Read Chimborazo Highland Quichua JEREMÍAS 39 Bible Online

JEREMÍAS 39 - Chimborazo Highland Quichua bible

JEREMÍAS 39

¹Jatun mandaj Sedequiasca, Judá llajtataca ñami iscun huatata mandacurca. Chai huatapaj chunga quillapimi, Babilonia llajtata jatun mandaj Nabucodonosorca, paipaj tucui soldadocunahuan shamushpa, Jerusalén pueblo muyundijta shayarishpa macanacuita callarircacuna.

²Chai macanacui punllacunami Sedequías mandanaca, chunga shuj huata tucurca. Chai huatapaj chuscu quilla iscun punllapimi, Jerusalén pueblo muyundij jatun pircataca shuj mirgata t'unircacuna.

³Chashna t'unishpami, Babilonia llajtata jatun mandaj cachashca mandajcunaca, tucuicuna Jerusalenman yaicurcacuna. Chaimantaca chaupipi caj pungu pambapimi, carpa huasicunata shayachishpa tiyarircacuna. Chai mandajcunaca: Nergal-sarezer, Samgar-nebo, Rabsaris nishca Sarsequim, Rabmag nishca Nergal-sarezer shuti mandajcunapish, shujtaj mandajcunapishmi carcacuna.

⁴Judá llajtata jatun mandaj Sedequiaspish, paipaj tucui soldadocunapish chai mandajcunata ricushpaca, tutami pueblomanta llujshircacuna. Jatun mandajpaj huerta chaupita rishpami, ishqui jatun pirca chaupipi caj punguta llujshircacuna. Chaita llujshishpaca, Arabá nishca pambamanmi rircacuna.

⁵Shina cajpipish, caldeo soldadocuna catishpaca, Jericó shuti pambapimi Sedequiastaca japircacuna. Chaipi japishpaca, Hamat llajtapi caj Ribla shuti pueblomanmi, Babilonia llajtata jatun mandaj Nabucodonosorpajman pusharcacuna. Chaiman chayachijpimi, paita ima shinalla llaquichinata mandarca.

⁶Babilonia llajtata jatun mandajca, Sedequiaspaj huahuacunatarajmi pai ricucujllapitaj cungata p'itichirca. Shinallataj Judá llajtata mandajcunatapish, tucuicunatami Babilonia llajtata jatun mandajca cungata p'itichirca.

⁷Jatun mandaj Sedequiastaca, ishquindij ñahuita llujshichishpami, Babilonia llajtaman apangapaj fierro cadenacunahuan huatachirca.

⁸Caldeo soldadocunaca mandana huasitapish, tucui Jerusalén pueblo huasicunatapishmi rupachircacuna. Muyundij jatun pircacunatapish urmachircacunami.

⁹Cuidaj soldadocunata mandaj Nabuzaradanca, Jerusalenmanta mana llujshishcacunatapish, quiquin chaquihuan paipaj maquipi yaicugrijcunatapish tandachishpami Babiloniaman aparca.

¹⁰Chai cuidaj soldadocunata mandaj Nabuzaradanca, imata mana charij huajchacunallatami, Judá llajtapica saquirca. Paicunamanca allpacunata, uva chagracunatami cushpa saquirca.

¹¹Nabucodonosorca, paita cuidaj soldadocunata mandaj Nabuzaradantaca, Jeremiasta ricuchun nishpami, cashna mandashca carca:

¹²“Jeremiastaca, can japishpa cuidangui, imata mañajpipish chaita ruranguilla” nishcami carca.

¹³Chaimantaca cuidaj soldadocunata mandaj Nabuzaradanpish, cuidaj soldadocunallatataj mandaj caishuj Rabsaris nishca Nabusazbanpish, Rabmag nishca Nergal-sarezerpish, Babilonia llajtata jatun mandaj cachashca tucui caishuj mandajcunapishmi,

¹⁴Jeremiastaca, prezuna huasi canllamanta llujshichichircacuna. Chaimanta llujshichishpaca, Ahicampaj churi Gedaliasmanmi curcacuna. Ahicampaj yayaca Safán shutimi carca. Jeremiastaca paipaj huasipi pushashpa causachunmi, Gedaliasmanca curcacuna. Chashnami Jeremiasca, Judapi saquirishcacunallahuantaj causarca.

¹⁵Prezuna huasi canllapi prezu tiyacujpimi, Mandaj Diosca Jeremiastaca cashna mandarca:

¹⁶“Ebed-melecpajman rishpa cashna nigri: Tucuita Mandaj, israelcunapaj Diosca cashnami nin: Ñucaca, cai pueblopajca ima allita mana rurashachu, ashtahuanpish imalla llaquicunata cachashami nishpa ñuca huillashcatami pajtachigrini. Chai llaqui punllacuna chayamucujtaca, cambaj ñahuihuantajmi ricungui.

¹⁷Shina cajpipish chai llaqui punllacunapica, ñucami canta quishpichisha. Cantaca can manchacushca runacunapaj maquipica, mana churashachu ninmi Mandaj Diosca.

¹⁸Shinallataj: Canca manataj espadahuan huañuchishca canguichu, ashtahuanpish ñucatajmi quishpichisha. Ñucapi cambaj shunguta churashcamantaca, chai macanacuipi huañunamanta quishpiringuimi ninmi Mandaj Diosca nigri” nircami.