jatun mandaj ñuca amitolla, cunanca caillatami mañagripani. Ñuca mañashcata ari nihuailla: Ñucaca quillcaj Jonatanpaj huasipica mana huañusha ninichu. Ama chaiman tigrachishpa cachahuaichu — nircami.

²¹Shina nijpimi jatun mandaj Sedequiasca, Jeremiastaca prezuna huasi canllapi churachirca. Paimanca tandata rurajcunapaj callemanta punllanta shuj tandallata apashpami carajcuna carca. Chashnami Jeremiasca, prezuna huasi canllapi saquirirca.